ಬಿಜೆಪಿಗೆ ಏಕತ್ವದ ನಡುವೆ ಬಹುತ್ವ ಬಿತ್ತುವ ಛಾತಿ ಇದೆ: ಎಸ್‌ಜಿಸಿ
ಸಾರಾಂಶ
ಸಮಾಜಮುಖಿತ್ವಕ್ಕೆ ಕಿಂಚಿತ್ತೂ ಲೋಪವಾಗದಂತೆ ಬದುಕಿರುವ ಜೆಪಿ (ಬಂಜಗೆರೆ ಜಯಪ್ರಕಾಶ್)ಯದ್ದು ನಿಶ್ಚಿತಮತಿಯ ಚಿಂತನೆ. ಎಂದಿಗೂ ಆತುರದ ಆಲೋಚನೆ ಮಾಡಿದವರಲ್ಲ. ಏಕತ್ವ ಎನ್ನುವವರ ನಡುವೆ ಎದೆಗುಂದದೆ ಬಹುತ್ವ ಬಿತ್ತುವ ಛಾತಿ ಅವರದ್ದಾಗಿದೆ ಎಂದು ಹಿರಿಯ ಸಾಹಿತಿ ಎಸ್.ಜಿ.ಸಿದ್ದರಾಮಯ್ಯ ಹೇಳಿದರು.
ಕನ್ನಡಪ್ರಭ ವಾರ್ತೆ ರಾಮನಗರ
ನಗರದ ಗೌಸಿಯಾ ಎಂಜಿನಿಯರಿಂಗ್ ಕಾಲೇಜಿನ ಸೆಮಿನಾರ್ ಹಾಲ್‌ನಲ್ಲಿ ‘ನಮ್ಮವರು ಬಳಗ’ ಭಾನುವಾರ ಹಮ್ಮಿಕೊಂಡಿದ್ದ ‘ಜನಮುಖಿ ಜೆ.ಪಿ: ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಸಾಹಿತ್ಯ ಶ್ರೀ ಹಾಗೂ ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರದ ಗೌರವ ಪ್ರಶಸ್ತಿ ಪುರಸ್ಕೃತ ಡಾ.ಬಂಜಗೆರೆ ಜಯಪ್ರಕಾಶ್ ಅವರ ಬದುಕು-ಬರಹ- ಹೋರಾಟದ ಅವಲೋಕನ, ಸನ್ಮಾನ’ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
ಬದುಕು ಮತ್ತು ಬರಹ ಒಂದೇ ಆಗಿರುವವರ ಸಾಲಿನಲ್ಲಿ ಜೆ.ಪಿ ಪ್ರಮುಖರು. ಮೆರೆಯಬೇಕು ಎಂಬುವವರ ಮಧ್ಯೆ ಬೆಸೆಯುವ ಅವರ ಮಾತೃಗುಣದ ಬದುಕು ಮತ್ತು ವ್ಯಕ್ತಿತ್ವ ತತ್ವನಿಷ್ಠವಾದುದು. ಅವರ ಸಂವೇದನಾಶೀಲ ಕೃತಿಗಳಿಗೆ ಸಾರ್ವಕಾಲಿಕತೆಯ ಲಕ್ಷಣಗಳಿವೆ ಎಂದರು.ಜೆನ್‌ಜಿಗೆ ಬೇಕಿದೆ ನೈತಿಕ ಶಕ್ತಿ:
ಜೆ.ಪಿ ಸಾಹಿತ್ಯ–ಸಂಸ್ಕೃತಿ ಕುರಿತು ಮಾತನಾಡಿದ ಲೇಖಕ ರವಿಕುಮಾರ್ ಬಾಗಿ, ಕನ್ನಡ ಸಾಹಿತ್ಯ ಲೋಕವು ಇದುವರೆಗೆ ಜೆ.ಪಿ ಅವರನ್ನು ಕವಿ, ಲೇಖಕ ಹಾಗೂ ಅನುವಾದಕರಾಗಿ ಮಾತ್ರ ನೋಡಿದೆ. ಆದರೆ, ಸಂಸ್ಕೃತಿ ಚಿಂತಕರಾಗಿ ನೋಡಿಲ್ಲ. ಅವರೊಬ್ಬ ದೊಡ್ಡ ಸಂಸ್ಕೃತಿ ಚಿಂತಕ. ಅವರ ಒಟ್ಟಾರೆ ಲಹರಿ ಇರುವುದೇ ಸಂಸ್ಕೃತಿ ಕುರಿತ ಬರಹಗಳಲ್ಲಿ ಎಂದರು.
ಕವಿಗಳಾದ ಮೇದರದೊಡ್ಡಿ ಹನುಮಂತ ಮತ್ತು ಶೈಲಾ ಶ್ರೀನಿವಾಸ್ ಅವರು ಜೆ.ಪಿ ಅವರ ಕವಿತೆಗಳನ್ನು ವಾಚಿಸಿದರು. ಬ್ಯಾಡರಹಳ್ಳಿ ಶಿವಕುಮಾರ್ ಮತ್ತು ಚಂದ್ರು ಗಾಯನ ನಡೆಸಿಕೊಟ್ಟರು. ನಮ್ಮವರು ಬಳಗದ ಡಿ.ಆರ್. ದೇವರಾಜು, ಪದ್ಮರೇಖಾ, ಆರ್. ನಾಗರಾಜು, ಎಚ್.ಡಿ. ಉಮಾಶಂಕರ್, ಅಂಕನಹಳ್ಳಿ ಪಾರ್ಥ, ಕುಂಬಾಪುರ ಬಾಬು, ಎಸ್.ಕೃಷ್ಣ ಉಪಸ್ಥಿತರಿದ್ದರು.
ನಾಡಿನ ಸಾಕ್ಷಿಪ್ರಜ್ಞೆಯಾಗಿರುವ ಬಂಜಗೆರೆ ಜಯಪ್ರಕಾಶ್ ಅವರ ಸಾಹಿತ್ಯ ಮತ್ತು ಹೋರಾಟದ ಬದುಕಿನಲ್ಲಿ ಸಮ ಸಮಾಜ ನಿರ್ಮಾಣದ ಆಶಯ ಎದ್ದು ಕಾಣುತ್ತದೆ.
ಚಳವಳಿಗಳ ನಿರಂತರ ಸಂಗಾತಿ ಜೆ.ಪಿ. ಸಾಮಾಜಿಕ ನ್ಯಾಯದ ಭಾಗವಾಗಿಯೇ ಎಲ್ಲಾ ಹೋರಾಟಗಳನ್ನು ಮಾಡಿದ್ದಾರೆ. ಅವರ ಸಾಹಿತ್ಯ, ಸಂಸ್ಕೃತಿಹಾಗೂ ಹೋರಾಟದ ಬದುಕಿನ ದಾಖಲೀಕರಣ ಆಗಬೇಕಿದೆ.