ಮೋದಿ ‘ಭಾರತ ಭಾಗ್ಯ ವಿದಾತ’ : ಪುತ್ತಿಗೆ ಶ್ರೀಗಳಿಂದ ಬಿರುದು

 ಉಡುಪಿ :  ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಉಡುಪಿ ಪರ್ಯಾಯ ಪುತ್ತಿಗೆ ಮಠದ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದರು ‘ಭಾರತ ಭಾಗ್ಯ ವಿದಾತ’ ಎಂಬ ಬಿರುದು ನೀಡಿ ಗೌರವಿಸಿದ್ದಾರೆ.

ಶುಕ್ರವಾರ, ಪುತ್ತಿಗೆ ಮಠದ ವತಿಯಿಂದ ಆಯೋಜಿಸಲಾದ ‘ಲಕ್ಷ ಕಂಠ ಗೀತಾ ಪಾರಾಯಣ’ ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಮೋದಿ ಅವರಿಗೆ ಪುತ್ತಿಗೆ ಶ್ರೀಗಳು ಈ ಬಿರುದು ನೀಡಿ ಸನ್ಮಾನಿಸಿದರು. ನಂತರ, ಸಂದೇಶ ನೀಡಿದ ಶ್ರೀಗಳು, ಗೀತೆಯನ್ನು ಪೂರ್ಣ ಅನುಷ್ಠಾನ ಮಾಡುತ್ತಿರುವವರು ಮೋದಿ, ಗೀತೆಯಲ್ಲಿ ಹೇಳಲಾದ ಆತ್ಮನಿರ್ಭರ ತತ್ವವನ್ನು ನರೇಂದ್ರ ಮೋದಿ ದೇಶದಲ್ಲಿ ಜಾರಿಗೆ ತರುತ್ತಿದ್ದಾರೆ. 

ಗೀತೆಯಲ್ಲಿ ಹೇಳಿದಂತೆ ಫಲದ ಅಪೇಕ್ಷೆ ಇಲ್ಲದೆ ಮಾಡುವ ನಿಸ್ವಾರ್ಥ ಸೇವೆಯ ಇನ್ನೊಂದು ಹೆಸರೇ ನರೇಂದ್ರ ಮೋದಿ. ಗೀತೆ ಸತ್ಯಾತ್ಮರ ರಕ್ಷಣೆ ಮಾಡಬೇಕು ಎಂದು ಹೇಳಿದೆ, ಮೋದಿ ರಾಷ್ಟ್ರ ರಕ್ಷಣೆಯ ಮೂಲಕ ಅದನ್ನು ಪಾಲಿಸುತ್ತಿದ್ದಾರೆ ಎಂದು ಹೇಳಿದರು.ನಮ್ಮ ವಿಶ್ವ ಗೀತಾ ಪರ್ಯಾಯದ ಸಂದರ್ಭದಲ್ಲಿ ಕೃಷ್ಣನಿಗೆ ಲಕ್ಷ ಗೀತೆ ಪಾರಾಯಣ ಅರ್ಪಿಸಲು ವಿಶ್ವನಾಯಕನೇ ಬಂದಿದ್ದಾರೆ. ಇಂದ್ರನ ನರವತಾರವೇ ಅರ್ಜುನ, ಆ ಅರ್ಜುನನಿಗೆ ಕೃಷ್ಣ, ಗೀತೆಯನ್ನು ಭೋದಿಸಿದ್ದ. ಇಂದು ಕೃಷ್ಣನಿಗೆ ಗೀತೆಯನ್ನು ಸಮರ್ಪಿಸಲು ನರೇಂದ್ರ ಬಂದಿದ್ದಾರೆ. ಇದು ಕೃಷ್ಣ ಭಕ್ತರಿಗೆ ಮಹಾ ಸಂಭ್ರಮದ ದಿನ ಎಂದು ಶ್ರೀಗಳು ಮೋದಿಯನ್ನು ಅರ್ಜುನನಿಗೆ ಹೋಲಿಸಿದರು.ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣದ ಪ್ರಥಮ ಸಂಕಲ್ಪ ಉಡುಪಿಯಲ್ಲಿಯೇ ಆಗಿತ್ತು. ಇದೀಗ ರಾಮಮಂದಿರದ ನಿರ್ಮಾಣ ಪೂರ್ಣಗೊಳಿಸಿ, ಮೋದಿ ಉಡುಪಿಗೆ ಬಂದಿದ್ದಾರೆ. ಆ ಮೂಲಕ ರಾಮಮಂದಿರ ಕೃಷ್ಣಾರ್ಪಣೆಗೊಳಿಸಿದ್ದಾರೆ ಎಂದು ಶ್ರೀಗಳು ವಿಶ್ಲೇಷಿಸಿದರು. 

ಉಡುಪಿ ಕಾರಿಡಾರ್‌ಗೆ ಪ್ರಧಾನಿಗೆ ಮನವಿ: 

ಭಾರತದಲ್ಲಿ ಸಂಪೂರ್ಣ ಗೋರಕ್ಷಣೆಯ ನೀತಿ ಜಾರಿಗೊಳಿಸಬೇಕು. ವಾರಣಾಸಿ ಕಾರಿಡಾರ್‌ನಂತೆ ಉಡುಪಿ ಕಾರಿಡಾರ್ ನಿರ್ಮಾಣ ಮಾಡಬೇಕು ಎಂದು ಮೋದಿ ಅವರಲ್ಲಿ ಪರ್ಯಾಯ ಪುತ್ತಿಗೆ ಶ್ರೀಗಳು ಆಗ್ರಹಪೂರ್ವಕ ಮನವಿ ಮಾಡಿದರು.ಸುವರ್ಣ ಮಂಟಪ ಉದ್ಘಾಟಿಸಿದ ಮೋದಿ:ಪರ್ಯಾಯ ಪುತ್ತಿಗೆ ಮಠದ ವತಿಯಿಂದ ನಡೆದ ಲಕ್ಷ ಕಂಠ ಗೀತಾ ಪಾರಾಯಣಕ್ಕೆ ಆಗಮಿಸಿದ್ದ ಪ್ರಧಾನಿ ಮೋದಿ ಅವರು ಪುತ್ತಿಗೆ ಶ್ರೀಗಳ ಸಂನ್ಯಾಸದ ಸುವರ್ಣ ವರ್ಷಾಚರಣೆಯ ನೆನಪಿನಲ್ಲಿ ಕೃಷ್ಣಮಠದಲ್ಲಿ ಚಿನ್ನದಿಂದ ಹೊದಿಸಲಾಗಿರುವ ಸುವರ್ಣ ತೀರ್ಥ ಮಂಟಪವನ್ನು ಉದ್ಘಾಟಿಸಿದರು. ಬೆಳಗ್ಗೆ 11.40ರ ಸುಮಾರಿಗೆ ಕೃಷ್ಣಮಠದ ರಥಬೀದಿಗೆ ಬಂದಿಳಿದ ಮೋದಿಗೆ ಮಠದ ಸಂಪ್ರದಾಯದಂತೆ ಮಂಗಳ ವೇದಘೋಷಗಳೊಂದಿಗೆ ಪೂರ್ಣಕುಂಭ ಸ್ವಾಗತ ನೀಡಲಾಯಿತು. 

ಅಲ್ಲಿಂದ ಮೋದಿಯವರು ರಥಬೀದಿಯಲ್ಲಿರುವ ಭಕ್ತ ಕನಕದಾಸನ ಗುಡಿಗೆ ತೆರಳಿ, ಕನಕನವಿಗ್ರಹಕ್ಕೆ ತುಳಸಿಮಾಲೆ ಅರ್ಪಿಸಿ ಕೈಮುಗಿದು ನಮಿಸಿದರು. ನಂತರ, ಅವರನ್ನು ಪರ್ಯಾಯ ಪುತ್ತಿಗೆ ಮಠದ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಮತ್ತು ಶ್ರೀ ಸುಶ್ರೀಂದ್ರ ತೀರ್ಥ ಸ್ವಾಮೀಜಿ ಗೌರವದಿಂದ ಬರ ಮಾಡಿಕೊಂಡರು. ಬಳಿಕ, ಮಾಜಿ ಸಚಿವ ಪ್ರಮೋದ್ ಮಧ್ವರಾಜ್ ಕೊಡುಗೆಯಾಗಿ ಕನಕನ ಕಿಂಡಿಗೆ ಹೊದಿಸಿದ ಚಿನ್ನದ ಕವಚವನ್ನು ಮೋದಿ ಪುಷ್ಪಾರ್ಚನೆಯೊಂದಿಗೆ ಉದ್ಘಾಟಿಸಿದರು. ಅಲ್ಲಿಂದ ಮೋದಿ ಅವರನ್ನು ಕೃಷ್ಣಮಠಕ್ಕೆ ಕರೆದೊಯ್ಯಲಾಯಿತು. ಅಲ್ಲಿ ಮೋದಿಗೆ ಪರ್ಯಾಯ ಶ್ರೀಗಳು ಮಾಲಾರ್ಪಣೆ ಮಾಡಿದರು. 

ಮಠದಲ್ಲಿ ಪ್ರದಕ್ಷಿಣೆಗೈದ ಮೋದಿ, ಕನಕ ನವಗ್ರಹ ಕಿಂಡಿಯ ಮೂಲಕ ಕೃಷ್ಣನನ್ನು ವೀಕ್ಷಿಸಿ, ನಮಸ್ಕರಿಸಿದರು, ನಂತರ ಮುಖ್ಯಪ್ರಾಣ ದೇವರ ದರ್ಶನ ಪಡೆದರು.ಕೃಷ್ಣನ ಮುಂಭಾಗದ ನೂತನ ಸುವರ್ಣತೀರ್ಥ ಮಂಟಪದಲ್ಲಿ ಭಗವದ್ಗೀತೆಗೆ ಪುಷ್ಪನಮನ ಸಲ್ಲಿಸಿ, ಕೃಷ್ಣಾರ್ಪಣ ಮೂಲಕ ಮಂಟಪವನ್ನು ಕೃಷ್ಣನಿಗೆ ಅರ್ಪಿಸಿದರು. ನಂತರ, ಪುತ್ತಿಗೆ ಶ್ರೀಗಳು ಪ್ರಧಾನಿಗೆ ಕೃಷ್ಣನ ಪ್ರಸಾದ ಸಮರ್ಪಿಸಿದರು, ಈ ಸಂದರ್ಭದಲ್ಲಿ ಶ್ರೀಗಳು ಮೋದಿಗೆ ಲೋಹದ ಮುದ್ರೆಗಳನ್ನು ನೀಡಿದ್ದು ವಿಶೇಷವಾಗಿತ್ತು.

ಇದಾದ ಬಳಿಕ, ಮೋದಿ ಚಂದ್ರಶಾಲೆಯಲ್ಲಿ ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥರು, ಸುಬ್ರಹ್ಮಣ್ಯ ಶ್ರೀ ವಿದ್ಯಾಪ್ರಸನ್ನ ತೀರ್ಥರು, ಶಿರೂರು ಶ್ರೀ ವೇದವರ್ಧನ ತೀರ್ಥರನ್ನು ಭೇಟಿಯಾದರು. ನಂತರ, ಗೀತಾಮಂದಿರಕ್ಕೆ ತೆರಳಿ, ಗೋಡೆಯ ಮೇಲೆ ಗೀತೆಯ ಕೆತ್ತನೆ, ಹಸ್ತಪ್ರತಿಗಳ ಸಂಗ್ರಹ ವೀಕ್ಷಿಸಿ, ಅಲ್ಲಿಂದ ಲಕ್ಷ ಕಂಠ ಗೀತಾ ಪಾರಾಯಣ ವೇದಿಕೆಗೆ ಆಗಮಿಸಿದರು.

ಗೋಲ್ಡನ್ ಬುಕ್‌ ಸೇರಿದ ಲಕ್ಷ ಕಂಠ ಪಾರಾಯಣ:ಪರ್ಯಾಯ ಪುತ್ತಿಗೆ ಮಠದ ವತಿಯಿಂದ ನಡೆದ ಲಕ್ಷ ಕಂಠ ಗೀತಾ ಪಾರಾಯಣ ಕಾರ್ಯಕ್ರಮವು ‘ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್‌’ ನಲ್ಲಿ ವಿಶ್ವ ದಾಖಲೆಯಾಗಿ ದಾಖಲಾಗುತ್ತಿದೆ. ಒಂದೇ ಸ್ಥಳದಲ್ಲಿ, ಏಕಕಾಲದಲ್ಲಿ, ಒಂದೇ ಗೀತೆಯನ್ನು, ಅತಿ ಹೆಚ್ಚು ಮಂದಿ ಪಠಿಸಿದ ದಾಖಲೆಯಾಗಿ ಈ ಕಾರ್ಯಕ್ರಮ ದಾಖಲಾಗಿದೆ ಎಂದು ಈ ಗೋಲ್ಡನ್ ಬುಕ್‌ನ ಏಷ್ಯಾ ಹೆಡ್ ಡಾ. ಮನೀಶ್ ವಿಷ್ಣೊಯಿ ತಿಳಿಸಿದ್ದಾರೆ.

 ಈ ಕಾರ್ಯಕ್ರಮದಲ್ಲಿ ಪ್ರಧಾನಿ ಮೋದಿ ಜೊತೆಗೆ ಭಕ್ತರು ಗೀತೆಯ 15ನೇ ಅಧ್ಯಾಯವನ್ನು ಏಕಕಾಲದಲ್ಲಿ, ಒಂದೇ ಸ್ಥಳದಲ್ಲಿ ಪಠಿಸಿದ್ದನ್ನು ದಾಖಲೆಗೆ ಪರಿಗಣಿಸಲಾಗಿದೆ. ಆನ್‌ಲೈನ್‌ನಲ್ಲಿ ಪಾರಾಯಣದಲ್ಲಿ ಭಾಗವಹಿಸಿದ್ದವರು ಲೆಕ್ಕಕ್ಕೆ ಸಿಗುವುದಿಲ್ಲವಾದ್ದರಿಂದ ಅದನ್ನು ಪರಿಗಣಿಸಲಾಗುವುದಿಲ್ಲ ಎಂದು ಹೇಳಿದ್ದಾರೆ. ಶುಕ್ರವಾರ ಸಂಜೆಯೇ ಡಾ.ಮನೀಶ್ ವಿಷ್ಣೊಯಿ ದಾಖಲೆಯ ಪ್ರಮಾಣಪತ್ರವನ್ನು ಶ್ರೀಗಳಿಗೆ ಹಸ್ತಾಂತರಿಸಿದ್ದಾರೆ. ಈ ಸಂದರ್ಭ ಕಾರ್ಯದರ್ಶಿ ಪ್ರಸನ್ನಾಚಾರ್ಯ ಉಪಸ್ಥಿತರಿದ್ದರು. 

ಉಡುಪಿಯಲ್ಲಿ ನಮೋ ಭರ್ಜರಿ ರೋಡ್ ಶೋ:

ಪ್ರಧಾನಿ ನರೇಂದ್ರ ಮೋದಿಯವರು ಇದೇ ಮೊದಲ ಬಾರಿಗೆ ಉಡುಪಿಯಲ್ಲಿ ಶುಕ್ರವಾರ ಬೃಹತ್‌ ರೋಡ್‌ ಶೋ ನಡೆಸಿದರು. ಕೃಷ್ಣಮಠದಲ್ಲಿ ನಡೆದ ಲಕ್ಷ ಕಂಠ ಗೀತಾ ಪಾರಾಯಣ ಕಾರ್ಯಕ್ರಮಕ್ಕೆ ಆಗಮಿಸಿದ ಮೋದಿ, ಉಡುಪಿ ನಗರದ ಮುಖ್ಯರಸ್ತೆಯಲ್ಲಿ ಸುಮಾರು 15 ನಿಮಿಷಗಳ ರೋಡ್ ಶೋ ನಡೆಸಿದರು. ಪ್ರಥಮ ಬಾರಿಗೆ ತಮ್ಮ ಅತ್ಯಾಭಿಮಾನಿ ನಾಯಕನನ್ನು ಕೆಲವೇ ಅಡಿ ಅಂತರದಲ್ಲಿ ಕಂಡು ಕೈಬೀಸಿ ಜೈಕಾರು ಕೂಗಿ ಮೋದಿ ಅಭಿಮಾನಿಗಳು ರೋಮಾಂಚಿತರಾದರು.

11.10ಕ್ಕೆ ಸರಿಯಾಗಿ ಬನ್ನಂಜೆ ನಾರಾಯಣಗುರು ವೃತ್ತದಲ್ಲಿ ಆರಂಭವಾದ ರೋಡ್‌ ಶೋ, ಕಲ್ಸಂಕ ವೃತ್ತದವರೆಗೆ ಸುಮಾರು 1 ಕಿ.ಮೀ. ದೂರ ಸಾಗಿತು. ಮಾರ್ಗದುದ್ದಕ್ಕೂ ತಮ್ಮ ನೆಚ್ಚಿನ ನಾಯಕ ಮೋದಿ ಅವರನ್ನು ಕಣ್ತುಂಬಿಕೊಳ್ಳಲು 50 ಸಾವಿರಕ್ಕೂ ಅಧಿಕ ಮಂದಿ ಕಿಕ್ಕಿರಿದು ನೆರೆದಿದ್ದರು. ದಾರಿಯುದ್ದಕ್ಕೂ ಜನರು ಹಳದಿ, ಕೆಂಪು, ಸೇವಂತಿ, ಗೊಂಡೆ ಹೂವುಗಳನ್ನು ಎಸೆದು ಮೋದಿಗೆ ಪುಷ್ಪಾಭಿಷೇಕವನ್ನೇ ಮಾಡಿಬಿಟ್ಟರು.ಜನರು ಬೆಳಗ್ಗೆ 9 ಗಂಟೆಯಿಂದಲೇ ಬಂದು ಮೋದಿ ಅವರನ್ನು ಹತ್ತಿರದಿಂದ ನೋಡುವ ಆಸೆಯಿಂದ ಆಯಕಟ್ಟಿನ ಸ್ಥಳಗಳಲ್ಲಿ, ನೆತ್ತಿ ಕಾಯಿಸುತ್ತಿದ್ದ ಬಿರು ಬಿಸಿಲಿನಲ್ಲಿಯೂ ಸುಮಾರು 2 ಗಂಟೆ ಕಾಲ ಕಾದು ನಿಂತಿದ್ದರು.

ಮೋದಿ ನಿಧಾನವಾಗಿ ತಮ್ಮೆದುರು ಕಾರಿನಲ್ಲಿ ಸಾಗುತ್ತಿದ್ದಂತೆ, ಬ್ಯಾರಿಕೇಡ್ ಆಚೆ ಕಾದು ನಿಂತಿದ್ದ ಅಭಿಮಾನಿಗಳ ಉತ್ಸಾಹ, ಸಂತೋಷಾತಿರೇಕ ಮೇರೆ ಮೀರಿತ್ತು. ಮೋದಿಯ ಗಮನ ತಮ್ಮೆಡೆಗೆ ಸೆಳೆಯುವುದಕ್ಕಾಗಿ ಕೈಬೀಸುತ್ತಾ ಮೋದಿ ಮೋದಿ ಎಂದು ಘೋಷಣೆ ಹಾಕುತ್ತಿದ್ದರು. ಪೊಲೀಸ್ ಎಸ್ಕಾರ್ಟ್ ಮತ್ತು ಬೆಂಗಾವಲು ವಾಹನಗಳು ಸೇರಿ ಸುಮಾರು 20 ವಾಹನಗಳು 1 ಕಿ.ಮೀ. ರೋಡ್ ಶೋ ಪೂರೈಸಲು ಸುಮಾರು 20 ನಿಮಿಷ ತೆಗೆದುಕೊಂಡವು.

ಬನ್ನಂಜೆ ವೃತ್ತದಲ್ಲಿ ಹಾಕಲಾಗಿದ್ದ ಪುಟ್ಟ ವೇದಿಕೆಯ ಮೇಲೆ ಹತ್ತಾರು ಕೃಷ್ಣ ವೇಷಧಾರಿಗಳು ಮೋದಿ ಅವರನ್ನು ಸ್ವಾಗತಿಸಿದರು. ಮುಂದೆ ಜಯಲಕ್ಷ್ಮೀ ವೃತ್ತದಲ್ಲಿ ಯಕ್ಷಗಾನ ವೇಷಧಾರಿಗಳು ಮತ್ತು ಸಿಟಿ ನಿಲ್ದಾಣದಲ್ಲಿ ಹುಲಿವೇಷಧಾರಿಗಳು ಭರ್ಜರಿಯಾಗಿ ಕುಣಿದು ಮೋದಿಗೆ ಸ್ವಾಗತ ಕೋರಿದರು. ಈ ವೇಷಧಾರಿಗಳತ್ತ ಮೋದಿ ಕೈಬೀಸಿ ಪ್ರತಿವಂದನೆ ಸಲ್ಲಿಸಿದರು.

11.30ಕ್ಕೆ ಕಲ್ಸಂಕ ವೃತ್ತದಲ್ಲಿ ರೋಡ್ ಶೋ ಸಂಪನ್ನಗೊಂಡು, ಮೋದಿ ಕೃಷ್ಣಮಠದ ರಥಬೀದಿಗೆ ತೆರಳಿದರು. ಅಲ್ಲಿ ಪರ್ಯಾಯ ಪುತ್ತಿಗೆ ಮಠದ ವತಿಯಿಂದ ಮೋದಿ ಅವರಿಗೆ ವೇದಘೋಷ ಸಹಿತ ಪೂರ್ಣಕುಂಭ ಸ್ವಾಗತ ನೀಡಲಾಯಿತು. 

ಮೋದಿಯಿಂದ 7 ನಿಮಿಷ ಭಗವದ್ಗೀತೆಯ 10 ಶ್ಲೋಕ ಪಠಣ: 

ಉಡುಪಿ ಪರ್ಯಾಯ ಪುತ್ತಿಗೆ ಮಠದಿಂದ ಆಯೋಜಿಸಲಾದ ‘ಲಕ್ಷ ಕಂಠ ಗೀತಾ ಪಾರಾಯಣ’ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಪ್ರಧಾನಿ ನರೇಂದ್ರ ಮೋದಿ, ಭಗವದ್ಗೀತೆಯ 15ನೇ ಅಧ್ಯಾಯದ ಪುರುಷೋತ್ತಮ ಯೋಗದ 10 ಶ್ಲೋಕಗಳನ್ನು ಪಠಣ ಮಾಡಿದರು.ಪರ್ಯಾಯ ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಶ್ರೀಪಾದರು ಒಂದು ಕೋಟಿಗೂ ಅಧಿಕ ಭಕ್ತರಿಂದ ಭಗವದ್ಗೀತೆ ಲೇಖನ ಅಭಿಯಾನವನ್ನು ನಡೆಸಿದ್ದು, ಅದರ ಕೃಷ್ಣಾರ್ಪಣೆಯಂಗವಾಗಿ ಶುಕ್ರವಾರ ಸಾವಿರಾರು ಭಕ್ತರು ಭಗವದ್ಗೀತೆಯನ್ನು ಏಕಕಾಲದಲ್ಲಿ ಪಠಿಸಿದರು. ಈ ಅಭಿಯಾನದ ಸಮಾರೋಪದಲ್ಲಿ ಪಾಲ್ಗೊಂಡ ಮೋದಿ, ಸುಮಾರು 7 ನಿಮಿಷಗಳ ಕಾಲ ಭಗವದ್ಗೀತೆಯ 15ನೇ ಅಧ್ಯಾಯದ ‘ಪುರುಷೋತ್ತಮ ಯೋಗ’ದ 10 ಶ್ಲೋಕಗಳನ್ನು ಪಠಣ ಮಾಡಿದರು.‘ಪುರುಷೋತ್ತಮ ಯೋಗ’ಎಂದರೆ ‘ಪರಮಾತ್ಮನ ಯೋಗ’ ಎಂದರ್ಥ. ಈ ಅಧ್ಯಾಯವು ಪರಮಾತ್ಮನ ಶ್ರೇಷ್ಠ ಸ್ವರೂಪವನ್ನು ವಿವರಿಸುತ್ತದೆ. ಭಗವಂತ ವಿಶ್ವದ ಸರ್ವೋಚ್ಚ ಶಕ್ತಿ. ಎಲ್ಲವನ್ನೂ ವ್ಯಾಪಿಸಿರುವ ಮತ್ತು ನಿರ್ವಹಿಸುವ ಶಕ್ತಿಯ ಸ್ವರೂಪ, ನಾಶವಾಗುವ ಮತ್ತು ನಾಶವಾಗದ ವಸ್ತುಗಳಿಗಿಂತ ಈ ಶಕ್ತಿ ಶ್ರೇಷ್ಠ ಎಂದು ಈ ಅಧ್ಯಾಯದಲ್ಲಿ ವಿವರಿಸಲಾಗಿದೆ. ಈ ಅಧ್ಯಾಯದ ಪಠಣದಿಂದ ಜ್ಞಾನ ಪಡೆದು, ಬುದ್ಧಿವಂತನಾಗಿ ವ್ಯಕ್ತಿ ತನ್ನ ಕರ್ತವ್ಯ ಪೂರೈಸಬಹುದು ಎಂದು ವಿವರಿಸಲಾಗಿದೆ.

ಈ ಅಧ್ಯಾಯದಲ್ಲಿ ಶ್ರೀಕೃಷ್ಣ, ಸಂಸಾರರೂಪ ‘ಅಶ್ವತ್ಥ ವೃಕ್ಷ’, ಜೀವ–ಪರಮಾತ್ಮರ ಸ್ವಭಾವ, ಮತ್ತು ಪುರುಷೋತ್ತಮನ ಮಹಿಮೆಗಳನ್ನು ವಿವರಿಸಿದ್ದಾನೆ. ದೇಹದಲ್ಲಿರುವ ಜೀವಾತ್ಮ, ಪರಮಾತ್ಮನ ಅಂಶ ಎಂದಿರುವ ಕೃಷ್ಣ ಈ ಸಂಸಾರವನ್ನು ಶಾಖೆ-ಮೂಲಗಳಿಂದ ಕೂಡಿದ ಅಶ್ವತ್ಥ ವೃಕ್ಷಕ್ಕೆ ಹೋಲಿಸಿದ್ದಾನೆ. ಇದರ ಮೂಲ ಬ್ರಹ್ಮ, ಶಾಖೆಗಳು ಲೋಕಗಳು, ಕೊಂಬೆಗಳು ಇಂದ್ರಿಯಗಳು, ಎಲೆಗಳು ವೇದಮಂತ್ರಗಳು. ಆಸಕ್ತಿ, ಮೋಹ, ಅಹಂಕಾರಗಳ ಗಟ್ಟಿ ಬೇರುಗಳನ್ನು ವೈರಾಗ್ಯ-ರೂಪವಾದಾಸ್ತ್ರದಿಂದ ಕಡಿಯಬೇಕು. ಇಂತಹ ವೈರಾಗ್ಯವಂತರಿಗೆ ಪರಮೇಶ್ವರನ ಧಾಮ ಲಭ್ಯ ಎಂದು ಈ ಅಧ್ಯಾಯದಲ್ಲಿ ವಿವರಿಸಲಾಗಿದೆ. 

ಗಣ್ಯರು ಭಾಗಿ: 

ಪುತ್ತಿಗೆ ಸುಗುಣೇಂದ್ರ ತೀರ್ಥ ಸ್ವಾಮೀಜಿ, ಧರ್ಮಸ್ಥಳ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ, ಬಿಜೆಪಿ ರಾಜ್ಯಾಧ್ಯಕ್ಷ ವಿಜಯೇಂದ್ರ, ರಾಜ್ಯಪಾಲ ಥಾವರ್ ಚಂದ್ ಗೆಹಲೋತ್‌, ಕೇಂದ್ರ ಸಚಿವ ಪ್ರಲ್ಹಾದ್‌ ಜೋಶಿ, ಉಡುಪಿ ಸಂಸದ ಕೋಟ ಶ್ರೀನಿವಾಸ ಪೂಜಾರಿ, ಶಿವಮೊಗ್ಗ ಸಂಸದ ರಾಘವೇಂದ್ರ, ಶಾಸಕರಾದ ಸುನೀಲ್ ಕುಮಾರ್, ಯಶ್‌ಪಾಲ್ ಸುವರ್ಣ ಸೇರಿ ಹಲವು ಗಣ್ಯರು ಅಭಿಯಾನದಲ್ಲಿ ಭಾಗಿಯಾಗಿದ್ದರು.