ತೆಗ್ಗಿನಮಠದಿಂದ ಅನ್ನ, ಅಕ್ಷರ ಜತೆ ಧರ್ಮಕಾರ್ಯ: ಸಂಸದ ಇ.ತುಕಾರಾಂ
ಸಾರಾಂಶ
ಅನ್ನ ಅಕ್ಷರದ ಜೊತೆಗೆ ಧರ್ಮ ಕಾರ್ಯಗಳು ನಡೆಯುತ್ತಿರುವುದು ಶ್ಲಾಘನೀಯ
ಹರಪನಹಳ್ಳಿ: ಇಲ್ಲಿಯ ಪ್ರಸಿದ್ದ ತೆಗ್ಗಿನಮಠ ಸಂಸ್ಥೆಯಿಂದ ಅನ್ನ ಅಕ್ಷರದ ಜೊತೆಗೆ ಧರ್ಮ ಕಾರ್ಯಗಳು ನಡೆಯುತ್ತಿರುವುದು ಶ್ಲಾಘನೀಯ ಎಂದು ಸಂಸದ ಇ.ತುಕಾರಾಂ ಹೇಳಿದ್ದಾರೆ.ಅವರು ನಗರದ ತೆಗ್ಗಿನಮಠದ ಸಮೀಪ ಚಂದ್ರಶೇಖರ ಶಿವಾಚಾರ್ಯರ 79ನೇ ಪುಣ್ಯಾರಾಧನೆ ಅಂಗವಾಗಿ ಸಾಮೂಹಿಕ ವಿವಾಹ, ಧರ್ಮಸಭೆ ಹಾಗೂ ಪ್ರಶಸ್ತಿ ಪ್ರದಾನ ಸಮಾರಂಭ ಉದ್ಘಾಟಿಸಿ ಶನಿವಾರ ಮಾತನಾಡಿದರು.
ಸಾನ್ನಿಧ್ಯ ವಹಿಸಿದ್ದ ತೆಗ್ಗಿನಮಠದ ವರಸದ್ಯೋಜಾತ ಶಿವಾಚಾರ್ಯ ಮಾತನಾಡಿ, ಸಾಮೂಹಿಕ ವಿವಾಹಗಳು ನಮ್ಮ ಋಷಿ ಸಂಸ್ಕೃತಿಯ ಪುನರ್ಜೀವನವಾಗಿದೆ. ಇಂದು ನಡೆಯುತ್ತಿರುವ ಸಾಮೂಹಿಕ ವಿವಾಹಗಳು ಅನೇಕ ಜೋಡಿಗಳ ಮದುವೆಯಲ್ಲ. ಅದು ಅನೇಕ ಕುಟುಂಬಗಳ ಕನಸುಗಳಿಗೆ ದೀಪ ಹಚ್ಚುವ ಪುಣ್ಯ ಕಾರ್ಯ ಎಂದು ಹೇಳಿದರು.
ಇಂದು ಆಭರಣಗಳ ಸಂಖ್ಯೆ ಹೆಚ್ಚಾಗಿದೆ. ಆದರೆ ಸಂಬಂಧಗಳ ಸಂಖ್ಯೆ ಕಡಿಮೆಯಾಗಿದೆ. ಜಾತಿ, ಧರ್ಮ, ಮತ- ಪಂಥ, ಹಣದ ಗೋಡೆಗಳನ್ನು ಮೀರಿದೆ. ಸಾಮೂಹಿಕ ವಿವಾಹಗಳು ಎಂದು ಅರ್ಥೈಸಿದರು.ಶಾಸಕಿ ಎಂ.ಪಿ.ಲತಾ ಅಧ್ಯಕ್ಷತೆ ವಹಿಸಿ ಮಾತನಾಡಿ, ನೂತನ ದಂಪತಿಗಳು ಹಾಲು ಜೇನಿನಂತೆ ಸಮಭಾವ ಸಮಚಿತ್ತದಿಂದ ಜೀವನ ಸಾಗಿಸಬೇಕು ಎಂದು ಸಲಹೆ ನೀಡಿದರು.
ಆಸ್ಟ್ರೇಲಿಯಾದಲ್ಲಿರುವ ಫಾರ್ಮಸುಟಿಕಲ್ ವ್ಯವಸ್ಥಾಪಕಿ ನಿರ್ದೇಶಕಿಯಾಗಿರುವ ಡಾ.ಜ್ಯೋತಿ ಕಿರಣಕುಮಾರ ಅವರಿಗೆ ತೆಗ್ಗಿನಮಠದಿಂದ ಪ್ರೇರಣಾದಾಯಕ ಮಹಿಳಾ ನಾಯಕಿ ಎಂಬ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ತೆಗ್ಗಿನಮಠದ ಕಾರ್ಯದರ್ಶಿ ಡಾ.ಟಿ.ಎಂ.ಚಂದ್ರಶೇಖರಯ್ಯನವರು ಪ್ರಾಸ್ತಾಕವಾಗಿ ಮಾತನಾಡಿದರು. 21 ಜೋಡಿ ವಧು-ವರರು ದಾಂಪತ್ಯಕ್ಕೆ ಕಾಲಿಟ್ಟರು.