ಕನ್ನಡಪ್ರಭವಾರ್ತೆ ಬೆಂಗಳೂರುದೇಶದ ಪ್ರಮುಖ ದೂರಸಂಪರ್ಕ ಸಂಸ್ಥೆಯಾದ ಭಾರ್ತಿ ಏರ್ಟೆಲ್, ತನ್ನ ಪೋಸ್ಟ್ಪೇಯ್ಡ್ ಗ್ರಾಹಕರಿಗೆ ಅತ್ಯುನ್ನತ ಹಾಗೂ ಸ್ಥಿರವಾದ ನೆಟ್ವರ್ಕ್ ಅನುಭವವನ್ನು ನೀಡುವ ಸಲುವಾಗಿ ಅತ್ಯಾಧುನಿಕ 5ಜಿ ಸ್ಲೈಸಿಂಗ್ ತಂತ್ರಜ್ಞಾನ ಆಧಾರಿತ ಹೊಸ ಪ್ರಯಾರಿಟಿ ಪೋಸ್ಟ್ಪೇಯ್ಡ್ ಸೌಲಭ್ಯವನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ.
ಉದ್ಯೋಗ, ವೃತ್ತಿಪರ ಕೆಲಸಗಳು, ಮನರಂಜನೆ ಅಥವಾ ಆನ್ಲೈನ್ ಮೀಟಿಂಗ್ಗಳಿಗಾಗಿ ಯಾವುದೇ ಅಡೆತಡೆಯಿಲ್ಲದ ಕನೆಕ್ಟಿವಿಟಿಯನ್ನು ಬಯಸುವ ಬಿಡುವಿಲ್ಲದ ಗ್ರಾಹಕರಿಗಾಗಿಯೇ ಈ ಸೇವೆಯನ್ನು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ.ಕಳೆದ ಒಂದು ವರ್ಷದಲ್ಲಿ ಯುಎಸ್ಎ, ಸಿಂಗಾಪುರ, ಯುನೈಟೆಡ್ ಕಿಂಗ್ಡಮ್ ಮತ್ತು ಮಲೇಷ್ಯಾ ಸೇರಿದಂತೆ ಹಲವು ಪ್ರಮುಖ ದೇಶಗಳಲ್ಲಿ ಸ್ಲೈಸಿಂಗ್ ಆಧಾರಿತ 5ಜಿ ಸೇವೆಗಳನ್ನು ಪ್ರಾರಂಭಿಸಲಾಗಿದೆ. ಆದರೆ ಭಾರತದಲ್ಲಿ ಈ ರೀತಿಯ ಸೇವೆಯನ್ನು ಪರಿಚಯಿಸುತ್ತಿರುವುದು ಏರ್ಟೆಲ್ ಸಂಸ್ಥೆಯೇ ಮೊದಲು ಎಂಬುದು ಗಮನಾರ್ಹ.
ಈ ವಿಶೇಷ ಸೇವೆಗಾಗಿ ಏರ್ಟೆಲ್ ತನ್ನ ಹಾಲಿ 5ಜಿ ನೆಟ್ವರ್ಕ್ ಅನ್ನು ಸುಧಾರಿತ ಸಾಮರ್ಥ್ಯದ ಸ್ಲೈಸಿಂಗ್ ತಂತ್ರಜ್ಞಾನದೊಂದಿಗೆ ಮೇಲ್ದರ್ಜೆಗೆ ಏರಿಸಿದೆ. ಈ ತಂತ್ರಜ್ಞಾನವು ನೆಟ್ವರ್ಕ್ನ ಒಟ್ಟಾರೆ ದಕ್ಷತೆಯನ್ನು ಹೆಚ್ಚಿಸುವುದಲ್ಲದೆ, ಹೆಚ್ಚಿನ ಡೇಟಾ ಸಾಮರ್ಥ್ಯವನ್ನು ಸೃಷ್ಟಿಸುತ್ತದೆ. ಈ ಹೆಚ್ಚುವರಿ ಸಾಮರ್ಥ್ಯವನ್ನು ನಿರ್ದಿಷ್ಟವಾಗಿ ಬಳಸಿಕೊಂಡು, ನೆಟ್ವರ್ಕ್ ದಟ್ಟಣೆ (ಟ್ರಾಫಿಕ್) ಇರುವ ಪ್ರದೇಶಗಳಲ್ಲೂ ಪ್ರಯಾರಿಟಿ ಗ್ರಾಹಕರಿಗೆ ಯಾವುದೇ ವೇಗ ಮಿತಿ ಇಲ್ಲದೆ ಅತ್ಯುತ್ತಮ ಡಿಜಿಟಲ್ ಅನುಭವವನ್ನು ನೀಡಲು ಇದು ನೆರವಾಗಲಿದೆ.ಈ ಹೊಸ ತಂತ್ರಜ್ಞಾನದ ಬಿಡುಗಡೆ ಕುರಿತು ಮಾತನಾಡಿದ ಏರ್ಟೆಲ್ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಶಾಶ್ವತ್ ಶರ್ಮಾ ಅವರು, ‘ನಮ್ಮ ಗ್ರಾಹಕರ ಅನುಭವವನ್ನು ಉತ್ತಮಗೊಳಿಸುವ ಅರ್ಥಪೂರ್ಣ ಸೌಲಭ್ಯಗಳನ್ನು ನೀಡುವುದರ ಕಡೆಗೆ ಏರ್ಟೆಲ್ ಯಾವಾಗಲೂ ಗಮನ ಹರಿಸುತ್ತದೆ. 5ಜಿ ಸ್ಲೈಸಿಂಗ್ ತಂತ್ರಜ್ಞಾನದ ಬೆಂಬಲದೊಂದಿಗೆ ಮೂಡಿಬಂದಿರುವ ಪ್ರಯಾರಿಟಿ ಪೋಸ್ಟ್ಪೇಯ್ಡ್ ನಮ್ಮ ಇತ್ತೀಚಿನ ಆವಿಷ್ಕಾರವಾಗಿದೆ. ಗ್ರಾಹಕರು ಟ್ರಾಫಿಕ್ನಲ್ಲಿ ಸಿಲುಕಿದ್ದಾಗ ಕ್ಲೈಂಟ್ ಕಾಲ್ನಲ್ಲಿ ಭಾಗವಹಿಸುತ್ತಿರಲಿ, ಜನದಟ್ಟಣೆಯ ಸಂಗೀತ ಕಚೇರಿಯಲ್ಲಿ ಲೈವ್ ಸ್ಟ್ರೀಮಿಂಗ್ ಮಾಡುತ್ತಿರಲಿ ಅಥವಾ ಕಿಕ್ಕಿರಿದ ಮಾರುಕಟ್ಟೆಯಲ್ಲಿ ಕ್ಯಾಬ್ ಬುಕ್ ಮಾಡುತ್ತಿರಲಿ, ಇದು ಅವರಿಗೆ ಅತ್ಯುತ್ತಮ ಹಾಗೂ ಹೆಚ್ಚು ವಿಶ್ವಾಸಾರ್ಹ ನೆಟ್ವರ್ಕ್ ಅನುಭವವನ್ನು ನೀಡುತ್ತದೆ’ ಎಂದು ತಿಳಿಸಿದರು.
ಏರ್ಟೆಲ್ನ ಎಲ್ಲಾ ಪೋಸ್ಟ್ಪೇಯ್ಡ್ ಪ್ಲಾನ್ಗಳನ್ನು ಹೊಂದಿರುವ ಗ್ರಾಹಕರಿಗೆ ಈ ಪ್ರಯಾರಿಟಿ ಸೇವೆ ಲಭ್ಯವಿರಲಿದೆ. ಪ್ರಸ್ತುತ ಇರುವ ಪೋಸ್ಟ್ಪೇಯ್ಡ್ ಗ್ರಾಹಕರು ಯಾವುದೇ ಹೆಚ್ಚುವರಿ ಪ್ರಕ್ರಿಯೆಯಿಲ್ಲದೆ ಸ್ವಯಂಚಾಲಿತವಾಗಿ ಈ ಸೌಲಭ್ಯದ ಪ್ರಯೋಜನವನ್ನು ಪಡೆಯಲಿದ್ದಾರೆ. ಇನ್ನು ಪ್ರಿಪೇಯ್ಡ್ ಗ್ರಾಹಕರು ಅಥವಾ ಇತರ ನೆಟ್ವರ್ಕ್ಗಳಿಂದ ಏರ್ಟೆಲ್ ಪ್ರಯಾರಿಟಿ ಪೋಸ್ಟ್ಪೇಯ್ಡ್ಗೆ ಬದಲಾಗಲು ಬಯಸುವ ಗ್ರಾಹಕರು, ಏರ್ಟೆಲ್ ಆ್ಯಪ್ ಮೂಲಕ ಅಥವಾ ಹತ್ತಿರದ ಏರ್ಟೆಲ್ ಮಳಿಗೆಗೆ ಭೇಟಿ ನೀಡುವ ಮೂಲಕ ಸುಲಭವಾಗಿ ಈ ಸೇವೆಯನ್ನು ಪಡೆದುಕೊಳ್ಳಬಹುದು.
