ಹೂವಿನಬಾವಿ ತಾಂಡಾದಲ್ಲಿ ಮಾತಾ ಕಾಳಿಕಾದೇವಿಯ ಜಾತ್ರೆ

ಚಿಂಚೋಳಿ: ತಾಂಡಾದ ಪ್ರತಿಯೊಬ್ಬರೂ ತಮ್ಮ ಮಕ್ಕಳಿಗೆ ಉತ್ತಮ ಶಿಕ್ಷಣ ಮತ್ತು ಸಂಸ್ಕಾರ ನೀಡಬೇಕು. ಅಲ್ಲದೆ, ಯುವಕರು ತಂದೆ-ತಾಯಿಗಳನ್ನು ಪ್ರೀತಿಯಿಂದ ಪಾಲನೆ ಪೋಷಣೆ ಮಾಡಬೇಕು. ಮಾತಾ ಗೀತಾದೇವಿ ಹಾಗೂ ಹೂವಿನಬಾವಿ ಕಾಳಿಕಾದೇವಿಯ ಭಕ್ತಿ ಮತ್ತು ಶಕ್ತಿ ನಮ್ಮೆಲ್ಲರ ಮೇಲೆ ಸದಾ ಇರಲಿ,ಎಂದು ಕಲಬುರಗಿ ಮಾಜಿ ಸಂಸದ ಡಾ. ಉಮೇಶ ಜಾಧವ ಹೇಳಿದರು.

​ತಾಲೂಕಿನ ಹೂವಿನಬಾವಿ ತಾಂಡಾದಲ್ಲಿ ಶ್ರೀ ಮಾತಾ ಕಾಳಿಕಾದೇವಿಯ 12ನೇ ಜಾತ್ರಾ ಮಹೋತ್ಸವದ ಅಂಗವಾಗಿ ನಡೆದ ಧಾರ್ಮಿಕ ಸಭೆಯನ್ನು ಉದ್ಘಾಟಿಸಿ ಅವರು ಮಾತನಾಡಿದರು. "ಪ್ರತಿಯೊಬ್ಬ ತಂದೆ-ತಾಯಿಗಳು ತಮ್ಮ ಹೆಣ್ಣು ಮಕ್ಕಳಿಗೆ ಉತ್ತಮ ಸಂಸ್ಕಾರ ನೀಡಬೇಕು ಮತ್ತು ಬಂಜಾರ ಸಮಾಜದ ಪ್ರತಿಯೊಬ್ಬರೂ ಶಿಕ್ಷಣ ಪಡೆಯಬೇಕು. ಹೂವಿನಬಾವಿ ಪವಿತ್ರ ಪುಣ್ಯಭೂಮಿಯಾಗಿದ್ದು, ಮಹಾಕಾಳಿಕಾ ದೇವಿ ಹಾಗೂ ಮಾತಾ ಗೀತಾದೇವಿ ಅವರ ಆಶೀರ್ವಾದದಿಂದ ಮತ್ತಷ್ಟು ಪ್ರಸಿದ್ಧಿ ಪಡೆದಿದೆ ಎಂದರು.

ಕಾಳಿಕಾದೇವಿ ​ಮಂದಿರದ ಪೂಜ್ಯ ಮಾತಾ ಗೀತಾದೇವಿ ದಿವ್ಯ ಸಾನಿಧ್ಯ ವಹಿಸಿ ಆಶೀರ್ವಚನ ನೀಡಿದರು.

​ಶಿಕ್ಷಣ ಸಂಯೋಜಕ ಅಶೋಕ್ ಹೂವಿನಬಾವಿ ಮಾತನಾಡಿ,ಶ್ರೀಮಾತಾ ಕಾಳಿಕಾದೇವಿ ಜಾತ್ರಾ ಮಹೋತ್ಸವವು ಈ ಭಾಗದ ಬಂಜಾರ ಸಮುದಾಯ ಹಾಗೂ ಸುತ್ತಮುತ್ತಲಿನ ಗ್ರಾಮಸ್ಥರ ಪ್ರಮುಖ ಧಾರ್ಮಿಕ ಮತ್ತು ಸಾಂಸ್ಕೃತಿಕ ಹಬ್ಬವಾಗಿ ಗುರುತಿಸಿಕೊಂಡಿದೆ. ಕಳೆದ 12 ವರ್ಷಗಳಿಂದ ನಿರಂತರವಾಗಿ ವಿಜೃಂಭಣೆಯಿಂದ ಆಚರಿಸಿಕೊಂಡು ಬರಲಾಗುತ್ತಿರುವ ಈ ಜಾತ್ರೆಯಲ್ಲಿ ಮಾತಾ ಕಾಳಿಕಾದೇವಿಯ ಜೊತೆಗೆ ಮಾತಾ ಗೀತಾದೇವಿಯ ಆರಾಧನೆಗೂ ವಿಶೇಷ ಮಹತ್ವವಿದೆ ಎಂದು ತಿಳಿಸಿದರು.

​ಜಾತ್ರಾ ಮಹೋತ್ಸವದ ಅಂಗವಾಗಿ ಬೆಳಗಾವಿ ಜಿಲ್ಲೆಯ ಖ್ಯಾತ ಜನಪದ ಕಲಾವಿದ ಬಾಳು ಬೆಳಗುಂದಿ ಅವರು ನಡೆಸಿಕೊಟ್ಟ ಜನಪದ ಸಂಗೀತ ಕಾರ್ಯಕ್ರಮ ನೆರೆದಿದ್ದ ಭಕ್ತರ ಮನಸೂರೆಗೊಂಡಿತು.

ದೇವಸ್ಥಾನದಲ್ಲಿ ವಿಶೇಷ ಪೂಜೆ, ಅಭಿಷೇಕ, ಹೋಮ-ಹವನ ಹಾಗೂ ಭಜನಾ ಕಾರ್ಯಕ್ರಮಗಳು ಶ್ರದ್ಧಾಭಕ್ತಿಯಿಂದ ನಡೆದವು. ಬಂಜಾರ ಸಮುದಾಯದ ಮಹಿಳೆಯರು ಸಾಂಪ್ರದಾಯಿಕ ವೇಷಭೂಷಣಗಳಲ್ಲಿ ಪಾಲ್ಗೊಂಡು ದೇವಿಗೆ ವಿಶೇಷ ನೈವೇದ್ಯ ಮತ್ತು ಹರಕೆ ಸಲ್ಲಿಸಿದ್ದು ಜಾತ್ರೆಯ ಪ್ರಮುಖ ಆಕರ್ಷಣೆಯಾಗಿತ್ತು. ಸುತ್ತಮುತ್ತಲಿನ ಗ್ರಾಮಗಳಿಂದ ಸಾವಿರಾರು ಭಕ್ತಾದಿಗಳು ಪಾಲ್ಗೊಂಡಿದ್ದರು.

​ಧಾರ್ಮಿಕ ಸಭೆಯಲ್ಲಿ ವಿಜಯಪುರದ ಮಹಾದೇವ ನಾಯಕ, ಅರುಣ್ ಪವಾರ್, ವಿಜಯಕುಮಾರ್ ರಾಥೋಡ್, ಉಮೇಶ್ ಕಲಬುರ್ಗಿ, ಅಂಬರ ಜಾಧವ್, ವಿಜಯಕುಮಾರ್ ಚೇಂಗಟಿ, ಅಶೋಕ್ ಹೂವಿನಬಾವಿ, ಕೆ.ಎಂ. ಬಾರಿ, ಪಿಎಸ್ಐ ಶಿವಶಂಕರ್ ಸುಬೇದಾರ್ ಸೇರಿದಂತೆ ತಾಂಡಾದ ಮುಖಂಡರು ಉಪಸ್ಥಿತರಿದ್ದರು.