ತ್ರಿಡಿ ರೂಪದಲ್ಲಿ ಸಂವಿಧಾನ ಪೀಠಿಕೆ ಅನಾವರಣ

ರಾಮನಗರ: ಸರ್ವರಿಗೂ ಅನ್ವಯವಾಗುವಂತಹ ಭಾರತ ಸಂವಿಧಾನ ಪೀಠಿಕೆಯ ಬಗ್ಗೆ ಮುಂದಿನ‌ ಪೀಳಿಗೆಗೆ ಅರಿವು ಮೂಡಿಸುವ ಉದ್ದೇಶದಿಂದ ನಗರಸಭೆ ಕಚೇರಿಯೊಳಗೆ ತ್ರಿಡಿ ರೂಪದಲ್ಲಿರುವ ಸಂವಿಧಾನ‌ ಪೀಠಿಕೆ ಅನಾವರಣ ಮಾಡಲಾಗುತ್ತಿದೆ ಎಂದು ನಗರಸಭೆ ಅಧ್ಯಕ್ಷ ಕೆ.ಶೇಷಾದ್ರಿ (ಶಶಿ) ತಿಳಿಸಿದರು.

ದೇಶದಾದ್ಯಂತ ಸಂವಿಧಾನದ ಪ್ರಸ್ತುತೆಯ ಬಗ್ಗೆ ಹಲವು ಚರ್ಚೆಗಳು ನಡೆಯುತ್ತಿವೆ. ಇಂತಹ ವಾತಾವರಣದಲ್ಲಿ ಸಂವಿಧಾನದ ಪಾಲನೆ ಕಡ್ಡಾಯ ಎಂಬುದನ್ನು ಸಂವಿಧಾನ‌ ವಿರೋಧಿ ಶಕ್ತಿಗಳು ಅರಿತಿಲ್ಲ. ಸಂವಿಧಾನ ಬದಲಾವಣೆಯ ಮಾತುಗಳನ್ನಾಡುತ್ತಿರುವ ದುಷ್ಟ ಶಕ್ತಿಗಳ ನಡುವೆ ನಾವು ಜವಾಬ್ದಾರಿ ವಹಿಸಿ ವಿದ್ಯಾರ್ಥಿಗಳು ಹಾಗೂ ಸರ್ವರಲ್ಲಿಯೂ ಸಂವಿಧಾನದ ಆಶಯ ಮತ್ತು ಮಹತ್ವದ ಬಗ್ಗೆ ತಿಳಿಸುವುದು ಸಂವಿಧಾನ ಪೀಠಿಕೆ ಅನಾವರಣದ ಉದ್ದೇಶವಾಗಿದೆ. ಹಾಗಾಗಿ ಸಂಘ ಸಂಸ್ಥೆಗಳು, ಸಲಹೆ, ಸೂಚನೆ, ಸಹಕಾರ ನೀಡುವಂತೆ ಕೆ.ಶೇಷಾದ್ರಿ ಮನವಿ ಮಾಡಿದರು.

ರೈತ ಮಹಿಳೆ ಅನುಸೂಯಮ್ಮ, ಪುಟ್ಟಸ್ವಾಮಿ, ಗೋವಿಂದಯ್ಯ, ರೈಡ್ ನಾಗರಾಜು, ಹರೀಶ್, ನೀಲಿ ರಮೇಶ್ ಮತ್ತಿತರರು ಮಾತನಾಡಿ ರಾಷ್ಟ್ರ ಮತ್ತು ರಾಜ್ಯ ಮಟ್ಟದ ಕಣ್ಣು ತೆರೆಸುವ ಕೆಲಸವನ್ನು ಮಾಡಿರುವ ನಗರಸಭೆ ಚಿಂತನೆಗೆ ಅಭಿನಂದನೆ ಸಲ್ಲಿದರಲ್ಲದೆ ಹಲವು ಮೊದಲುಗಳಿಗೆ ರಾಮನಗರ ನಗರಸಭೆ ಹೆಸರಾಗಿದೆ. ಡಾ.ಬಿ.ಆರ್. ಅಂಬೇಡ್ಕರ್ ಅವರು ಕೊಟ್ಟ ಸಂವಿಧಾನ ಪೀಠಿಕೆ ಯನ್ನು ಅನಾವರಣ ಮಾಡುತ್ತಿರುವುದು ಶ್ಲಾಘನೀಯ. ಸಂವಿಧಾನ ಪೀಠಿಕೆಯ ಅನಾವರಣದ ಜೊತೆಗೆ ಕೈಪಿಡಿ ವಿತರಿಸಿ, ಇಲಾಖಾ ಮುಖ್ಯಸ್ಥರು ಭಾಗವಹಿಸುವಂತಾಗಲಿ ಎಂದು ಸಲಹೆ ನೀಡಿದರು.

ರಾಮನಗರ ನಗರಸಭೆ ಸಭಾಂಗಣದಲ್ಲಿ ಭಾರತ ಸಂವಿಧಾನ‌ ಪೀಠಿಕೆ ಅನಾವರಣ ಮಾಡುವ ಸಂಬಂಧ ಅಧ್ಯಕ್ಷ ಕೆ.ಶೇಷಾದ್ರಿ ಅಧ್ಯಕ್ಷತೆಯಲ್ಲಿ ಪೂರ್ವಭಾವಿ ಸಭೆ ನಡೆಯಿತು.