ಡಿಜೆ ಸೌಂಡ್ ಅಬ್ಬರ ತಣ್ಣಗಾಗಿಸಿದ ರಾಷ್ಟ್ರಗೀತೆ!
)
ಸಾರಾಂಶ
ಜಿಲ್ಲಾ ಕೇಂದ್ರದ ಅತಿ ಸೂಕ್ಷ್ಮ ಪ್ರದೇಶಗಳಲ್ಲಿ ಶ್ರೀ ದುರ್ಗಾ ಮಾತೆಯ ದಸರಾ ಶೋಭಾಯಾತ್ರೆ ಸಾಗುತ್ತಿದ್ದ ವೇಳೆ ಕೆಲ ಆಯ್ದ ಸ್ಥಳಗಳಲ್ಲಿ ಪೊಲೀಸ್ ಇಲಾಖೆ ವ್ಯಾಪಕ ಬಂದೋಬಸ್ತ್ ಕಲ್ಪಿಸಿತ್ತು. ಹಾಸಬಾವಿ ವೃತ್ತದ ಬಳಿ ಇರುವ ಮಸೀದಿ ಪೊಲೀಸ್ ಭದ್ರತೆ ಕಲ್ಪಿಸಲಾಗಿತ್ತು. ಯಾವುದೇ ಅಹಿತಕರ ಘಟನೆಗಳಿಗೆ ಆಸ್ಪದ ನೀಡದಂತೆ ಇಲಾಖೆ ಎಲ್ಲ ಅಗತ್ಯ ಮುನ್ನೆಚ್ಚರಿಕೆ ವಹಿಸಿತ್ತು.
- ಹಾಸಬಾವಿ ವೃತ್ತದಲ್ಲಿ ಬನಾಯೇಂಗೆ ಮಂದಿರ್ ಹಾಡು ಹಾಕಲು ಪೊಲೀಸರ ಆಕ್ಷೇಪ
ಕನ್ನಡಪ್ರಭ ವಾರ್ತೆ ದಾವಣಗರೆ
ಜಿಲ್ಲಾ ಕೇಂದ್ರದ ಅತಿ ಸೂಕ್ಷ್ಮ ಪ್ರದೇಶಗಳಲ್ಲಿ ಶ್ರೀ ದುರ್ಗಾ ಮಾತೆಯ ದಸರಾ ಶೋಭಾಯಾತ್ರೆ ಸಾಗುತ್ತಿದ್ದ ವೇಳೆ ಕೆಲ ಆಯ್ದ ಸ್ಥಳಗಳಲ್ಲಿ ಪೊಲೀಸ್ ಇಲಾಖೆ ವ್ಯಾಪಕ ಬಂದೋಬಸ್ತ್ ಕಲ್ಪಿಸಿತ್ತು. ಹಾಸಬಾವಿ ವೃತ್ತದ ಬಳಿ ಇರುವ ಮಸೀದಿ ಪೊಲೀಸ್ ಭದ್ರತೆ ಕಲ್ಪಿಸಲಾಗಿತ್ತು. ಯಾವುದೇ ಅಹಿತಕರ ಘಟನೆಗಳಿಗೆ ಆಸ್ಪದ ನೀಡದಂತೆ ಇಲಾಖೆ ಎಲ್ಲ ಅಗತ್ಯ ಮುನ್ನೆಚ್ಚರಿಕೆ ವಹಿಸಿತ್ತು.ದಸರಾ ಶೋಭಾಯಾತ್ರೆಗೆ ಡಿಜೆ ಸೌಂಡ್ ಸಿಸ್ಟಂಗೆ ಅನುಮತಿ ನೀಡಿದ್ದರೆ, ಅದೇ ಡಿಜೆ ಸೌಂಡ್ ಸದ್ದಿಗೆ ಸ್ವತಃ ಮೆರವಣಿಗೆಯಲ್ಲಿದ್ದವರೇ ರೋಸಿ ಹೋಗಿದ್ದರು. ಇನ್ನು ಮೆರವಣಿಗೆ ಸಾಗುತ್ತಿದ್ದ ಹಾದಿಯುದ್ದಕ್ಕೂ ಜನರು ಕಿವಿಗಳನ್ನು ಮುಚ್ಚಿಕೊಂಡಿದ್ದರೆ, ಮಕ್ಕಳು, ವೃದ್ಧರು, ಗರ್ಭಿಣಿ, ಬಾಣಂತಿಯರು ಡಿಜೆ ಸೌಂಡ್ ಸಿಸ್ಟಂ ಸದ್ದು ಕಡಿಮೆ ಆಗುವವರೆಗೂ ಇನ್ನಿಲ್ಲದ ಯಾತನೆ ಅನುಭವಿಸಬೇಕಾಯಿತು. ಗಂಟೆಗಟ್ಟಲೇ ಮೆರವಣಿಗೆಯಲ್ಲಿ ಭದ್ರತೆ ಕಲ್ಪಿಸಿದ್ದ ಪೊಲೀಸ್ ಅಧಿಕಾರಿ, ಸಿಬ್ಬಂದಿಯಂತೂ ಕಿವಿಗಳನ್ನು ಮುಚ್ಚಿಕೊಂಡು ಕಾರ್ಯನಿರ್ವಹಿಸಿದರು.
ಬನಾಯೇಂಗೇ ಮಂದಿರ್ ಹಾಡಿನ ವಿಚಾರದಲ್ಲಿ ಪೊಲೀಸ್ ಅಧಿಕಾರಿ, ಸಿಬ್ಬಂದಿ ಹಾಗೂ ಹಿಂದೂ ಕಾರ್ಯಕರ್ತರ ಮಧ್ಯೆ ವಾಗ್ವಾದ ನಡೆದು, ಎಲ್ಲವೂ ತಣ್ಣಗಾಯಿತು ಎನ್ನುವಷ್ಟರಲ್ಲಿಯೇ ಶೋಭಾಯಾತ್ರೆ ಅಲ್ಪಸಂಖ್ಯಾತರು ಹೆಚ್ಚಾಗಿ ವಾಸಿಸುತ್ತಿರುವ ಪ್ರದೇಶಕ್ಕೆ ಬರುತ್ತಿದ್ದಂತೆ ಮತ್ತೆ ಡಿಜೆ ಸೌಂಡ್ ಸದ್ದು ಹೆಚ್ಚಾಯಿತು. ಆಗ ಬುದ್ಧಿವಂತಿಕೆ ಪ್ರದರ್ಶಿಸಿದ ಪೊಲೀಸರು ಡಿಜೆಯಲ್ಲಿ ಏಕಾಏಕಿ ರಾಷ್ಟ್ರಗೀತೆ ಜನಗಣಮನ ಹಾಕಿಸಿದರು. ಇಡೀ ಮೆರವಣಿಗೆಯಲ್ಲಿದ್ದ ಅಬ್ಬರ, ಗದ್ದಲ ಕ್ಷಣ ಮಾತ್ರದಲ್ಲಿ ಮೌನಕ್ಕೆ ಶರಣಾಯಿತು. ಹಾಸಬಾವಿ ವೃತ್ತದಲ್ಲಿ ರಾಷ್ಟ್ರಗೀತೆ ಹಾಕಿಸಿದ ಪೊಲೀಸರು ಗಲಾಟೆ, ಗದ್ದಲ ತಡೆದರಲ್ಲದೇ, ಎಲ್ಲರೂ ಎದ್ದು ನಿಂತು ರಾಷ್ಟ್ರಗೀತೆ ಹಾಡುವಂತೆ ಹಾಗೂ ಕೇಳುವಂತೆ ಮಾಡಿದರು. ಅನಂತರ ವಾತಾವರಣ ತಿಳಿಗೊಂಡು, ರಾಷ್ಟ್ರಗೀತೆ ಮುಗಿಯುತ್ತಿದ್ದಂತೆಯೇ ಶೋಭಾಯಾತ್ರೆ ಮುಂದೆ ಸಾಗಿತು.