ನಕಲಿ ದಾಖಲೆ ಸೃಷ್ಟಿಸಿ ವಿದ್ಯುತ್ ಸಂಪರ್ಕ
)
ಸಾರಾಂಶ
ನಕ್ಷೆ ಉಲ್ಲಂಘಿಸಿ ನಿರ್ಮಾಣಗೊಂಡ ಕಟ್ಟಡಗಳಿಗೆ ವಿದ್ಯುತ್ ಸಂಪರ್ಕ ನೀಡುವಂತಿಲ್ಲ ಎಂಬ ಸುಪ್ರೀಂಕೋರ್ಟ್ ಆದೇಶಕ್ಕೆ ಪ್ರತಿಯಾಗಿ ರಾಜ್ಯ ಸರ್ಕಾರವು 1200 ಚದರಡಿಗಿಂತ ಕಡಿಮೆ ಇರುವವರಿಗೆ ಸಂಪರ್ಕ ನೀಡಬಹುದೆನ್ನುವ ನಿರ್ಧಾರವನ್ನು ಕೆಲವು ಗುತ್ತಿಗೆದಾರರು ನಕಲಿ ದಾಖಲೆಗಳ ಮೂಲಕ ಹೆಚ್ಚುವರಿ ಹಣ ಪಡೆಯುವ ಮೂಲಕ ಸಂಪರ್ಕ ಕಲ್ಪಿಸಿಕೊಟ್ಟ ಕೋಟ್ಯಂತರ ರು. ವಂಚನೆಯ ಪ್ರಕರಣ ಬೆಳಕಿಗೆ ಬಂದಿದೆ.
ಗೋಪಾಲ್ ಯಡಗೆರೆ
ನಕ್ಷೆ ಉಲ್ಲಂಘಿಸಿ ನಿರ್ಮಾಣಗೊಂಡ ಕಟ್ಟಡಗಳಿಗೆ ವಿದ್ಯುತ್ ಸಂಪರ್ಕ ನೀಡುವಂತಿಲ್ಲ ಎಂಬ ಸುಪ್ರೀಂಕೋರ್ಟ್ ಆದೇಶಕ್ಕೆ ಪ್ರತಿಯಾಗಿ ರಾಜ್ಯ ಸರ್ಕಾರವು 1200 ಚದರಡಿಗಿಂತ ಕಡಿಮೆ ಇರುವವರಿಗೆ ಸಂಪರ್ಕ ನೀಡಬಹುದೆನ್ನುವ ನಿರ್ಧಾರವನ್ನು ಕೆಲವು ಗುತ್ತಿಗೆದಾರರು ನಕಲಿ ದಾಖಲೆಗಳ ಮೂಲಕ ಹೆಚ್ಚುವರಿ ಹಣ ಪಡೆಯುವ ಮೂಲಕ ಸಂಪರ್ಕ ಕಲ್ಪಿಸಿಕೊಟ್ಟ ಕೋಟ್ಯಂತರ ರು. ವಂಚನೆಯ ಪ್ರಕರಣ ಬೆಳಕಿಗೆ ಬಂದಿದೆ.
ಸರ್ಕಾರದ ನಿಯಮವನ್ನು ತಮಗೆ ಬೇಕಾದ ರೀತಿಯಲ್ಲಿ ನಕಲಿ ದಾಖಲೆ ಮೂಲಕ ಮೆಸ್ಕಾಂ ಅಧಿಕಾರಿಗಳಿಗೇ ಚಳ್ಳೆಹಣ್ಣು ತಿನಿಸಿ ಹೆಚ್ಚುವರಿ ಹಣ ನೀಡಿದ ಗ್ರಾಹಕರಿಗೆ ಈ ಕೆಲ ಗುತ್ತಿಗೆದಾರರು ವಿದ್ಯುತ್ ಸಂಪರ್ಕ ನೀಡಿದ್ದಾರೆ. ಇದು ಬೆಳಕಿಗೆ ಬರುತ್ತಿದ್ದಂತೆ ಮೆಸ್ಕಾಂನ ಸಹಾಯಕ ಕಾರ್ಯ ನಿರ್ವಾಹಕ ಅಭಿಯಂತರರು ನಕಲಿ ದಾಖಲೆ ನೀಡಿ, ನಿಯಮ ಮೀರಿ ವಿದ್ಯುತ್ ಪಡೆದ ಗ್ರಾಹಕರಿಗೆ ನೋಟಿಸ್ ಜಾರಿಗೊಳಿಸಿದ್ದಾರೆ.ಶಿವಮೊಗ್ಗ ಉಪ ವಿಭಾಗವೊಂದರಲ್ಲಿಯೇ ಸುಮಾರು 300 ಸಂಪರ್ಕಗಳನ್ನು ಈ ರೀತಿ ನಿಯಮ ಬಾಹಿರವಾಗಿ ದಾಖಲೆ ಸೃಷ್ಟಿಸಿ ಸಂಪರ್ಕ ಕೊಡಲಾಗಿದೆ.
ಇದರಿಂದಾಗಿ ಸಾಮಾನ್ಯ ಜನರು ತೀವ್ರ ಸಮಸ್ಯೆಗೆ ಈಡಾದರು. ಹೇಗೆ ಕಟ್ಟಿದರೂ ಸೆಟ್ ಬ್ಯಾಕ್ ಉಲ್ಲಂಘನೆ ಇದ್ದೇ ಇರುತ್ತಿತ್ತು. ಮುಖ್ಯವಾಗಿ ಮಧ್ಯಮ, ಕೆಳ ಮಧ್ಯಮ ಮತ್ತು ಬಡ ವರ್ಗದವರು ತಾವು ಮನೆ ನಿರ್ಮಿಸಿಕೊಂಡರೂ ವಿದ್ಯುತ್ ಸಂಪರ್ಕ ಇಲ್ಲದೆ ಒದ್ದಾಡುವಂತಾಯಿತು. ಇದನ್ನು ಅರಿತುಕೊಂಡ ರಾಜ್ಯ ಸರ್ಕಾರವು 1200 ಚದರಡಿ ಮತ್ತು ಇದಕ್ಕಿಂತ ಕಡಿಮೆ ಅಳತೆಯಲ್ಲಿ ನಿರ್ಮಾಣಗೊಂಡ ಮನೆಗಳಿಗೆ ವಿದ್ಯುತ್ ಸಂಪರ್ಕ ನೀಡುವ ತಿದ್ದುಪಡಿ ಆದೇಶವನ್ನು ಹೊರಡಿಸಿತು.
ದಾಖಲೆ ತಿದ್ದುವುದು ಹೇಗೆ?: ಇದಕ್ಕೆ ಪರ್ಯಾಯ ಮಾರ್ಗ ಹುಡುಕುತ್ತಿರುವ ಹೊತ್ತಿನಲ್ಲಿ ಕೆಲವು ಗುತ್ತಿಗೆದಾರರು ಅಧಿಕಾರಿಗಳ ದಾರಿ ತಪ್ಪಿಸುವ ಮಾರ್ಗ ಕಂಡು ಹಿಡಿದರು.
ಸ್ಥಳ ಪರೀಕ್ಷಿಸಿ ಇದಕ್ಕೆ ಒಪ್ಪಿಗೆ ಸೂಚಿಸಬೇಕಾದ ಅಧಿಕಾರಿಗಳೂ ಈ ‘ಕೆಲ’ ಗುತ್ತಿಗೆದಾರರಿಂದ ಪ್ರಭಾವಕ್ಕೆ ಒಳಗಾಗಿ ಯಾವುದೇ ರೀತಿಯ ಸ್ಥಳ ವೀಕ್ಷಣೆ ನಡೆಯದೆ ಒಪ್ಪಿಗೆ ನೀಡುತ್ತಿದ್ದರು. ಈ ರೀತಿ ಫೈಲುಗಳು ಒಂದೊಂದೇ ಟೇಬಲ್ ಗಳನ್ನು ಯಶಸ್ವಿಯಾಗಿ ದಾಟಿ ಅಂತಿಮವಾಗಿ ಅನುಮೋದನೆಗೊಂಡು ವಿದ್ಯುತ್ ಸಂಪರ್ಕ ನೀಡುವ ಕೊನೆ ಹಂತಕ್ಕೆ ತಲುಪುತ್ತಿದ್ದವು.
ಪತ್ತೆಯಾಗಿದ್ದು ಹೇಗೆ?: ನ್ಯಾಯಾಲಯ ಮತ್ತು ಸರ್ಕಾರದ ನಿರ್ಧಾರದಿಂದ ಕೆಲಸವಿಲ್ಲದೆ ಗುತ್ತಿಗೆದಾರರು ಒದ್ಡಾಡುತ್ತಿದ್ದರು. ಈ ಸಂದರ್ಭದಲ್ಲಿ ಕೆಲವೇ ಗುತ್ತಿಗೆದಾರರು ಮಾತ್ರ ವಿದ್ಯುತ್ ಸಂಪರ್ಕ ನೀಡುವ ಕೆಲಸ ಪಡೆಯುತ್ತಿದ್ದುದು ಉಳಿದ ಗುತ್ತಿಗೆದಾರರಲ್ಲಿ ಆಶ್ಚರ್ಯ ಮೂಡಿಸಿತ್ತು. ಇದರ ಬೆನ್ನು ಹತ್ತಿ ಹೋದಾಗ ಈ ನಕಲಿ ದಾಖಲೆ ಸೃಷ್ಟಿ ಪ್ರಕರಣ ಬೆಳಕಿಗೆ ಬಂದಿತ್ತು.
ಮುಂದೇನು ಎಂಬುದನ್ನು ಇಲಾಖೆಯವರೇ ಹೇಳಬೇಕು. ಆದರೆ ಈ ಬಗ್ಗೆ ಮಾಹಿತಿ ನೀಡಲು ಯಾರೂ ಸಿದ್ಧರಿಲ್ಲ.
ನಮಗೆ ಸಂಪರ್ಕ ನೀಡುವುದಾಗಿಯೂ, ಇದಕ್ಕಾಗಿ ಸ್ವಲ್ಪ ಹೆಚ್ಚಿನ ಹಣ ಖರ್ಚು ಮಾಡಬೇಕು ಎಂಬುದಾಗಿಯೂ ಗುತ್ತಿಗೆದಾರರು ತಿಳಿಸಿದ್ದರು. ಮನೆ ನಿರ್ಮಿಸಿ ವಿದ್ಯುತ್ ಸಂಪರ್ಕ ಸಿಗದೆ ಒದ್ದಾಡುತ್ತಿದ್ದ ನಾವು ಇದರ ಹಿಂದೆ ಏನೇನು ಇದೆ ಎಂಬುದನ್ನು ಅರಿಯದೆ ಹಣ ನೀಡಿ ಸಂಪರ್ಕ ಪಡೆದೆವು. ಆದರೆ ಈಗ ನಮಗೆ ನೋಟೀಸ್ ಜಾರಿಗೊಳಿಸಲಾಗಿದೆ. ಇದು ಯಾವ ನ್ಯಾಯ?
-ಹೆಸರು ಹೇಳಲು ಇಚ್ಚಿಸದ ಗ್ರಾಹಕರು.