ಅಂತಾರಾಷ್ಟ್ರೀಯ ಬೌದ್ಧ ತ್ರಿಪಿಟಕ ಪಾಲಿ ಪಠಣ

ಕನ್ನಡಪ್ರಭ ವಾರ್ತೆ ಮೈಸೂರು

ಅಂತಾರಾಷ್ಟ್ರೀಯ ಬೌದ್ಧ ತ್ರಿಪಿಟಕ ಪಾಲಿ ಪಠಣ ಕಾರ್ಯಕ್ರಮವನ್ನು ನಗರದ ಮಹಾಬೋಧಿ ಶಾಲೆಯಲ್ಲಿ ಇತ್ತೀಚೆಗೆ ನಡೆಸಲಾಯಿತು.

ಈ ಕಾರ್ಯಕ್ರಮದಲ್ಲಿ 10 ದೇಶಗಳ 120 ಬೌದ್ಧ ಸನ್ಯಾಸಿಗಳು ಬುದ್ಧನ ಪವಿತ್ರ ಬೋಧನೆಗಳಾದ ತ್ರಿಪಿಟಕವನ್ನು ಪಠಿಸಿದರು.

ಮಹಾಬೋಧಿ ಶಾಲೆಯ ಕಾರ್ಯನಿರ್ವಾಹಕ ಅಧಿಕಾರಿ ವಾಂಗ್ಡಸ್ ಜ್ಯೋತಿ ಮಾತನಾಡಿ, ತ್ರಿಪಿಟಕ ಪಠಣವು 2600 ವರ್ಷಗಳಷ್ಟು ಹಿಂದಿನ ಬುದ್ಧನ ಕಾಲದ ಸಂಪ್ರದಾಯವಾಗಿದೆ. ಭಾರತದಲ್ಲಿ ಈ ಪವಿತ್ರ ಆಚರಣೆಯನ್ನು ವೀಕ್ಷಿಸಲು ಮತ್ತು ಮುಂದುವರಿಸಲು ನಾವು ಅದೃಷ್ಟಶಾಲಿಗಳಾಗಿದ್ದೇವೆ ಎಂದು ತಿಳಿಸಿದರು. ಡಿಸೆಂಬರ್ 2 ರಂದು ಬೋಧಗಯಾದಲ್ಲಿ ತ್ರಿಪಿಟಕ ಪಾಲಿ ಪಠಣ ಪ್ರಾರಂಭವಾಯಿತು. ಉತ್ತರ ಭಾರತದ ವಿವಿಧ ಪ್ರದೇಶಗಳಲ್ಲಿ ಪಠಣವನ್ನು ಪೂರ್ಣಗೊಳಿಸಿದ ನಂತರ, ಸನ್ಯಾಸಿಗಳು ಮತ್ತು ಭಕ್ತರು ಫೆ.14ರಂದು ಮೈಸೂರಿಗೆ ಆಗಮಿಸಿದರು. ಬೆಂಗಳೂರಿನ ಮಹಾ ಬೋಧಿ ಸೊಸೈಟಿಯ ಸಹಯೋಗದೊಂದಿಗೆ ಮಹಾಬೋಧಿ ಶಾಲೆ ಕಾರ್ಯಕ್ರಮವನ್ನು ಆಯೋಜಿಸಿತ್ತು.