ವಿಂಡ್ ಮಿಲ್ ಅಳವಡಿಕೆ ಖಂಡಿಸಿ ರೈತರ ಪ್ರತಿಭಟನೆ
ಸಾರಾಂಶ
ದೈತ್ಯ ಪವನ ವಿದ್ಯುತ್ ಯಂತ್ರಗಳ ಹಾವಳಿಯಿಂದಾಗಿ ಜಗಳೂರು ತಾಲೂಕಿನ ಗಡಿಗ್ರಾಮ ಹಿರೇಮಲ್ಲನಹೊಳೆ ಭಾಗದ ರೈತರು ದಿನದಿನಕ್ಕೂ ಹೈರಾಣಾಗುತ್ತಿದ್ದಾರೆ. ಎತ್ತ ನೋಡಿದರತ್ತ ಕ್ಲೀನ್ ಮ್ಯಾಕ್ಸ್ ವಿಂಡ್ ಫ್ಯಾನ್ ಕಂಪನಿ ಯಂತ್ರಗಳು ಎದ್ದು ನಿಲ್ಲುತ್ತಿವೆ. ಕಂಪನಿ ಹಾವಳಿಯಿಂದಾಗಿ ರೈತರ ಬದುಕೇ ನರಕವಾಗುತ್ತಿದೆ ಎಂದು ಆರೋಪಿಸಿ ಗುರುವಾರ ರೈತರು ಪ್ರತಿಭಟಿಸಿದರು.
- ಜಗಳೂರು ತಾಲೂಕು ಗಡಿಗ್ರಾಮ ಹಿರೇಮಲ್ಲನಹೊಳೆ, ಹಾಲೇಹಳ್ಳಿ ರೈತರ ತೀವ್ರ ಆಕ್ಷೇಪ - - - ಕನ್ನಡಪ್ರಭ ವಾರ್ತೆ, ದಾವಣಗೆರೆ/ಜಗಳೂರು
ಹಿರೇಮಲ್ಲನಹೊಳೆ ಭಾಗದಲ್ಲಿ ವಿಂಡ್ ಮಿಲ್ಗಳ ಸಂಖ್ಯೆ ಹೆಚ್ಚುತ್ತಿದೆ. ಈ ಹಿನ್ನೆಲೆಯಲ್ಲಿ ಸ್ಥಳೀಯ ಗ್ರಾಪಂ, ತಾಲೂಕು ಆಡಳಿತದ ಪರವಾನಿಗೆ ಪಡೆಯದೇ ಬೃಹತ್ ವಿಂಡ್ ಮಿಲ್ಗಳನ್ನು ಅಳವಡಿಸುತ್ತಿವೆ. ಇದರಿಂದ ರೈತರ ಬದುಕು, ಕೃಷಿ ಚಟುವಟಿಕೆಗಳ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತಿದೆ ಎಂದು ರೈತರು ಆತಂಕಗೊಂಡಿದ್ದಾರೆ.
ರೈತ ಬಿ.ಆರ್.ಬಾಣೇಶ ಮಾತನಾಡಿ, ಗ್ರಾ.ಪಂ.ನಿಂದಾಗಲೀ, ಜಗಳೂರು ತಾಲೂಕು ಆಡಳಿತದಿಂದಾಗಲೀ ಪವನ ವಿದ್ಯುತ್ ಸ್ಥಾವರ ಅಳವಡಿಸುತ್ತಿರುವವರು ಅನುಮತಿ ಪಡೆದಿಲ್ಲ. ವಿಂಡ್ ಮಿಲ್ಗಳಿಂದಾಗಿ ಬೆಳೆಗಳ ಮೇಲೆ ವ್ಯತಿರಿಕ್ತ ಪರಿಣಾಮ ಉಂಟಾಗುತ್ತಿದೆ. ನಿರಂತರವಾಗಿ ವಿಂಡ್ ಮಿಲ್ ವಾಹನಗಳ ಸಂಚಾರದಿಂದಾಗಿ ಕೃಷಿ ಭೂಮಿ ಹಾಳಾಗುತ್ತಿದೆ. ಕೃಷಿ ಮಾಡಲಾಗದೇ, ಗಾಳಿ ಯಂತ್ರ ತಿರುಗುವುದು, ಅಳವಡಿಸುವುದನ್ನೇ ನೋಡಿ ನಿಲ್ಲಬೇಕಾದ ಸ್ಥಿತಿ ಇದೆ ಎಂದು ಕಿಡಿಕಾರಿದರು.ಕ್ಲೀನ್ ಮ್ಯಾಕ್ಸ್ ವಿಂಡ್ ಫ್ಯಾನ್ ಕಂಪನಿ ರಾತ್ರೋರಾತ್ರಿ ವಿಂಡ್ ಮಿಲ್ ಅಳವಡಿಕೆ ಕಾಮಗಾರಿ ಆರಂಭಿಸಿದೆ. ಇಲ್ಲಿನ ಕೆಲ ರೈತರನ್ನು ಮಧ್ಯವರ್ತಿಗಳಾಗಿ ನೇಮಿಸಿಕೊಂಡು ಕೆಲ ರೈತರಿಗೆ ಆಮಿಷವೊಡ್ಡಿ ಭಯದ ವಾತಾವರಣ ಸೃಷ್ಟಿಸಿ, ಕಾರ್ಯ ಸಾಧನೆ ಮಾಡಿಕೊಳ್ಳುತ್ತಿದೆ. ಕಂಪನಿ ಅಧಿಕಾರಿಗಳನ್ನು ಕೇಳಿದರೆ ಇದು ಕೇಂದ್ರ ಸರ್ಕಾರದ ಅಧೀನದಲ್ಲಿ ನಡೆಯುತ್ತದೆ. ಇದರ ಹಿಂದೆ ತುಂಬಾ ಪ್ರಭಾವಿಗಳಿದ್ದಾರೆ, ನೀವು ಪ್ರಶ್ನಿಸಿದರೆ ನಿಮ್ಮ ಭವಿಷ್ಯಕ್ಕೆ ಕುತ್ತು ಬರುತ್ತದೆಂದು ಭಯ ಹುಟ್ಟುಹಾಕಲು ಯತ್ನಿಸುತ್ತಿದ್ದಾರೆ ಎಂದು ದೂರಿದರು.
ವಿಂಡ್ ಮಿಲ್ ಅಳವಡಿಸುವುದರಿಂದ 2 ಕಿ.ಮೀ.ವರೆಗೂ ಅದರ ಕರ್ಕಶ ಸದ್ದು ಹೊರಬರುತ್ತದೆ. ಇದರಿಂದ ಜನರಷ್ಟೇ ಅಲ್ಲ, ಜಾನುವಾರು, ಪಕ್ಷಿಗಳು, ವಿಶೇಷವಾಗಿ ನವಿಲು ಸೇರಿದಂತೆ ಅಪರೂಪದ ಪಕ್ಷಿಗಳು, ಕಾಡು ಪ್ರಾಣಿಗಳಿಗೂ ತೊಂದರೆಯಾಗಲಿದೆ. ಅವುಗಳ ಸಂತತಿಯೇ ಈ ಭಾಗದಲ್ಲಿ ನಶಿಸಿ ಹೋಗುವ ಅಪಾಯ ಇಲ್ಲದಿಲ್ಲ. ಕಿರಿದಾದ ರಸ್ತೆಗಳಲ್ಲಿ ಬೃಹತ್ ವಾಹನ ಸಂಚಾರದಿಂದ ರಸ್ತೆ ಹಾಳಾಗಿವೆ. ಇದೆಲ್ಲಾ ಗೊತ್ತಿದ್ದರೂ ಆಡಳಿತ ಯಂತ್ರ, ಅಧಿಕಾರಿಗಳು ಯಾಕೆ ರೈತರು, ಗ್ರಾಮಸ್ಥರ ಪರ ಧ್ವನಿ ಎತ್ತುತ್ತಿಲ್ಲ ಎಂದು ಪ್ರಶ್ನಿಸಿದರು.
- - -
- ಬಿ.ಆರ್.ಬಾಣೇಶ, ಹಿರೇಮಲ್ಲನಹೊಳೆ ರೈತ
- - - -16ಕೆಡಿವಿಜಿ3, 4, 5: