ಕೌಶಲ್ಯ ಅಭಿವೃದ್ಧಿಗೆ ಸುದ್ದಿಪತ್ರ ಉತ್ತಮ ಸಾಧನ: ಡಾ.ಜಿ. ಪರಮೇಶ್ವರ್‌

ಕನ್ನಡಪ್ರಭ ವಾರ್ತೆ ತುಮಕೂರು

ವಿದ್ಯಾರ್ಥಿಗಳ ಸೃಜನಶೀಲತೆ, ಆಲೋಚನೆಗಳು ಮತ್ತು ವಿಮರ್ಶಾತ್ಮಕ ಚಿಂತನೆಯ ಕೌಶಲ್ಯವನ್ನು ಅಭಿವೃದ್ಧಿ ಪಡಿಸಲು ಸುದ್ದಿಪತ್ರಗಳು ಅತ್ಯಂತ ಮಹತ್ವ ಪಾತ್ರ ವಹಿಸುತ್ತವೆ. ಇಂದಿನ ಕಾಲಘಟ್ಟದ ಡಿಜಿಟಲ್ ಸುದ್ದಿಪತ್ರಗಳು (ನ್ಯೂಸ್ ಲೆಟರ್‌) ಅತ್ಯಂತ ಪರಿಣಾಮಕಾರಿಯಾದ ಸಂವಹನ ಮಾಡುವುದರ ಮೂಲಕ ಹೆಚ್ಚಿನ ಸಂಖ್ಯೆಯ ಬಳಕೆದಾರರನ್ನು ಪರಸ್ಪರ ಸಂವಹನದಲ್ಲಿ ತೊಡಗಿಸಿಕೊಳ್ಳುತ್ತವೆ ಎಂದು ಸಾಹೇ ವಿಶ್ವವಿದ್ಯಾನಿಲಯದ ಕುಲಾಧಿಪತಿ ಡಾ.ಜಿ. ಪರಮೇಶ್ವರ ಅಭಿಪ್ರಾಯಪಟ್ಟರು.

ನಗರದ ಶ್ರೀ ಸಿದ್ದಾರ್ಥ ತಾಂತ್ರಿಕ ಮಹಾವಿದ್ಯಾಲಯದ ಆವರಣದಲ್ಲಿ ಏರ್ಪಡಿಸಲಾಗಿದ್ದ ಸಾಹೇ ವಿಶ್ವವಿದ್ಯಾಲಯದ ವಾಯ್ಸ್‌ ಆಫ್ ಸಾಹೇ ನ್ಯೂಸ್ ಲೆಟರ್‌ ಬಿಡುಗಡೆ ಮಾಡಿ ಮಾತನಾಡಿದ ಅವರು, ಸುದ್ದಿಪತ್ರಗಳನ್ನು ಹೊರತರುವುದರಿಂದ ವಿದ್ಯಾರ್ಥಿಗಳು ಮತ್ತು ಪ್ರಾಧ್ಯಾಪಕರ ನಡುವಿನ ಸಂವಹನ ಸುಧಾರಣೆ ಅವಕಾಶ ಸಿಗುತ್ತದೆ. ಪ್ರಮುಖ ಘಟನೆಗಳು ಮತ್ತು ಪ್ರಸ್ತುತ ಬೆಳವಣಿಗಳ ಅರಿವು ಉಂಟಾಗುತ್ತದೆ ಎಂದರು.

ಜವಾಬ್ದಾರಿಯುತ ಅಭಿವ್ಯಕ್ತಿ, ಆಲೋಚನೆಗಳು, ಸವಾಲುಗಳನ್ನು ಸ್ವೀಕರಿಸುವ ಗುಣ, ಪ್ರಭಾವ ಮತ್ತು ಹೆಚ್ಚಿನದನ್ನು ಮಾಡುವುದಕ್ಕೆ ಕ್ಯಾಂಪಸ್ ಸುದ್ದಿಪತ್ರಗಳು ಪರಿಪೂರ್ಣ ಮಾಧ್ಯಮವಾಗಿದೆ. ಈ ಡಿಜಿಟಲ್‌ ಯುಗದಲ್ಲಿ ನಮಗೆ ಲಭ್ಯವಿರುವ ಹಲವು ಸಂವಹನ ಮಾರ್ಗಗಳೊಂದಿಗೆ ಬೆಸದುಕೊಳ್ಳಲು ಸಹಕಾರಿಯಾಗುತ್ತವೆ ಎಂದು ಹೇಳಿದರು.

ಕ್ಯಾಂಪಸ್ ಸುದ್ದಿಪತ್ರವು ವಿದ್ಯಾರ್ಥಿಗಳಿಗೆ ಮತ್ತು ಪ್ರಾಧ್ಯಾಪಕ ವರ್ಗಕ್ಕೆ ಗುರಿಯನ್ನು ಸಾಧಿಸಲು ಜ್ಞಾನ ವೃದ್ಧಿಸಿಕೊಳ್ಳಲುಸಿಗುವ ಮೌಲ್ಯಯುತ ಸಾಧನವೆಂದು ಹೇಳಬಹುದು. ವಿದ್ಯಾರ್ಥಿಗಳು ಅಮೂಲ್ಯವಾದ ಕೌಶಲ್ಯಗಳನ್ನು ಅಂದರೆ ಬರವಣಿಗೆ, ಸಂಪಾದನೆ, ವಿನ್ಯಾಸ, ಛಾಯಾಗ್ರಹಣದಂತ ಕಲಾತ್ಮಕ ಕಲೆಗಳನ್ನು ಕಲಿಯುತ್ತಾರೆ. ಈ ಕೌಶಲ್ಯಗಳನ್ನು ಅಳವಡಿಸಿಕೊಳ್ಳಲು ಅಥವಾ ಈ ಕೌಶಲ್ಯಗಳನ್ನು ಪರಿಷ್ಕರಿಸಲು ನ್ಯೂಸ್‌ಲೆಟರ್‌ಗಳು ಪ್ರಭಾವಿ ಸಾಧನವಾಗಿದೆ ಎಂದು ಹೇಳಿದರು.

ಸುದ್ದಿಪತ್ರದಲ್ಲಿ ಕೆಲಸ ಮಾಡುವ ವಿದ್ಯಾರ್ಥಿಗಳು ನಿರ್ವಹಣೆ, ಗಡುವಿನ ಜೊತೆ ಕೆಲಸ ಮಾಡುವುದು, ಮತ್ತು ಇತರರೊಂದಿಗೆ ಉತ್ತಮವಾಗಿ ಸಂವಹನ ಮಾಡುವುದು ಸೇರಿದಂತೆ ಕಾರ್ಯಕ್ಷೇತ್ರ ಕೌಶಲ್ಯಗಳನ್ನು ಕಲಿಯುತ್ತಾರೆ. ವಿವಿಧ ವಿಷಯಗಳ ಕುರಿತು ಲೇಖನಗಳನ್ನು ಬರೆಯುವುದು ಮತ್ತು ಸಂಶೋಧಿಸುವುದು, ವಿದ್ಯಾರ್ಥಿಗಳಿಗೆ ಪದವಿಯ ನಂತರ ಅವರು ಏನು ಮಾಡಲು ಬಯಸುತ್ತಾರೆ ಎಂಬ ಕಲ್ಪನೆಯನ್ನು ನೀಡುತ್ತದೆ. ವೃತ್ತಿಪರರೊಂದಿಗಿನ ಸಂದರ್ಶನಗಳು ವಿದ್ಯಾರ್ಥಿಗಳಿಗೆ ಲಭ್ಯವಿರುವ ವೃತ್ತಿ ಮಾರ್ಗಗಳ ವಿಶಾಲ ವ್ಯಾಪ್ತಿಯ ಒಳನೋಟವನ್ನು ನೀಡುತ್ತದೆ ಎಂದು ವ್ಯಾಖ್ಯಾನಿಸಿದರು.

ಸಾಹೆ ವಿಶ್ವವಿದ್ಯಾಲಯದ ಉಪಕುಲಪತಿ ಡಾ.ಕೆ.ಬಿ. ಲಿಂಗೇಗೌಡ ಮಾತನಾಡಿ, ಸುದ್ದಿಪತ್ರವು ಅಧ್ಯಯನ ಮಾಡಲು ಮತ್ತು ಇತರ ಪಠ್ಯೇತರ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವಿಕೆಯನ್ನು ಉತ್ತೇಜಿಸುತ್ತದೆ. ಸಮುದಾಯದೊಂದಿಗೆ ಕೆಲಸ ಮಾಡುವ ಅನುಭವವು ವಿದ್ಯಾರ್ಥಿಗಳಿಗೆ ಸಿಗುತ್ತದೆ. ಅವರ ಸಾಮಾಜಿಕ ಮತ್ತು ಜನರ ಕೌಶಲ್ಯಗಳೊಂದಿಗೆ ಸಹಾಯ ಮಾಡಲು ಸಹಕಾರಿಯಾಗಿರುತ್ತವೆ ಎಂದರು.

ಸಾಹೆ ವಿಶ್ವವಿದ್ಯಾಲಯದ ಕುಲಸಚಿವ ಡಾ.ಎಂ.ಝಡ್. ಕುರಿಯನ್ ಮಾತನಾಡಿ, ಸುದ್ದಿಪತ್ರಗಳನ್ನು ಸಾಧನೆಗಳು ಮತ್ತು ಯಶಸ್ಸನ್ನು ಹಂಚಿಕೊಳ್ಳಲು ಬಳಸಬಹುದು. ಆಮೂಲಕ ಸಮುದಾಯದ ಪ್ರಜ್ಞೆಯನ್ನು ಬೆಳೆಸಲು ಸಹಾಯ ಮಾಡುತ್ತದೆ. ಪ್ರಾಧ್ಯಾಪಕರು ಮತ್ತು ವಿದ್ಯಾರ್ಥಿಗಳು ಪ್ರಮುಖ ವಿಷಯಗಳು ಕುರಿತು ಆಲೋಚನೆಗಳು ಮತ್ತು ಪ್ರತಿಕ್ರಿಯೆಯನ್ನು ಹಂಚಿಕೊಳ್ಳಲು ಅವಕಾಶ ಮತ್ತು ವೇದಿಕೆಯಾಗಿರುತ್ತವೆ ಎಂದರು.

ಕಾರ್ಯಕ್ರಮದಲ್ಲಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಶೋಕ್‌ ಕೆ.ವಿ., ಸಾಹೇ ವಿಶ್ವವಿದ್ಯಾಲಯದ ಕುಲಾಧಿಪತಿಗಳ ಸಲಹೆಗಾರ ಡಾ. ವಿವೇಕ್ ವೀರಯ್ಯ, ಪರೀಕ್ಷಾಂಗ ವಿಭಾಗದ ನಿಯಂತ್ರಕ ಡಾ.ಜಿ. ಗುರುಶಂಕರ್‌, ವಾಯ್ಸ್‌ಆಫ್ ಸಾಹೇ ನ್ಯೂಸ್‌ಲೆಟರ್‌ನ ಸಂಪಾದಕಿ ಡಾ.ಸವಿತಾ ರಾಣಿ, ಸಹಾಯಕ ಕುಲಸಚಿವ ಡಾ. ಪ್ರಕಾಶ್ ಮೊದಲಾದವರು ಹಾಜರಿದ್ದರು.