ಅಂತೂ ಈಡಿಗ- ಬಿಲ್ಲವ ಉಪ ಜಾತಿಗಳ ಕುಲಶಾಸ್ತ್ರೀಯ ಅಧ್ಯಯನ ಆರಂಭ

ಬಿ. ಶೇಖರ್‌ ಗೋಪಿನಾಥಂ

ಕನ್ನಡಪ್ರಭ ವಾರ್ತೆ ಮೈಸೂರು

ತಾಂತ್ರಿಕ ಕಾರಣಗಳಿಂದ ವಿಳಂಬವಾಗಿದ್ದ ಈಡಿಗ- ಬಿಲ್ಲವ ಮತ್ತು ಅದರ ಉಪ ಜಾತಿಗಳ ಕುಲಶಾಸ್ತ್ರೀಯ ಅಧ್ಯಯನವನ್ನು ಮೈಸೂರು ವಿಶ್ವವಿದ್ಯಾನಿಲಯವು ಆರಂಭಿಸಿದೆ.

ರಾಜ್ಯ ಸರ್ಕಾರದ ಡಿ. ದೇವರಾಜ ಅರಸು ಸಂಶೋಧನಾ ಸಂಸ್ಥೆ ಪ್ರಾಯೋಜಕತ್ವದಲ್ಲಿ ಮೈಸೂರು ವಿವಿ ಸಾಮಾಜಿಕ ಒಳಗೊಳ್ಳುವಿಕೆ ಅಧ್ಯಯನ ಕೇಂದ್ರವು (ಸಿಎಸ್‌ಎಸ್‌ಐ) ಈ ಕುಲಶಾಸ್ತ್ರೀಯ ಅಧ್ಯಯನವನ್ನು ಕೈಗೊಂಡಿದೆ. ಈ ಸಂಬಂಧ ಎಲ್ಲಾ ಪೂರ್ವ ಸಿದ್ಧತೆಗಳು ಪೂರ್ಣಗೊಳಿಸಿ ಸಂಶೋಧನಾ ತಂಡವನ್ನು ಸಹ ರಚಿಸಲಾಗಿದೆ.

ಈಗಾಗಲೇ ರಾಜ್ಯ ಸರ್ಕಾರವು 18.75 ಲಕ್ಷ ರೂ. ಮೈಸೂರು ವಿವಿಗೆ ಬಿಡುಗಡೆ ಮಾಡಿದೆ. ಇದಕ್ಕೆ ಬೇಕಾದ ಫೈಲೆಟ್ ಅಧ್ಯಯನ ಮುಗಿದಿದ್ದು, ಅಧ್ಯಯನದ ರೂಪರೇಷೆಯನ್ನು ಸಹ ಅಂತಿಮಗೊಳಿಸಲಾಗಿದೆ.

ಈಡಿಗ- ಬಿಲ್ಲವ ದಕ್ಷಿಣ ಭಾರತದ ಕರ್ನಾಟಕ, ತಮಿಳುನಾಡು, ಆಂಧ್ರಪ್ರದೇಶ ಮತ್ತು ಕೇರಳದಲ್ಲಿ ಹೆಚ್ಚಾಗಿ ಕಂಡು ಬರುವುದರಿಂದ ಅಧ್ಯಯನ ತಂಡ ಈ ರಾಜ್ಯಗಳಿಗೂ ಭೇಟಿ ನೀಡಲಿದೆ. ಕರಾವಳಿ ಭಾಗದಲ್ಲಿ ಇವರು ಬಿಲ್ಲವರು ಎಂದು ಗುರುತಿಸಲ್ಪಡುತ್ತಾರೆ. ಪುನರ್ ಜಾತಿ ಗಣತಿ ವಿಚಾರ ಮುನ್ನಲೆಗೆ ಬಂದಿರುವ ಈ ಸಮಯದಲ್ಲಿ ಈ ಕುಲಶಾಸ್ತ್ರೀಯ ಅಧ್ಯಯನ ಹೆಚ್ಚಿನ ಮಹತ್ವ ಪಡೆದುಕೊಂಡಿದೆ.

ಈ ಸಮುದಾಯದ ಕುಲಶಾಸ್ತ್ರೀಯ ಅಧ್ಯಯನ ಕುರಿತು ಬೆಳಗಾವಿ ಅಧಿವೇಶನದಲ್ಲಿ ಚರ್ಚೆ ಸಹ ನಡೆದಿತ್ತು. ಒಳ ಮೀಸಲಾತಿಯ ಬೇಡಿಕೆ ಹೆಚ್ಚುತ್ತಿರುವ ಹಿನ್ನಲೆಯಲ್ಲಿ ಈಡಿಗ- ಬಿಲ್ಲವ ಉಪಜಾತಿಗಳ ಕುಲಶಾಸ್ತ್ರೀಯ ಅಧ್ಯಯನ ಹೆಚ್ಚಿನ ಮಹತ್ವವನ್ನು ಪಡೆದುಕೊಂಡಿದೆ.

26 ಉಪ ಜಾತಿಗಳು

ಸರ್ಕಾರದ ಪಟ್ಟಿ ಕ್ರಮ ಸಂಖ್ಯೆ 155 ಅನ್ವಯ ಈಡಿಗ- ಬಿಲ್ಲವ ಸಮುದಾಯವು ಈಡಿಗ, ಬೆಳ್ಚಡ್, ಪೂಜಾರಿ, ದೇಶ ಭಂಡಾರಿ, ಇಡಿಗ, ಎಲಿಗಾ, ಇಲಿಗಾ ಹಳೇ ಪೈಕ್, ಹಳೇಪೈಕಾರು, ಬಿಲ್ಲವ, ದೇವರ್, ಮಲೆಯಾಳಿ ಬಿಲ್ಲವ, ದೀವರ್, ದೇವರಮಕ್ಕಳು, ದಿವರಮಕ್ಕಳು, ನಾಮಧಾರಿ, ಕಲಾಲ್, ಗೌಂಡ್ಲಾ, ಗೂಂಡ್ಲಾ, ಥಿಯಾನ್, ತಿಯ್ಯನ್, ತಿಯಾನ್, ಈಜವ, ತಿಯ್ಯ, ನಾಡರ್, ಗಮಲ್ಲ ಎಂಬ 26 ಉಪಜಾತಿಗಳನ್ನು ಹೊಂದಿದೆ.

ಈಡಿಗ- ಬಿಲ್ಲವ ಸಮುದಾಯದ ಕೆಲವು ಉಪ ಜಾತಿಗಳು ಸರ್ಕಾರದ ವಿವಿಧ ಸೌಲಭ್ಯಗಳಿಂದ ವಂಚಿತವಾಗಿವೆ. ಕೆಲವು ಉಪ ಜಾತಿಗಳು ತೀರಾ ಹಿಂದುಳಿದಿದ್ದು, ಈ ಸಮುದಾಯಗಳ ಒಳಗೊಳ್ಳುವಿಕೆಯ ಬೆಳವಣಿಗೆಗೆ ಭವಿಷ್ಯದಲ್ಲಿ ಸರ್ಕಾರ ಕೈಗೊಳ್ಳಬಹುದಾದ ಕ್ರಮಗಳ ಕುರಿತು ವಿವರವಾಗಿ ವರದಿಯಲ್ಲಿ ಚರ್ಚಿಸಲಾಗುವುದು. ಪ್ರಸ್ತುತ ಕುಲಶಾಸ್ತ್ರೀಯ ಅಧ್ಯಯನವು ಗುಂಪು ಚರ್ಚೆ, ಸಮೀಕ್ಷೆ, ವಿಚಾರ ಸಂಕಿರಣ, ಮೌಲ್ಯ ಮಾಪನ ಮುಂತಾದವುಗಳನ್ನು ಒಳಗೊಂಡಿದೆ. ಈಡಿಗ ಮತ್ತು ಅದರ ಉಪ ಜಾತಿಗಳ ಸಂಬಂಧ ಯಾವುದೇ ಮಾಹಿತಿ ಇದ್ದರೂ ಮೊ. 90081 64514 ಸಂಪಕಿಸಬಹುದು ಎಂದು ಕುಲಶಾಸ್ತ್ರೀಯ ಅಧ್ಯಯನ ಕೈಗೊಂಡಿರುವ ಮೈಸೂರು ವಿವಿ ಸಿಎಸ್ಎಸ್ಐ ಸಹ ಪ್ರಾಧ್ಯಾಪಕ ಡಾ.ಡಿ.ಸಿ. ನಂಜುಂಡ ತಿಳಿಸಿದ್ದಾರೆ.

----

ಕೋಟ್...

ಫೋಟೋ- 24ಎಂವೈಎಸ್35

----

ಕಳೆದ ಆರ್ಥಿಕ ವರ್ಷದಲ್ಲಿ ಆರಂಭವಾಗಬೇಕಿದ್ದ ಅಧ್ಯಯನ ತಾಂತ್ರಿಕ ಕಾರಣಗಳಿಂದ ವಿಳಂಬಗೊಂಡಿತ್ತು. ರಾಜ್ಯ ಸರ್ಕಾರ ಈಗಾಗಲೇ ಒಟ್ಟು 18.75 ಲಕ್ಷಗಳನ್ನು ವಿವಿಗೆ ಬಿಡುಗಡೆ ಮಾಡಿದೆ. ಪ್ರತಿ ಜಿಲ್ಲೆಯಲ್ಲಿರುವ ಈ ಸಮುದಾಯದ ಸಾಮಾಜಿಕ ಆರ್ಥಿಕ ಮತ್ತು ಸಾಂಸ್ಕೃತಿಕ ಅಂಶಗಳ ಕುರಿತು ಆಳವಾದ ಮಾಹಿತಿ ಸಂಗ್ರಹಿಸಲಾಗುವುದು. ಅಧ್ಯಯನಕ್ಕೆ 18 ತಿಂಗಳಿಗಿಂತ ಹೆಚ್ಚಿನ ಸಮಯ ಬೇಕಾಗಿದೆ. ವರದಿಯೊಂದಿಗೆ ಸಮುದಾಯದ ಸಾಕ್ಷ್ಯಚಿತ್ರವನ್ನು ಸಹ ತಯಾರಿಸಬೇಕಾಗಿದೆ.

- ಡಾ.ಡಿ.ಸಿ. ನಂಜುಂಡ, ಸಹ ಪ್ರಾಧ್ಯಾಪಕ, ಸಾಮಾಜಿಕ ಒಳಗೊಳ್ಳುವಿಕೆ ಅಧ್ಯಯನ ಕೇಂದ್ರ, ಮೈಸೂರು ವಿವಿ