ನಡೆ-ನುಡಿಯೇ ಜೋತೀರ್ಲಿಂಗ: ಸಾಣೇಹಳ್ಳಿ ಪಂಡಿತಾರಾಧ್ಯ ಶಿವಾಚಾರ್ಯ

ಮುಂಡಗೋಡ: ಆಡುವ ಮಾತು ಮನಸು, ಬುದ್ಧಿ, ನಡೆ-ನುಡಿ ಒಂದಾಗಿದ್ದರೆ ಅದು ಮಂತ್ರವೂ ಆಗುತ್ತದೆ; ಜೋತೀರ್ಲಿಂಗವೂ ಆಗುತ್ತದೆ. ದಾರಿ ತಪ್ಪಿದರೆ ಸೂತಕವಾಗುತ್ತದೆ. ಹಾಗಾಗಿ ಮಾತನ್ನು ಸೂತಕ ಮಾಡಿಕೊಳ್ಳಬಾರದು ಎಂದು ತರಳಬಾಳು ಸಂಸ್ಥಾನ ಶಾಖಾ ಮಠ ಸಾಣೇಹಳ್ಳಿಯ ಪಂಡಿತಾರಾಧ್ಯ ಶಿವಾಚಾರ್ಯರು ಹೇಳಿದರು.ವಿಶ್ವಗುರು ಬಸವೇಶ್ವರರನ್ನು ರಾಜ್ಯ ಸರ್ಕಾರ ಕನ್ನಡ ನಾಡಿನ ಸಾಂಸ್ಕೃತಿಕ ನಾಯಕ ಎಂದು ಘೋಷಣೆ ಮಾಡಿ ಒಂದು ವರ್ಷ ಪೂರ್ಣಗೊಂಡಿರುವ ಹಿನ್ನೆಲೆಯಲ್ಲಿ ಶನಿವಾರ ಸಂಜೆ ಇಲ್ಲಿಯ ವಿವೇಕಾನಂದ ಬಯಲು ರಂಗಮಂದಿರದಲ್ಲಿ ಜಿಲ್ಲಾ ಮಟ್ಟದ ಬಸವ ಸಂಸ್ಕೃತಿ ಅಭಿಯಾನದ ಸಾನ್ನಿಧ್ಯ ವಹಿಸಿ ಮಾತನಾಡಿದರು.

ಬಸವ ಸಂಸ್ಕೃತಿ ಅಭಿಯಾನದ ಜಿಲ್ಲಾಧ್ಯಕ್ಷ ಮಾಜಿ ಶಾಸಕ ವಿ.ಎಸ್. ಪಾಟೀಲ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಆಚರಿಸಲಾಗುವ ಬಹಳಷ್ಟು ಜಯಂತಿಗಳು ಒಂದೊಂದು ಸಮಾಜಕ್ಕೆ ಮಾತ್ರ ಸೀಮಿತ ಎಂಬ ಭಾವನೆ ಇರುತ್ತದೆ. ಆದರೆ ಎಲ್ಲ ಸಮಾಜದ ಮುಖಂಡರನ್ನು ಒಂದು ಕಡೆಗೆ ಸೇರಿಸುವ ಉದ್ದೇಶದಿಂದ ಈ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಶರಣರಲ್ಲಿ ಸೂತಕದ ವಿವರಣೆ, ಶರಣರ ಸಮ ಸಮಾಜ ಕುರಿತು ಡಾ. ಗಂಗಾಂಬಿಕೆ. ಅಕ್ಕ ಹಾಗೂ ಡಾ.ಅಶೋಕ ಬರಗುಂಡಿ ಉಪನ್ಯಾಸ ನೀಡಿದರು.

ಬಸವರಾಜ ಪಾಟೀಲ ಸ್ವಾಗತಿಸಿದರು. ಶ್ರೀಶೈಲ ಐನಾಪುರ ನಿರೂಪಿಸಿದರು. ಎಂ.ಎಸ್. ಕಾರ್ಕಳ ವಂದಿಸಿದರು.