ಧರಣಿ ನಿರತರಿಗೆ ಸರ್ಕಾರವೇ ದುಡಿಮೆಯ ನಷ್ಟ ಭರಿಸಲಿ
ಸಾರಾಂಶ
ಸಂತ್ರಸ್ತರ ನಷ್ಟ ಭರಿಸುವುದು ಶಾಸಕರು, ಅಧಿಕಾರಿಗಳು ಮತ್ತು ಸರ್ಕಾರದ ಜವಾಬ್ದಾರಿ. ಕೂಡಲೇ ಮುಖ್ಯಮಂತ್ರಿಗಳು ಜಿಲ್ಲಾಡಳಿತಕ್ಕೆ ಸೂಕ್ತ ಸಲಹೆ ಸೂಚನೆ ನೀಡಿ ಪರಿಹಾರ ನೀಡಬೇಕು
ಕನ್ನಡಪ್ರಭ ವಾರ್ತೆ ಬಸವನಬಾಗೇವಾಡಿ
ಬಸವನಬಾಗೇವಾಡಿ ತಾಲೂಕಿನ ಕುದರಿ ಸಾಲವಾಡಗಿ ಗ್ರಾಮದಲ್ಲಿ ಅಗಷ್ಟ್ 23ರಂದು ಅನಧಿಕೃತವಾಗಿ ಸಾರ್ವಜನಿಕರ ಮನೆಗಳು ಹಾಗೂ ಸಾರ್ವಜನಿಕ ಭವನಗಳು, ಅಂಗನವಾಡಿ ಕೇಂದ್ರ, ಮಹಾನ್ ನಾಯಕರುಗಳ ವೃತ್ತಗಳನ್ನು ಕೆಡವಿ, ಊರಿನ ಸಾರ್ವಜನಿಕರ ನೆಮ್ಮದಿ ಹಾಳುಮಾಡಲಾಗಿದೆ. ಸಂತ್ರಸ್ತರು ಕಳೆದ ಹದಿನೈದು ದಿನಗಳಿಂದ ಬೇಡಿಕೆ ಈಡೇರಿಕೆಗಾಗಿ ಅನಿರ್ಧಿಷ್ಟವಾಧಿ ಧರಣಿ ಸತ್ಯಾಗ್ರಹ ಆರಂಭಿಸಿದ್ದಾರೆ. ಕೂಲಿ ಕಾರ್ಮಿಕರು, ರೈತರು, ಬಡವರು, ಹೆಣ್ಣುಮಕ್ಕಳು ಧರಣಿಯಲ್ಲಿ ನಿತ್ಯವೂ ಭಾಗವಹಿಸುತ್ತಿದ್ದು, ಪ್ರತಿ ದಿನ ಹೆಣ್ಣುಮಕ್ಕಳಿಗೆ ದಿನಗೂಲಿ ₹400ರಿಂದ ₹600, ಗಂಡಸರಿಗೆ ₹600ರಿಂದ ₹800 ಇದೆ. ನಿತ್ಯವೂ ಧರಣಿಯಲ್ಲಿ ಭಾಗವಹಿಸುತ್ತಿರುವುದರಿಂದ ನಿತ್ಯ ಜೀವನ ಸಾಗಿಸುವುದು ಕಷ್ಟವಾಗಿದೆ. ಮನೆಯಲ್ಲಿ ಜೀವನೋಪಾಯಕ್ಕಾಗಿ ಸಾಕಿದ ದನ ಕರುಗಳು, ಚಿಕ್ಕ ಚಿಕ್ಕ ಮಕ್ಕಳು ತೊಂದರೆಯಿಂದ ಪರದಾಡುವಂತಾಗಿದೆ. ಭೂಮಿಯಲ್ಲಿ ಬೆಳೆದ ಬೆಳೆಗಳು ನಾಶವಾಗುತ್ತಿವೆ. ಇವೆಲ್ಲ ತೊಂದರೆಗಳನ್ನು ಅನುಭವಿಸಿದ್ದ ಸಂತ್ರಸ್ತರ ನಷ್ಟ ಭರಿಸುವುದು ಶಾಸಕರು, ಅಧಿಕಾರಿಗಳು ಮತ್ತು ಸರ್ಕಾರದ ಜವಾಬ್ದಾರಿ. ಕೂಡಲೇ ಮುಖ್ಯಮಂತ್ರಿಗಳು ಜಿಲ್ಲಾಡಳಿತಕ್ಕೆ ಸೂಕ್ತ ಸಲಹೆ ಸೂಚನೆ ನೀಡಿ ಪರಿಹಾರ ನೀಡಬೇಕೆಂದು ಆಗ್ರಹಿಸಿದರು.
ಡಿಎಸ್ಎಸ್ ಮುಖಂಡ ಗುರುರಾಜ ಗುಡಿಮನಿ ಮಾತನಾಡಿ, ಧರಣಿ ನಿರತರಿಗೆ ಸಂಬಂಧಪಟ್ಟ ಅಧಿಕಾರಿಗಳು, ಶಾಸಕರು, ಸರ್ಕಾರವಾಗಲಿ ಯಾವುದೇ ಭರವಸೆ ನೀಡಿಲ್ಲ. ದೇವರಹಿಪ್ಪರಗಿ ಶಾಸಕರು ಇಲ್ಲಿಯವರೆಗೆ ಪ್ರತಿಭಟನಾ ಸ್ಥಳಕ್ಕೆ ಒಂದು ಬಾರಿ ಮಾತ್ರ ಬಂದು ಹೋಗಿದ್ದಾರೆ. ಸಂತ್ರಸ್ತರಿಗೆ ಅನೂಕೂಲವಾಗುವ ರೀತಿಯಲ್ಲಿ ಲಿಖಿತ ಭರವಸೆಯನ್ನು ನೀಡಿಲ್ಲ. ಪ್ರತಿಭಟನಾ ನಿರತರು ಕಡುಬಡವರಿದ್ದು ಕೂಲಿ ಕಾರ್ಮಿಕರಿದ್ದಾರೆ. ಅವರು ದುಡಿಯದೆ ಉಪಜೀವನ ಸಾಗಿಸಲಾಗುವುದಿಲ್ಲ. ಅಂತಹ ಪರಿಸ್ಥಿತಿಯಲ್ಲಿ ತಮಗೆ ನ್ಯಾಯಬೇಕೆಂದು ಸ್ಥಳೀಯ ಮಿನಿವಿಧಾನಸೌಧ ಮುಂಭಾಗ ಹದಿನೈದು ದಿನಗಳಿಂದ ಧರಣಿ ಆರಂಭಿಸಿದ್ದಾರೆ. ಸರ್ಕಾರ ಇವರಿಗೆ ನ್ಯಾಯ ಕೊಡದೇ ಹೋದರೆ ನಮ್ಮ ಹೋರಾಟ ತೀವ್ರ ಸ್ವರೂಪ ತಾಳುತ್ತದೆ ಎಂದು ಎಚ್ಚರಿಸಿದರು.ಮುಖಂಡ ಮುತ್ತುರಾಜ ಹಾಲಿಹಾಳ ಮಾತನಾಡಿದರು. ಅರವಿಂದ ಸಜ್ಜನ ಶಿರಸ್ತೇದಾರ ಬಿ.ಆರ್.ಪೋಲೇಶಿಗೆ ಮನವಿ ಸಲ್ಲಿಸಿದರು. ಈ ವೇಳೆ ಯಮನೂರಿ ಚಲವಾದಿ, ದವಲಬಿ ಯಲಗಾರ, ಹಸನಸಾಬ ಅತ್ತಾರ, ಸಂಗಪ್ಪ ಕುಂಟೋಜಿ, ಬಸಮ್ಮ ತಮದಡ್ಡಿ, ರೇವಣಸಿದ್ದ ಇಂಗಳಗಿ, ಶರಣಪ್ಪ ಇಂಗಳಗಿ, ಗಂಗಾಬಾಯಿ ಇಂಗಳಗಿ, ಗೌರವ್ವ ಕಳ್ಳಿಮನಿ, ಮುನೆರಾಬೇಗಂ ಅತ್ತಾರ, ಮಮತಾಜ ಹೆಬ್ಬಾಳ, ಮುರ್ತುಜಸಾ ಬಾವೂರ ಸೇರಿದಂತೆ ಇತರರು ಇದ್ದರು.