ಈ ಬಾರಿ ವಿಶ್ವಕಪ್‌ ಗೆಲ್ಲುವ ತಂಡಕ್ಕೆ ಸಿಗುವ ನಗದು ಬಹುಮಾನ ಎಷ್ಟು ಗೊತ್ತಾ?

ನ್ಯೂಯಾರ್ಕ್‌: ಈ ಬಾರಿ ಟಿ20 ವಿಶ್ವಕಪ್‌ನ ಪ್ರಶಸ್ತಿ ಮೊತ್ತವನ್ನು ಐಸಿಸಿ ದಾಖಲೆ ಪ್ರಮಾಣದಲ್ಲಿ ಹೆಚ್ಚಿಸಿದೆ. ಟ್ರೋಫಿ ವಿಜೇತ ತಂಡಕ್ಕೆ ಈ ಸಲ 2.45 ಮಿಲಿಯನ್‌ ಅಮೆರಿಕನ್‌ ಡಾಲರ್‌(ಅಂದಾಜು 20.35 ಕೋಟಿ ರು.) ನಗದು ಬಹುಮಾನ ಸಿಗಲಿದೆ ಎಂದು ಐಸಿಸಿ ಸೋಮವಾರ ಪ್ರಕಟಿಸಿದೆ.

ಕಳೆದ ಬಾರಿ ವಿಶ್ವಕಪ್‌ ಗೆದ್ದಿದ್ದ ಇಂಗ್ಲೆಂಡ್ ತಂಡಕ್ಕೆ 1.6 ಮಿಲಿಯನ್‌ ಯುಎಸ್ ಡಾಲರ್‌(ಈಗಿನ ಅಂದಾಜು 13.2 ಕೋಟಿ ರು.) ನಗದು ಬಹುಮಾನ ಲಭಿಸಿತ್ತು. ಈ ಬಾರಿ ಟೂರ್ನಿಯ ಒಟ್ಟಾರೆ ಪ್ರಶಸ್ತಿ ಮೊತ್ತವನ್ನು ಐಸಿಸಿ 11.25 ಮಿಲಿಯನ್‌ ಯುಎಸ್‌ ಡಾಲರ್‌(ಅಂದಾಜು 93 ಕೋಟಿ ರು.)ಗೆ ಹೆಚ್ಚಿಸಿದೆ. 

ಇದು ಟೂರ್ನಿಯ ಇತಿಹಾಸದಲ್ಲೇ ಗರಿಷ್ಠ. ಈ ಪೈಕಿ ರನ್ನರ್‌-ಅಪ್‌ ತಂಡಕ್ಕೆ 10.6 ಕೋಟಿ ರು. ಸಿಗಲಿದೆ. ಸೆಮಿಫೈನಲ್‌ ಪ್ರವೇಶಿಸುವ ತಂಡಗಳು ತಲಾ ಅಂದಾಜು ₹6.5 ಕೋಟಿ, ಸೂಪರ್‌-8 ಹಂತದಲ್ಲಿ ಹೊರಬಿದ್ದ ತಂಡಗಳು ತಲಾ ಅಂದಾಜು ₹3.17 ಕೋಟಿ ಪಡೆಯಲಿವೆ. ಟೂರ್ನಿಯಲ್ಲಿ 9ರಿಂದ 12ರ ವರೆಗೆ ಸ್ಥಾನ ಪಡೆದ ತಂಡಗಳು ತಲಾ 2.05 ಕೋಟಿ ರು, 13ರಿಂದ 20 ಸ್ಥಾನಿಯಾದ ತಂಡಗಳು ತಲಾ 1.87 ಕೋಟಿ ರು. ಪಡೆಯಲಿದೆ. 

ಅಲ್ಲದೆ ಗುಂಪು ಹಂತ ಮತ್ತು ಸೂಪರ್‌-8 ಹಂತದಲ್ಲಿ ಗೆಲ್ಲುವ ಪ್ರತಿ ಪಂದ್ಯಕ್ಕೆ ತಂಡಗಳಿಗೆ 25 ಲಕ್ಷ ರು. ಹೆಚ್ಚುವರಿ ನಗದು ಸಿಗಲಿವೆ ಎಂದು ಐಸಿಸಿ ತಿಳಿಸಿದೆ.