ಎಲೆಮರೆಯ ಕಾಯಿಯಂತಿರುವ ಬೆಟ್ಟದ ಮಲ್ಲೇಶ್ವರ ಪ್ರವಾಸಿ ತಾಣ

ಬಸವರಾಜ ಸರೂರ

ಕನ್ನಡಪ್ರಭ ವಾರ್ತೆ ರಾಣಿಬೆನ್ನೂರು

ತಾಲೂಕಿನ ಅರೆಮಲ್ಲಾಪುರ ಸಮೀಪವಿರುವ ಬೆಟ್ಟದ ಮಲ್ಲೇಶ್ವರ (ಬೆಟ್ಟದ ಮಲ್ಲಪ್ಪನ ಗುಡ್ಡ) ಇತ್ತೀಚಿನ ದಿನಗಳಲ್ಲಿ ಅತ್ಯಂತ ಪ್ರಚಲಿತಕ್ಕೆ ಬರುತ್ತಿರುವ ಒಂದು ಅಪೂರ್ವ ಪ್ರವಾಸಿ ಮತ್ತು ಧಾರ್ಮಿಕ ತಾಣವಾಗಿದೆ. ಈ ಹಿಂದೆ ಕೇವಲ ಸ್ಥಳೀಯ ಭಕ್ತರಿಗಷ್ಟೇ ಸೀಮಿತವಾಗಿದ್ದ ಈ ಸುಂದರ ಗುಡ್ಡವು, ಪ್ರಕೃತಿ ಸೌಂದರ್ಯ ಮತ್ತು ಸಾಮಾಜಿಕ ಜಾಲತಾಣಗಳ ಮೂಲಕ ಇಂದು ಕರ್ನಾಟಕದಾದ್ಯಂತ ಯುವ ಚಾರಣಿಗರನ್ನು ಆಕರ್ಷಿಸುತ್ತಿದೆ.

ರಾಣಿಬೆನ್ನೂರಿನ ನಂದಿ ಬೆಟ್ಟ: ದಟ್ಟವಾದ ಹಸಿರು, ಸದಾ ಬೀಸುವ ತಂಪಾದ ಗಾಳಿ ಮತ್ತು ಬೆಟ್ಟದ ತುತ್ತತುದಿಯಿಂದ ಕಾಣುವ ರಮಣೀಯ ದೃಶ್ಯಗಳಿಂದಾಗಿ ಇತ್ತೀಚೆಗೆ ಪ್ರವಾಸಿಗರು ಇದನ್ನು ರಾಣಿಬೆನ್ನೂರಿನ ನಂದಿ ಹಿಲ್ಸ್ ಎಂದು ಕರೆಯಲಾರಂಭಿಸಿದ್ದಾರೆ. ವಿಶೇಷವಾಗಿ ಮುಂಗಾರು (ಮಳೆಗಾಲ) ಮತ್ತು ಚಳಿಗಾಲದಲ್ಲಿ ಈ ಇಡೀ ಪ್ರದೇಶವು ಪಶ್ಚಿಮ ಘಟ್ಟಗಳ ಮಾದರಿಯಲ್ಲಿ ಹಸಿರು ಚಾದರವನ್ನು ಹೊದ್ದುಕೊಳ್ಳುತ್ತದೆ.

ಸಾಹಸಪ್ರಿಯರ ನೆಚ್ಚಿನ ಚಾರಣ ತಾಣ: ನಗರದ ಜಂಜಾಟದಿಂದ ದೂರವಿರಲು ಬಯಸುವವರಿಗೆ ಇದೊಂದು ಅತ್ಯುತ್ತಮ ‘ವೀಕೆಂಡ್ ಗೇಟ್‌ವೇ’. ಬೆಟ್ಟದ ಮೇಲಿರುವ ಪುರಾತನ ಶಿವನ (ಮಲ್ಲಪ್ಪ/ಮಲ್ಲಿಕಾರ್ಜುನ) ದೇವಸ್ಥಾನವನ್ನು ತಲುಪಲು ಸಾಗುವ ಅಂಕುಡೊಂಕಿನ ದಾರಿ ಮತ್ತು ಆಫ್-ರೋಡ್ ಚಾಲನಾ ಅನುಭವ ಯುವಕರಿಗೆ ಹಾಗೂ ಚಾರಣಪ್ರೇಮಿಗಳಿಗೆ ರೋಮಾಂಚನ ನೀಡುತ್ತದೆ.

ಶತಮಾನಗಳ ಶಿವಾರಾಧನೆಯ ಇತಿಹಾಸ:ತುಂಗಭದ್ರಾ ನದಿಯ ತಟದ ಐತಿಹಾಸಿಕ ಐರಾಣಿ ಮತ್ತು ಅರೆಮಲ್ಲಾಪುರ ಗ್ರಾಮಗಳ ಸನಿಹದಲ್ಲೇ ತಲೆಎತ್ತಿ ನಿಂತಿರುವ ಈ ಬೆಟ್ಟಕ್ಕೆ ಭವ್ಯ ಇತಿಹಾಸವಿದೆ. ಬೆಟ್ಟದ ತುತ್ತತುದಿಯಲ್ಲಿ ನೆಲೆಸಿರುವ ಮಲ್ಲೇಶ್ವರ (ಮಲ್ಲಿಕಾರ್ಜುನ) ಸ್ವಾಮಿಯು ಸುತ್ತಮುತ್ತಲಿನ ನೂರಾರು ಹಳ್ಳಿಗಳ ಜನರಿಗೆ ಮನೆದೇವರಾಗಿದ್ದಾನೆ. ಪ್ರತಿವರ್ಷ ಮಹಾ ಶಿವರಾತ್ರಿಯ ಸಂದರ್ಭದಲ್ಲಿ ಇಲ್ಲಿ ಅದ್ಧೂರಿ ಜಾತ್ರೆ ಹಾಗೂ ವಿಶೇಷ ಪೂಜೆಗಳು ಜರುಗುತ್ತವೆ. ಈ ಸಂದರ್ಭದಲ್ಲಿ ಹರಕೆ ಹೊತ್ತ ಭಕ್ತಸಾಗರವೇ ಬೆಟ್ಟ ಹತ್ತಿ ಬರುತ್ತದೆ.

ಸೂರ್ಯೋದಯ-ಸೂರ್ಯಾಸ್ತದ ಅದ್ಭುತ ನೋಟ:ಬೆಳಗ್ಗೆ 6ರಿಂದ 7 ಗಂಟೆಯ ಅವಧಿಯಲ್ಲಿ ಬೆಟ್ಟದ ಮೇಲಿಂದ ಕಾಣುವ ಸೂರ್ಯೋದಯ ಮತ್ತು ಸಂಜೆಯ ಸೂರ್ಯಾಸ್ತದ ನಯನಮನೋಹರ ದೃಶ್ಯಗಳು ಫೋಟೋಗ್ರಫಿ ಹಾಗೂ ವ್ಲಾಗಿಂಗ್ ಮಾಡಲು ಅತ್ಯಂತ ಸೂಕ್ತವಾಗಿವೆ.

ಕೇವಲ ವಾಣಿಜ್ಯ ಮತ್ತು ಕೃಷಿ ಉದ್ಯಮಕ್ಕಷ್ಟೇ ಹೆಸರಾಗಿದ್ದ ರಾಣಿಬೆನ್ನೂರಿನ ಪ್ರವಾಸೋದ್ಯಮಕ್ಕೆ ಈಗ ಬೆಟ್ಟದ ಮಲ್ಲೇಶ್ವರ ಗುಡ್ಡವು ಹೊಸ ಆಯಾಮ ನೀಡುತ್ತಿದೆ. ಪ್ರಕೃತಿಯ ಶಾಂತತೆ ಮತ್ತು ದೈವಿಕ ಶಕ್ತಿ ಎರಡೂ ಸಂಗಮಿಸಿರುವ ಈ ತಾಣವನ್ನು ಸೂಕ್ತವಾಗಿ ಅಭಿವೃದ್ಧಿಪಡಿಸಿದರೆ, ಇದು ಉತ್ತರ ಕರ್ನಾಟಕದ ಪ್ರಮುಖ ಪ್ರವಾಸಿ ಕೇಂದ್ರವಾಗಿ ಬೆಳೆಯುವುದರಲ್ಲಿ ಯಾವುದೇ ಸಂಶಯವಿಲ್ಲ.

ಶಾಸಕರ ಮುತುವರ್ಜಿ: ಸ್ಥಳೀಯ ಶಾಸಕ ಪ್ರಕಾಶ ಕೋಳಿವಾಡ ಅವರು ರಾಣಿಬೆನ್ನೂರು ತಾಲೂಕಿನಲ್ಲಿ ಎಲೆಮರೆಯ ಕಾಯಿಯಂತಿರುವ ಪ್ರವಾಸಿ ತಾಣಗಳ ಬಗ್ಗೆ ಹೆಚ್ಚಿನ ಆಸಕ್ತಿ ವಹಿಸಿದ್ದು, ಆ ಪೈಕಿ ಅರೆಮಲ್ಲಾಪುರ ಬೆಟ್ಟದ ಮಲ್ಲೇಶ್ವರ ಪ್ರಮುಖವಾಗಿದೆ. ಇದಕ್ಕಾಗಿ ಸಿದ್ದರಾಮಯ್ಯ ಅವಧಿಯಲ್ಲಿ ಪ್ರವಾಸೋದ್ಯಮ ಸಚಿವರಾಗಿದ್ದ ಎಚ್.ಕೆ. ಪಾಟೀಲ ಅವರನ್ನು ಅಲ್ಲಿಗೆ ಕರೆದುಕೊಂಡು ಹೋಗಿದ್ದರು. ಆನಂತರ ಅವರ ಇಲಾಖೆ ಮೂಲಕ ಪ್ರವಾಸಿಗರಿಗೆ ಅಲ್ಲಿಗೆ ಹೋಗಿ ಬರುವ ಸಲುವಾಗಿ ವಾಹನ (ಟಾಟಾ ಸುಮೋ) ವ್ಯವಸ್ಥೆ ಮಾಡಿದ್ದರು.

ಅಭಿವೃದ್ಧಿಯ ನಿರೀಕ್ಷೆಯಲ್ಲಿ ಪ್ರವಾಸಿ ತಾಣ:ಇತ್ತೀಚೆಗೆ ಪ್ರವಾಸಿಗರ ಸಂಖ್ಯೆ ಗಣನೀಯವಾಗಿ ಹೆಚ್ಚುತ್ತಿದ್ದರೂ, ಈ ತಾಣಕ್ಕೆ ಇನ್ನು ಹೆಚ್ಚಿನ ಮೂಲಸೌಕರ್ಯಗಳ ಅಗತ್ಯವಿದೆ. ರಸ್ತೆಗಳ ಸುಧಾರಣೆ, ಕುಡಿಯುವ ನೀರಿನ ವ್ಯವಸ್ಥೆ ಹಾಗೂ ಬೆಟ್ಟದ ತುದಿಯಲ್ಲಿ ಸುರಕ್ಷತಾ ಕ್ರಮಗಳನ್ನು ಕೈಗೊಂಡರೆ, ಇದು ಇಡೀ ಉತ್ತರ ಕರ್ನಾಟಕ ಭಾಗದ ಪ್ರಮುಖ ಗಿರಿಧಾಮವಾಗಿ ಮಾರ್ಪಡುವ ಎಲ್ಲ ಲಕ್ಷಣಗಳನ್ನು ಹೊಂದಿದೆ.

ತಲುಪುವ ಮಾರ್ಗ: ರಾಣಿಬೆನ್ನೂರು ನಗರದಿಂದ ಸುಮಾರು 12ರಿಂದ 15 ಕಿಮೀ ದೂರದಲ್ಲಿದೆ. ದ್ವಿಚಕ್ರ ವಾಹನಗಳು ಅಥವಾ ಕಾರುಗಳ ಮೂಲಕ ಸುಲಭವಾಗಿ ತಲುಪಬಹುದು.

ಭೇಟಿಗೆ ಅತ್ಯುತ್ತಮ ಸಮಯ: ಜುಲೈನಿಂದ ಜನವರಿ (ಮಳೆಗಾಲ ಮತ್ತು ಚಳಿಗಾಲದ ಅವಧಿಯಲ್ಲಿ ಬೆಟ್ಟದ ಸೌಂದರ್ಯ ದುಪ್ಪಟ್ಟಾಗಿರುತ್ತದೆ). ಬೆಟ್ಟದ ಮೇಲೆ ಅಂಗಡಿಗಳಿಲ್ಲದ ಕಾರಣ, ಕುಡಿಯುವ ನೀರು ಮತ್ತು ಲಘು ಆಹಾರವನ್ನು ಜತೆಯಲ್ಲೇ ಕೊಂಡೊಯ್ಯುವುದು ಉತ್ತಮ.

ಬೆಟ್ಟದ ಮಲ್ಲೇಶ್ವರ ಗುಡ್ಡವು ಒಂದು ಉತ್ತಮ ಪ್ರವಾಸಿ ತಾಣವಾಗಿದ್ದು, ಮಲೆನಾಡಿನ ಸೌಂದರ್ಯವನ್ನು ನೆನಪಿಸುತ್ತದೆ. ಇದು ನಮ್ಮ ತಾಲೂಕಿನಲ್ಲಿರುವುದು ನಮ್ಮೆಲ್ಲರಿಗೂ ಹೆಮ್ಮೆ ಮತ್ತು ಅಭಿಮಾನದ ಸಂಗತಿಯಾಗಿದೆ. ಸಮೀಪದಲ್ಲಿಯೇ ಕೃಷ್ಣಮೃಗ ಅಭಯಾರಣ್ಯವಿದ್ದು, ಪ್ರವಾಸಿಗರು ಅಲ್ಲಿಗೂ ಭೇಟಿ ನೀಡಬಹುದಾಗಿದೆ ಎಂದು ರಾಣಿಬೆನ್ನೂರಿನ ಬೀರಪ್ಪ ಲಮಾಣಿ ಹೇಳಿದರು.