ಶೈಕ್ಷಣಿಕ ಸ್ವಾತಂತ್ರ್ಯ ಮತ್ತು ವಿಶ್ವವಿದ್ಯಾಲಯಗಳಿಗೆ ಸ್ವಾಯತ್ತತೆ ಅತ್ಯಗತ್ಯ: ಪ್ರೊ.ಆರ್‌.ಶಿವಪ್ಪ

ಕನ್ನಡಪ್ರಭ ವಾರ್ತೆ ಮೈಸೂರು

ಶೈಕ್ಷಣಿಕ ಸ್ವಾತಂತ್ರ್ಯ ಮತ್ತು ವಿಶ್ವವಿದ್ಯಾಲಯಗಳಿಗೆ ಸ್ವಾಯುತ್ತತೆ ಅತ್ಯಗತ್ಯ ಎಂದು ಮೈವಿವಿ ಮಾಜಿ ಕುಲಸಚಿವ, ಮಾನಸ ಗಂಗೋತ್ರಿ ಸಮಾಜಕಾರ್ಯ ವಿಭಾಗದ ಮುಖ್ಯಸ್ಥರಾದ ಹಿರಿಯ ಪ್ರಾಧ್ಯಾಪಕ ಡಾ.ಆರ್‌.ಶಿವಪ್ಪ ಪ್ರತಿಪಾದಿಸಿದ್ದಾರೆ.

ಉನ್ನತ ಶಿಕ್ಷಣವು ಸಮಾಜದ ಬೌದ್ಧಿಕ ಮತ್ತು ಸಾಂಸ್ಕೃತಿಕ ಅಭಿವೃದ್ಧಿಗೆ ಮೂಲಾಧಾರ. ವಿಶ್ವವಿದ್ಯಾಲಯಗಳು ಜ್ಞಾನ ಸೃಷ್ಟಿ, ಸಂಶೋಧನೆ ಮತ್ತು ಸತ್ಯಾನ್ವೇಷಣೆಯ ಕೇಂದ್ರಗಳಾಗಿವೆ. ಈ ಧ್ಯೇಯಗಳನ್ನು ಸಾಧಿಸಲು ಶೈಕ್ಷಣಿಕ ಸ್ವಾತಂತ್ರ್ಯ ಮತ್ತು ವಿಶ್ವವಿದ್ಯಾಲಯ ಸ್ವಾಯತ್ತತೆ ಅತ್ಯಗತ್ಯ ಎಂದಿದ್ದಾರೆ . ಅವರ ಹೇಳಿಕೆಯ ಪೂರ್ಣಪಾಠ ಇಲ್ಲಿದೆ.

ಶೈಕ್ಷಣಿಕ ಸ್ವಾತಂತ್ರ್ಯವೆಂದರೆ ಶಿಕ್ಷಕರು ಮತ್ತು ಸಂಶೋಧಕರು ಬಾಹ್ಯ ಒತ್ತಡವಿಲ್ಲದೆ ತಮ್ಮ ಬೋಧನೆ, ಸಂಶೋಧನೆ ಮತ್ತು ಅಭಿಪ್ರಾಯಗಳನ್ನು ವ್ಯಕ್ತಪಡಿಸುವ ಹಕ್ಕು. ವಿಶ್ವವಿದ್ಯಾಲಯ ಸ್ವಾಯತ್ತತೆ ಎಂದರೆ ಸಂಸ್ಥೆಗಳು ತಮ್ಮ ಆಡಳಿತ, ಪಠ್ಯಕ್ರಮ ಮತ್ತು ಸಂಶೋಧನೆಯನ್ನು ಸ್ವತಂತ್ರವಾಗಿ ನಿರ್ಧರಿಸುವ ಸಾಮರ್ಥ್ಯ.

ಶೈಕ್ಷಣಿಕ ಸ್ವಾತಂತ್ರ್ಯದ ಮಹತ್ವವನ್ನು ಎತ್ತಿ ಹಿಡಿಯುವುದು:

ವಿಶ್ವವಿದ್ಯಾಲಯಗಳ ಮುಖ್ಯಗುರಿ. ಸತ್ಯಾನ್ವೇಷಣೆ ಮಾಡುವುದು ಕೂಡ. ಇದಕ್ಕೆ ಮುಕ್ತ ಚಿಂತನೆ ಮತ್ತು ಸ್ವತಂತ್ರ ಸಂಶೋಧನೆ ಅಗತ್ಯ. ಶೈಕ್ಷಣಿಕ ಸ್ವಾತಂತ್ರ್ಯವು ಹೊಸ ವಿಚಾರಗಳಿಗೆ ಅವಕಾಶ ನೀಡಿ, ವೈಜ್ಞಾನಿಕ ಮನೋಭಾವ ಮತ್ತು ವಿಮರ್ಶಾತ್ಮಕ ಚಿಂತನೆಯನ್ನು ಬೆಳೆಸುತ್ತದೆ. ಇದು ಸಮಾಜದ ಬೌದ್ಧಿಕ ಪ್ರಗತಿಗೆ ಮೂಲ.

ವಿಶ್ವವಿದ್ಯಾಲಯ ಸ್ವಾಯತ್ತತೆಯ ಅಗತ್ಯತೆ ಸ್ವಾಯತ್ತತೆ ಇಲ್ಲದಿದ್ದರೆ ವಿಶ್ವವಿದ್ಯಾಲಯಗಳು ತಮ್ಮ ಧ್ಯೇಯ ಸಾಧಿಸಲು ಸಾಧ್ಯವಿಲ್ಲ. ರಾಜಕೀಯ ಹಸ್ತಕ್ಷೇಪ, ಆರ್ಥಿಕ ಒತ್ತಡ ಮತ್ತು ಬಾಹ್ಯ ನಿಯಂತ್ರಣಗಳು ಗುಣಮಟ್ಟವನ್ನು ಕುಸಿಯುವಂತೆ ಮಾಡುತ್ತವೆ. ಸ್ವಾಯತ್ತತೆಯು ಸಂಸ್ಥೆಗಳು ಸಮಾಜದ ಬದಲಾವಣೆಗಳಿಗೆ ಹೊಂದಿಕೊಳ್ಳಲು ಮತ್ತು ನವೀನತೆಯನ್ನು ಉತ್ತೇಜಿಸಲು ಸಹಕಾರಿ.

ಇಂದಿನ ಸವಾಲುಗಳು: ರಾಜಕೀಯ ಮತ್ತು ಆರ್ಥಿಕ ಹಸ್ತಕ್ಷೇಪ-

ನಿರ್ಧಾರಗಳಲ್ಲಿ ರಾಜಕೀಯ ಪ್ರಭಾವ ಮತ್ತು ಮಾರುಕಟ್ಟೆ ಒತ್ತಡಗಳು ಶಿಕ್ಷಣದ ಮಾನವೀಯ ಮೌಲ್ಯಗಳನ್ನು ಹಾನಿಗೊಳಿಸುತ್ತವೆ.

ಗುಣಮಟ್ಟ ಮತ್ತು ಹೊಣೆಗಾರಿಕೆ-ವಿದ್ಯಾರ್ಥಿ ಸಂಖ್ಯೆ ಹೆಚ್ಚಳದೊಂದಿಗೆ ಗುಣಮಟ್ಟ ಕಾಪಾಡುವುದು ಮತ್ತು ಪಾರದರ್ಶಕತೆ ನಿರ್ವಹಿಸುವುದು ದೊಡ್ಡ ಸವಾಲು.

ಸಂಶೋಧನಾ ಸ್ವಾತಂತ್ರ್ಯ-ರಾಜಕೀಯ-ಆರ್ಥಿಕ ಒತ್ತಡಗಳು ಸಂಶೋಧನೆಯ ನಿಷ್ಪಕ್ಷಪಾತತೆಯನ್ನು ಭಂಗಗೊಳಿಸುತ್ತವೆ.

ಸಾಮಾಜಿಕ ಬದ್ಧತೆ-ಸಹಿಷ್ಣುತೆ, ಶಾಂತಿ ಮತ್ತು ವಿಭಿನ್ನ ಅಭಿಪ್ರಾಯಗಳನ್ನು ಗೌರವಿಸುವ ಸಂಸ್ಕೃತಿಯನ್ನು ಬೆಳೆಸುವುದು ವಿಶ್ವವಿದ್ಯಾಲಯಗಳ ಜವಾಬ್ದಾರಿ.

ಸಮಾಜ ಮತ್ತು ವಿಶ್ವವಿದ್ಯಾಲಯಗಳ ಸಂಬಂಧ ವಿಶ್ವವಿದ್ಯಾಲಯಗಳು ಸಮಾಜದಿಂದ ಬೇರ್ಪಟ್ಟವಲ್ಲ. ಸಾಂಸ್ಕೃತಿಕ ವೈವಿಧ್ಯ, ಪರಿಸರ, ಸಾಮಾಜಿಕ ನ್ಯಾಯ ಮತ್ತು ಪ್ರಜಾಪ್ರಭುತ್ವ ಮೌಲ್ಯಗಳನ್ನು ಬೆಳೆಸುವಲ್ಲಿ ಅವು ಪ್ರಮುಖ ಪಾತ್ರ ವಹಿಸಬೇಕು.

ಭವಿಷ್ಯದ ದಿಕ್ಕುಗಳು ಮತ್ತು ಶಿಫಾರಸ್ಸುಗಳು:

ವಿಶ್ವವಿದ್ಯಾಲಯಗಳಿಗೆ ಪೂರ್ಣ ಆಡಳಿತಾತ್ಮಕ ಮತ್ತು ಶೈಕ್ಷಣಿಕ ಸ್ವಾತಂತ್ರ್ಯ ನೀಡುವುದು, ರಾಜಕೀಯ ಹಸ್ತಕ್ಷೇಪವನ್ನು ಕಡಿಮೆಗೊಳಿಸುವುದು,

ಬೋಧನೆ, ಸಂಶೋಧನೆ ಮತ್ತು ಗುಣಮಟ್ಟಕ್ಕೆ ಸಮಾನ ಆದ್ಯತೆ, ವಿದ್ಯಾರ್ಥಿ ಅಗತ್ಯಕ್ಕೆ ಅನುಗುಣವಾದ ಪಠ್ಯಕ್ರಮ ಮತ್ತು ಅಂತರರಾಷ್ಟ್ರೀಯ ಸಹಕಾರ,

ಶಿಕ್ಷಕ-ವಿದ್ಯಾರ್ಥಿಗಳಲ್ಲಿ ವಿಮರ್ಶಾತ್ಮಕ ಮತ್ತು ವೈಜ್ಞಾನಿಕ ಚಿಂತನೆ ಬೆಳೆಸುವುದು, ಒಟ್ಟಾರೆಯಾಗಿ ಹೇಳುವುದೆಂದರೆ ಶೈಕ್ಷಣಿಕ ಸ್ವಾತಂತ್ರ್ಯ ಮತ್ತು ವಿಶ್ವವಿದ್ಯಾಲಯ ಸ್ವಾಯತ್ತತೆಗಳು ಉನ್ನತ ಶಿಕ್ಷಣದ ಮೂಲಸ್ತಂಭಗಳು. ಇವುಗಳನ್ನು ಬಲಪಡಿಸುವುದು ಕೇವಲ ಶಿಕ್ಷಣದ ಪ್ರಶ್ನೆಯಲ್ಲ, ಪ್ರಜಾಪ್ರಭುತ್ವ ಮತ್ತು ಸಾಮಾಜಿಕ ಪ್ರಗತಿಯ ಅವಿಭಾಜ್ಯ ಅಂಶ. ಸ್ವಾತಂತ್ರ್ಯ ಮತ್ತು ಹೊಣೆಗಾರಿಕೆಯ ನಡುವಿನ ಸಮತೋಲನದಿಂದ ಮಾತ್ರವೇ ವಿಶ್ವವಿದ್ಯಾಲಯಗಳು ಭವಿಷ್ಯದ ಸಮಾಜವನ್ನು ಬೌದ್ಧಿಕವಾಗಿ ಮುನ್ನಡೆಸಲು ಸಾಧ್ಯ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.