ಬೈಜು ರವೀಂದ್ರನ್‌ ವಜಾಕ್ಕೆ ಬೈಜೂಸ್‌ ಷೇರುದಾರರ ನಿರ್ಣಯ

ನವದೆಹಲಿ: ಬೈಜೂಸ್‌ ಸಂಸ್ಥೆಯ ಸಂಸ್ಥಾಪಕ ಬೈಜು ರವೀಂದ್ರನ್‌ ಅವರನ್ನು ಕಂಪನಿಯ ಮುಖ್ಯಕಾರ್ಯನಿರ್ವಹಣಾಧಿಕಾರಿಯ ಹುದ್ದೆಯಿಂದ ವಜಾಗೊಳಿಸಲು ಕಂಪನಿಯ ವಿಶೇಷ ಷೇರುದಾರರ ಸಭೆ ನಿರ್ಣಯ ಮಾಡಿದೆ. 

9300 ಕೋಟಿ ರು. ಫೆಮಾ ನಿಯಮ ಉಲ್ಲಂಘನೆ ಆರೋಪ ಹೊತ್ತು ತನಿಖಾ ಸಂಸ್ಥೆಯಿಂದ ಕಠಿಣ ಲುಕ್‌ಔಟ್‌ ನೋಟಿಸ್‌ಗೆ ಗುರಿಯಾಗಿರುವ ಕಾರಣ ಅವರ ವಿರುದ್ಧ ಈ ನಿರ್ಣಯ ಕೈಗೊಳ್ಳಲಾಗಿದೆ.

ಶುಕ್ರವಾರ ಕರೆಯಲಾಗಿದ್ದ ಸಭೆಗೆ ರವೀಂದ್ರನ್ ಮತ್ತು ಅವರ ಕುಟುಂಬ ಗೈರಾಗಿತ್ತು. ಆದರೆ ವಿಡಿಯೋ ಸಂದೇಶವೊಂದನ್ನು ಕಳುಹಿಸಿರುವ ರವೀಂದ್ರನ್‌, ‘ಈ ಸಭೆ ನಡೆಸುವುದೇ ಕಾನೂನುಬಾಹಿರವಾಗಿದ್ದು, ಇಲ್ಲಿ ತೆಗೆದುಕೊಂಡ ನಿರ್ಣಯಗಳೂ ಮುಂದಿನ ವಿಚಾರಣೆವರೆಗೆ ಮಾನ್ಯತೆ ಹೊಂದುವುದಿಲ್ಲ’ ಎಂದು ತಿಳಿಸಿದ್ದರು. 

ಈ ನಡುವೆ ಸಂಸ್ಥೆಯ ನಾಲ್ಕು ಷೇರುದಾರರು ಬೆಂಗಳೂರಿನ ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿಯಲ್ಲಿ ರವೀಂದ್ರನ್‌ ಹಾಗೂ ಕುಟುಂಬಸ್ಥರ ವಿರುದ್ಧ ದಾವೆ ಹೂಡಿದ್ದಾರೆ.