ಹೊಸ ವಿನ್ಯಾಸದಲ್ಲಿ ಮಾರುಕಟ್ಟೆಗೆ ಟಾಟಾ ಸಿಯೆರಾ

ಮುರಳಿಕಾರ್ತಿಕ್‌.ಎಸ್

ಕನ್ನಡಪ್ರಭ ವಾರ್ತೆ ಮುಂಬೈ

ಟಾಟಾ ಮೋಟಾರ್ಸ್‌ನ ಐಕಾನಿಕ್ ಎಸ್‌ಯುವಿ ಮಾಡೆಲ್‌ (ಸ್ಪೋರ್ಟ್ಸ್ ಯುಟಿಲಿಟಿ ವೆಹಿಕಲ್), ‘ಟಾಟಾ ಸಿಯೆರಾ’ ಮತ್ತೆ ಮಾರುಕಟ್ಟೆಗೆ ಲಗ್ಗೆ ಇಡುತ್ತಿದ್ದು, ದೇಶೀಯ ಆಟೋ ಮಾರುಕಟ್ಟೆಯಲ್ಲಿ ಸಂಚಲನ ಸೃಷ್ಟಿಸಿದೆ.

ಹೊಸ ತಲೆಮಾರಿನ ಟಾಟಾ ಸಿಯೆರಾವನ್ನು ಕೇವಲ 11.49 ಲಕ್ಷ ರೂ.ನ ಆರಂಭಿಕ ಎಕ್ಸ್-ಶೋರೂಂ ಬೆಲೆಯೊಂದಿಗೆ ಬಿಡುಗಡೆ ಮಾಡಲಾಗಿದ್ದು, ಡಿ.16ರಿಂದ ಬುಕಿಂಗ್ ಆರಂಭವಾಗಲಿದೆ. 2026ರ ಜ.15ರಿಂದ ಗ್ರಾಹಕರಿಗೆ ವಿತರಣೆಯಾಗಲಿದ್ದು, ಭಾರತದಲ್ಲಿ ಮಧ್ಯಮ ಗಾತ್ರದ ಎಸ್‌ಯುವಿ ಪ್ರಿಯರಿಗೆ ಇದು ಅತ್ಯುತ್ತಮ ಆಯ್ಕೆಯಾಗಿದೆ ಎಂದು ಟಾಟಾ ಮೋಟಾರ್ಸ್‌ ಪ್ಯಾಸೆಂಜರ್‌ ವೆಹಿಕಲ್ಸ್‌ ಲಿಮಿಟೆಡ್‌ನ ಎಂಡಿ ಮತ್ತು ಸಿಇಒ ಶೈಲೇಶ್‌ ಚಂದ್ರ ತಿಳಿಸಿದ್ದಾರೆ.

ಮನಸೆಳೆಯುವ ಬಣ್ಣಗಳು:

ಈ ಕಾರು ಪೆಟ್ರೋಲ್, ಡೀಸೆಲ್ ಹಾಗೂ ಎಲೆಕ್ಟ್ರಿಕ್ ಮಾದರಿಗಳಲ್ಲಿ, ಆರು ಆಕರ್ಷಕ ಬಣ್ಣದ ಆಯ್ಕೆಗಳಲ್ಲಿ ಲಭ್ಯವಿದೆ. ಮುನ್ನಾರ್ ಮಿಸ್ಟ್, ಅಂಡಮಾನ್ ಅಡ್ವೆಂಚರ್, ಬೆಂಗಾಲ್ ರೋಗ್, ಕೂರ್ಗ್ ಕ್ಲೌಡ್ಸ್, ಪ್ಯೂರ್ ಗ್ರೇ, ಪ್ರೆಸ್ಟೀ ವೈಟ್ ಎಂಬ ಆರು ಬಣ್ಣಗಳಲ್ಲಿ ಲಭ್ಯವಿದೆ. ಇವುಗಳಲ್ಲಿ ಕೆಲವು ಬಣ್ಣಗಳಿಗೆ ಭಾರತದ ಕೆಲ ಪ್ರದೇಶಗಳ ಹೆಸರನ್ನು ಇಟ್ಟಿರುವುದು ವಿಶೇಷ.ಆಕರ್ಷಕ ವಿನ್ಯಾಸ:ನೂತನ ಸಿಯೆರಾವನ್ನು ಹಳೆಯ ಸಿಯೆರಾ (1991ರಲ್ಲಿ ಇದ್ದಂತೆ) ಕಾರನ್ನು ಮಾದರಿಯಾಗಿಟ್ಟುಕೊಂಡು ವಿನ್ಯಾಸ ಮಾಡಲಾಗಿದೆ. ಆದರೆ, ಹಳೆಯ ಸಿಯೆರಾಕ್ಕೂ, ಹೊಸದಕ್ಕೂ ಸಾಕಷ್ಟು ವ್ಯತ್ಯಾಸವಿದೆ. ಕಾರಿನ ಹಿಂಬದಿಯ ಪ್ಯಾನರಾಮಿಕ್ ವಿಂಡೋ ಹೊರತುಪಡಿಸಿ ಮುಂಭಾಗದಲ್ಲಿ ಸಂಪೂರ್ಣವಾಗಿ ವಿನ್ಯಾಸ ಬದಲಿಸಲಾಗಿದೆ.

ಹೆಚ್ಚಿನ ಸ್ಥಳಾವಕಾಶ, ಆಕರ್ಷಕ ವಿನ್ಯಾಸ, ಪ್ರೀಮಿಯಂ ಕ್ವಾಲಿಟಿ, ಟೆಕ್ ಲೋಡೆಡ್ ಕ್ಯಾಬಿನ್, ಟ್ರಿಪಲ್ ಸ್ಕ್ರೀನ್, ಲೆವೆಲ್ 2 ಅಡಾಸ್, ಪ್ಯಾನರಾಮಿಕ್ ಸನ್ ರೂಫ್ ಸೇರಿದಂತೆ ಹಲವು ಆಧುನಿಕ ಸೌಲಭ್ಯಗಳನ್ನು ಹೊಂದಿರುವ ಐಷಾರಾಮಿ ಕಾರು ಇದಾಗಿದೆ. ಸುರಕ್ಷತಾ ವೈಶಿಷ್ಟ್ಯಗಳು:

ಟಾಟಾ ಸಿಯೆರಾ 20ಕ್ಕೂ ಹೆಚ್ಚು ಸುರಕ್ಷತಾ ವೈಶಿಷ್ಟ್ಯಗಳನ್ನು ಹೊಂದಿದೆ. ಆರು ಏರ್‌ಬ್ಯಾಗ್, ಎಲೆಕ್ಟ್ರಿಕ್ ಸ್ಟೆಬಿಲಿಟಿ ಕಂಟ್ರೋಲ್, ಹಿಲ್ ಹೋಲ್ಡ್ ಕಂಟ್ರೋಲ್, ಆಲ್ ಡಿಸ್ಕ್ ಬ್ರೇಕ್, ರಿವರ್ಸ್ ಪಾರ್ಕಿಂಗ್ ಸೆನ್ಸರ್, ರಿವರ್ಸ್ ವ್ಯೂ ಕ್ಯಾಮೆರಾ, ಟೈಯರ್ ಪ್ರೆಷರ್ ಮೋನಿಟರಿಂಗ್ ಸಿಸ್ಟಮ್, ರೈನ್ ಸೆನ್ಸರ್ ವೈಪರ್, ಫ್ರಂಟ್ ಪಾರ್ಕಿಂಗ್ ಸೆನ್ಸರ್, ವೆಹಿಕಲ್ ಡೈನಮಿಕ್ ಕಂಟ್ರೋಲ್, ಕಾರ್ನರ್ ಸೆಬಿಲಿಟಿ ಕಂಟ್ರೋಲ್, ಅಡಾಸ್ ಲೆವೆಲ್ 2 +, ಡೈನಾಮಿಕ್ ಟಾರ್ಕ್ ವೆಕ್ಟರಿಂಗ್, ಆಫ್ಟರ್ ಇಂಫಾಕ್ಟ್ ಬ್ರೇಕಿಂಗ್ ಸೇರಿದಂತೆ ಹಲವು ಸುರಕ್ಷತಾ ವೈಶಿಷ್ಟ್ಯಗಳನ್ನು ಇದು ಹೊಂದಿದೆ.