ಕೌಶಲ್ಯ ಅಭಿವೃದ್ಧಿಗೆ ಸುದ್ದಿಪತ್ರ ಉತ್ತಮ ಸಾಧನ: ಡಾ.ಜಿ. ಪರಮೇಶ್ವರ್
ಸಾರಾಂಶ
ಇಂದಿನ ಕಾಲಘಟ್ಟದ ಡಿಜಿಟಲ್ ಸುದ್ದಿಪತ್ರಗಳು (ನ್ಯೂಸ್ ಲೆಟರ್) ಅತ್ಯಂತ ಪರಿಣಾಮಕಾರಿಯಾದ ಸಂವಹನ ಮಾಡುವುದರ ಮೂಲಕ ಹೆಚ್ಚಿನ ಸಂಖ್ಯೆಯ ಬಳಕೆದಾರರನ್ನು ಪರಸ್ಪರ ಸಂವಹನದಲ್ಲಿ ತೊಡಗಿಸಿಕೊಳ್ಳುತ್ತವೆ ಎಂದು ಸಾಹೇ ವಿಶ್ವವಿದ್ಯಾನಿಲಯದ ಕುಲಾಧಿಪತಿ ಡಾ.ಜಿ. ಪರಮೇಶ್ವರ ಅಭಿಪ್ರಾಯಪಟ್ಟರು.
ಕನ್ನಡಪ್ರಭ ವಾರ್ತೆ ತುಮಕೂರು
ನಗರದ ಶ್ರೀ ಸಿದ್ದಾರ್ಥ ತಾಂತ್ರಿಕ ಮಹಾವಿದ್ಯಾಲಯದ ಆವರಣದಲ್ಲಿ ಏರ್ಪಡಿಸಲಾಗಿದ್ದ ಸಾಹೇ ವಿಶ್ವವಿದ್ಯಾಲಯದ ವಾಯ್ಸ್ ಆಫ್ ಸಾಹೇ ನ್ಯೂಸ್ ಲೆಟರ್ ಬಿಡುಗಡೆ ಮಾಡಿ ಮಾತನಾಡಿದ ಅವರು, ಸುದ್ದಿಪತ್ರಗಳನ್ನು ಹೊರತರುವುದರಿಂದ ವಿದ್ಯಾರ್ಥಿಗಳು ಮತ್ತು ಪ್ರಾಧ್ಯಾಪಕರ ನಡುವಿನ ಸಂವಹನ ಸುಧಾರಣೆ ಅವಕಾಶ ಸಿಗುತ್ತದೆ. ಪ್ರಮುಖ ಘಟನೆಗಳು ಮತ್ತು ಪ್ರಸ್ತುತ ಬೆಳವಣಿಗಳ ಅರಿವು ಉಂಟಾಗುತ್ತದೆ ಎಂದರು.
ಜವಾಬ್ದಾರಿಯುತ ಅಭಿವ್ಯಕ್ತಿ, ಆಲೋಚನೆಗಳು, ಸವಾಲುಗಳನ್ನು ಸ್ವೀಕರಿಸುವ ಗುಣ, ಪ್ರಭಾವ ಮತ್ತು ಹೆಚ್ಚಿನದನ್ನು ಮಾಡುವುದಕ್ಕೆ ಕ್ಯಾಂಪಸ್ ಸುದ್ದಿಪತ್ರಗಳು ಪರಿಪೂರ್ಣ ಮಾಧ್ಯಮವಾಗಿದೆ. ಈ ಡಿಜಿಟಲ್ ಯುಗದಲ್ಲಿ ನಮಗೆ ಲಭ್ಯವಿರುವ ಹಲವು ಸಂವಹನ ಮಾರ್ಗಗಳೊಂದಿಗೆ ಬೆಸದುಕೊಳ್ಳಲು ಸಹಕಾರಿಯಾಗುತ್ತವೆ ಎಂದು ಹೇಳಿದರು.ಕ್ಯಾಂಪಸ್ ಸುದ್ದಿಪತ್ರವು ವಿದ್ಯಾರ್ಥಿಗಳಿಗೆ ಮತ್ತು ಪ್ರಾಧ್ಯಾಪಕ ವರ್ಗಕ್ಕೆ ಗುರಿಯನ್ನು ಸಾಧಿಸಲು ಜ್ಞಾನ ವೃದ್ಧಿಸಿಕೊಳ್ಳಲುಸಿಗುವ ಮೌಲ್ಯಯುತ ಸಾಧನವೆಂದು ಹೇಳಬಹುದು. ವಿದ್ಯಾರ್ಥಿಗಳು ಅಮೂಲ್ಯವಾದ ಕೌಶಲ್ಯಗಳನ್ನು ಅಂದರೆ ಬರವಣಿಗೆ, ಸಂಪಾದನೆ, ವಿನ್ಯಾಸ, ಛಾಯಾಗ್ರಹಣದಂತ ಕಲಾತ್ಮಕ ಕಲೆಗಳನ್ನು ಕಲಿಯುತ್ತಾರೆ. ಈ ಕೌಶಲ್ಯಗಳನ್ನು ಅಳವಡಿಸಿಕೊಳ್ಳಲು ಅಥವಾ ಈ ಕೌಶಲ್ಯಗಳನ್ನು ಪರಿಷ್ಕರಿಸಲು ನ್ಯೂಸ್ಲೆಟರ್ಗಳು ಪ್ರಭಾವಿ ಸಾಧನವಾಗಿದೆ ಎಂದು ಹೇಳಿದರು.
ಸಾಹೆ ವಿಶ್ವವಿದ್ಯಾಲಯದ ಉಪಕುಲಪತಿ ಡಾ.ಕೆ.ಬಿ. ಲಿಂಗೇಗೌಡ ಮಾತನಾಡಿ, ಸುದ್ದಿಪತ್ರವು ಅಧ್ಯಯನ ಮಾಡಲು ಮತ್ತು ಇತರ ಪಠ್ಯೇತರ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವಿಕೆಯನ್ನು ಉತ್ತೇಜಿಸುತ್ತದೆ. ಸಮುದಾಯದೊಂದಿಗೆ ಕೆಲಸ ಮಾಡುವ ಅನುಭವವು ವಿದ್ಯಾರ್ಥಿಗಳಿಗೆ ಸಿಗುತ್ತದೆ. ಅವರ ಸಾಮಾಜಿಕ ಮತ್ತು ಜನರ ಕೌಶಲ್ಯಗಳೊಂದಿಗೆ ಸಹಾಯ ಮಾಡಲು ಸಹಕಾರಿಯಾಗಿರುತ್ತವೆ ಎಂದರು.
ಕಾರ್ಯಕ್ರಮದಲ್ಲಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಶೋಕ್ ಕೆ.ವಿ., ಸಾಹೇ ವಿಶ್ವವಿದ್ಯಾಲಯದ ಕುಲಾಧಿಪತಿಗಳ ಸಲಹೆಗಾರ ಡಾ. ವಿವೇಕ್ ವೀರಯ್ಯ, ಪರೀಕ್ಷಾಂಗ ವಿಭಾಗದ ನಿಯಂತ್ರಕ ಡಾ.ಜಿ. ಗುರುಶಂಕರ್, ವಾಯ್ಸ್ಆಫ್ ಸಾಹೇ ನ್ಯೂಸ್ಲೆಟರ್ನ ಸಂಪಾದಕಿ ಡಾ.ಸವಿತಾ ರಾಣಿ, ಸಹಾಯಕ ಕುಲಸಚಿವ ಡಾ. ಪ್ರಕಾಶ್ ಮೊದಲಾದವರು ಹಾಜರಿದ್ದರು.