ಸ್ಮಶಾನಕ್ಕೆ ಶವ ಹೊತ್ತೊಯ್ಯಲು ದಾರಿ ಹುಡುಕಿ ಕೊಡಿ.!

KannadaprabhaNewsNetwork |  
Published : Nov 22, 2026, 02:15 AM IST
ಹೂವಿನಹಡಗಲಿ ತಾಲೂಕಿನ ನವಲಿ ಗ್ರಾಮದ ಜರುಗಿದ ಪ್ರಜಾಸೇವೆ ಆಂದೋಲನಕ್ಕೆ ಚಾಲನೆ ನೀಡಿದ ಎಡಿಸಿ ಪಿ.ಎನ್‌.ಲೋಕೇಶ.ಪ್ರಜಾಸೇವಾ ಆಂದೋಲನದಲ್ಲಿ ಅರ್ಜಿ ಸಲ್ಲಿಸಲು ಬಂದ ವಯೋವೃದೆ ಜಮಾಲ್‌ ಬೀ.. | Kannada Prabha

ಸಾರಾಂಶ

ಅಕ್ಕಪಕ್ಕದ ರೈತರ ಮನವೊಲಿಸುವುದು ಇಲ್ಲವೇ ಸರ್ಕಾರದ ಕಾಯ್ದೆ ಬಳಸಿ ಸ್ಮಶಾನಕ್ಕೆ ದಾರಿ ಮಾಡಿ ಕೊಡುತ್ತೇವೆ.

ಹೂವಿನಹಡಗಲಿ: ನಮ್ಮೂರಿನ ಸ್ಮಶಾನಕ್ಕೆ ಶವಗಳನ್ನು ಹೊತ್ತೊಯ್ಯಲು 64 ವರ್ಷಗಳಿಂದ ದಾರಿಗಾಗಿ ಅರ್ಜಿ ಸಲ್ಲಿಸಿ ಕಚೇರಿಗೆ ಅಲೆದು ರೋಸಿ ಹೋಗಿದ್ದೇವೆ. ಮಳೆಗಾಲದಲ್ಲಿ ನದಿ ತೀರದ ಕೆಸರಿನಲ್ಲೇ ಹೆಣ ಸುಡುತ್ತೇವೆ. ನಮ್ಮ ಪಾಡು ಆ ದೇವರಿಗೆ ಪ್ರೀತಿ, ನೀವಾದರೂ ಗಮನ ಹರಿಸಿ ಎಂದು ನವಲಿ ಜನ ಅಪರ ಜಿಲ್ಲಾಧಿಕಾರಿ ಪಿ.ಎನ್‌. ಲೋಕೇಶ ಮುಂದೆ ಪರಿ ಪರಿಯಾಗಿ ಬೇಡಿಕೊಂಡ ಪ್ರಸಂಗ ಜರುಗಿತು.

ತಾಲೂಕಿನ ನವಲಿ ಗ್ರಾಮದಲ್ಲಿ ತಾಲೂಕಾಡಳಿತ ಆಯೋಜಿಸಿದ್ದ ಪ್ರಜಾಸೇವೆ ಆಂದೋಲನ ಕಾರ್ಯಕ್ರಮದಲ್ಲಿ ಅರ್ಜಿ ಸಲ್ಲಿಸುತ್ತಾ ನವಲಿ ಸ್ಮಶಾನ ಗ್ರಾಪಂ ಅನುದಾನದಲ್ಲಿ ಅಭಿವೃದ್ಧಿ ಪಡಿಸಿದ್ದು, ಕೆಲ ಜನ ಶವಗಳನ್ನು ಜಮೀನುಗಳಲ್ಲಿ ಹೂಳುತ್ತಾರೆ, ಉಳಿದವರು ನದಿ ತೀರದಲ್ಲಿ ಸುಡುತ್ತಾರೆ, ಮಳೆಗಾಲದಲ್ಲಿ ಕೆಸರು ಗದ್ದೆಯಂತಿರುವ ರಸ್ತೆ ಮಧ್ಯೆ ನದಿ ತೀರಕ್ಕೆ ಹೋಗುತ್ತೇವೆ, ಆದರಿಂದ ಕೂಡಲೇ ನಮ್ಮೂರಿನ ಸ್ಮಶಾನಕ್ಕೆ ದಾರಿ ಹುಡುಕಿಕೊಡಿ ಈ ಕುರಿತು 8 ಬಾರಿ ಅರ್ಜಿ ಸಲ್ಲಿಸಿದ್ದೇವೆ ಯಾರು ಗಮನ ಹರಿಸಿಲ್ಲ ಎಂದು ಲಕ್ಷ್ಮಣ, ಪ್ರಶಾಂತ, ವೀರೇಶ ಸೇರಿದಂತೆ ಇತರರು ಅಧಿಕಾರಿಗಳ ಮುಂದೆ ತಮ್ಮ ಅಳಲನ್ನು ತೊಡಿಕೊಂಡರು.

ಅಕ್ಕಪಕ್ಕದ ರೈತರ ಮನವೊಲಿಸುವುದು ಇಲ್ಲವೇ ಸರ್ಕಾರದ ಕಾಯ್ದೆ ಬಳಸಿ ಸ್ಮಶಾನಕ್ಕೆ ದಾರಿ ಮಾಡಿ ಕೊಡುತ್ತೇವೆಂದು ಎಡಿಸಿ ಪಿ.ಎನ್‌.ಲೋಕೇಶ ಭರವಸೆ ನೀಡಿದರು.

ನವಲಿ ಸರ್ಕಾರಿ ಶಾಲೆಗೆ ಕೋಣೆ, ಶಿಕ್ಷಕರ ಕೊರತೆ ನೀಗಿಸಬೇಕು, ಹಕ್ಕು ಪತ್ರ ಮಂಜೂರಾಗಿವೆ ಆದರೆ ಫಲಾನುಭವಿಗಳಿಗೆ ಸಿಕ್ಕಿಲ್ಲ ಹೀಗೆ ಹತ್ತಾರು ಸಮಸ್ಯೆಗಳ ಕುರಿತು ಅರ್ಜಿ ಸಲ್ಲಿಕೆಯಾದವು.

ನಾನು ಬಡವಿ ನನಗೆ ಹಿಂದೂ-ಮುಂದೂ ಯಾರು ಇಲ್ಲ, ಸರ್ಕಾರದ ಸೆರ ಅಕ್ಕಿನೂ ಸಿಗುತ್ತಿಲ್ಲ, ರೊಕ್ಕನೂ ಬರುತ್ತಿಲ್ಲ ಹೊಟ್ಟೆ ಹೊರೆಯಲು ಭಿಕ್ಷೆ ಬೇಡುತ್ತಿರುವೆ, ನನಗೆ ಅಕ್ಕಿ ಕೊಡಿಸಿ ಎಂದು ಜಮಾಲ್‌ ಬೀ ಎಂಬ ವಯೋವೃದ್ಧೆ ಅಧಿಕಾರಿಗಳ ಬಳಿ ಹಳೆ ಪಡಿತರ ಕಾರ್ಡ್‌ ಹಿಡಿದುಕೊಂಡು ಕಣ್ಣೀರಿಟ್ಟ ಪ್ರಸಂಗ ಜರುಗಿತು.

ಆಹಾರ ಇಲಾಖೆ ಅಧಿಕಾರಿಗಳು ಸ್ಥಳದಲ್ಲೇ ಪರಿಶೀಲಿಸಿದಾಗ ಜಮಾಲ್‌ ಬೀ ಬಯೋಮೆಟ್ರಿಕ್‌ ಮಾಡಿಸಿಲ್ಲ ಎಂಬುದು ಗೊತ್ತಾಗಿ ಅಕ್ಕಿ ವಿತರಣೆಗೆ ಕ್ರಮ ವಹಿಸಿ ಎಂದು ಸೂಚಿಸಲಾಯಿತು.

ಸಭೆಗೆ ಅರ್ಜಿ ಹಿಡಿದು ಬಂದ ಮಾಜಿ ಶಾಸಕ: ತಾಲೂಕಿನ 26 ಗ್ರಾಪಂ ವ್ಯಾಪ್ತಿಯಲ್ಲಿನ ಹಳ್ಳಿಗಳಲ್ಲಿ ಜನರಿಗೆ, ಹಕ್ಕು ಪತ್ರ ವಿತರಣೆ, ಗ್ರಾಮ ಠಾಣಾ ವಿಸ್ತರಣೆ, ಕಂದಾಯ ಉಪ ಗ್ರಾಮ ಘೋಷಣೆ, ಸ್ವಂತ ಪಟ್ಟಾದಾರರ ಜಮೀನಿನಲ್ಲಿರುವ ನಿವೇಶನಗಳಿಗೆ, ಇ ಸ್ವತ್ತು ನೀಡಲು ಕ್ರಮ ವಹಿಸಬೇಕು, ಇಂತಹ 114 ಪ್ರಕರಣಗಳಿವೆ ಎಂದು ಮಾಜಿ ಶಾಸಕ ನಂದಿಹಳ್ಳಿ ಹಾಲಪ್ಪ ಎಡಿಸಿ ಪಿ.ಎನ್‌.ಲೋಕೇಶ ಇವರಿಗೆ ಅರ್ಜಿ ಸಲ್ಲಿಸಿ ಸಮಸ್ಯೆ ಬಗೆ ಹರಿಸುವಂತೆ ಚರ್ಚಿಸಿದರು.

ಮಾಗಳ ಗ್ರಾಮದ ಎಸ್‌ವಿಡಿಟಿ ಸರ್ಕಾರಿ ಪ್ರೌಢ ಶಾಲೆಯಲ್ಲಿ ಪ್ರಥಮ ದರ್ಜೆ ಸಹಾಯಕ ವೆಂಕಟೇಶ ನಾಯ್ಕ, ಕಳೆದ 13 ವರ್ಷದಿಂದ ಬೇರೆ ಇಲಾಖೆಗೆ ನಿಯೋಜನೆಗೊಂಡಿದ್ದಾರೆ. ನಿಯೋಜನೆಗೊಂಡ ಆದೇಶ ನವೀಕರಣವಿಲ್ಲ, ಹಾಜರಾತಿ ಇಲ್ಲದೇ ಸಂಬಳ ಪಡೆದಿದ್ದಾರೆ, ಈ ಕೂಡಲೇ ಅವರನ್ನು ಬೇರೆಗೆ ವರ್ಗಾವಣೆ ಮಾಡಿದರೇ ಆ ಖಾಲಿ ಹುದ್ದೆಗೆ ಬೇರೆಯವರು ಬರುತ್ತಾರೆ, ಅಲ್ಲಿನ ಶಿಕ್ಷಕರು ಪಾಠ ಮಾಡುವುದು ಬಿಟ್ಟು ಇವರ ಕೆಲಸ ಮಾಡುವಂತಾಗಿದೆ. 290ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿದ್ದಾರೆ, ಈ ವಿರುದ್ಧ ಕ್ರಮ ಕೈಗೊಳ್ಳದಿದ್ದರೇ ಶಾಲೆಗೆ ಬೀಗ ಹಾಕಿ ಪ್ರತಿಭಟನೆ ಮಾಡುತ್ತೇವೆಂದು ಗ್ರಾಮಸ್ಥರು ಅರ್ಜಿ ಸಲ್ಲಿಸಿದ್ದಾರೆ.

ತಾಪಂ- 20, ಲೋಕೋಪಯೋಗಿ ಇಲಾಖೆ-1, ಜೆಸ್ಕಾಂ-2, ಶಿಕ್ಷಣ -2, ಕಂದಾಯ-10 ಅರ್ಜಿಗಳು ಸೇರಿ ಒಟ್ಟು 35 ಅರ್ಜಿ ಸಲ್ಲಿಕೆಯಾಗಿದ್ದವು.

ಎಡಿಸಿ ಪಿ.ಎನ್‌. ಲೋಕೇಶ ಪ್ರಜಾಸೇವೆ ಆಂದೋಲನಕ್ಕೆ ಚಾಲನೆ ನೀಡಿದರು.

ಜಿಪಂ ಉಪಕಾರ್ಯದರ್ಶಿ ಕೆ. ತಿಮ್ಮಪ್ಪ, ಕೃಷಿ ಜೆಡಿ ಜೆ.ಟಿ. ಮಂಜುನಾಥ, ತೋಟಗಾರಿಕೆ ಇಲಾಖೆ ಪ್ರಭುರಾಜ, ರೇಷ್ಮೇ ಇಲಾಖೆಯ ಶ್ರೀಹರ್ಪ, ಪಶು ಇಲಾಖೆಯ ಶರಣಗೌಡ, ಮೀನುಗಾರ ಇಲಾಖೆಯ ಮಲ್ಲೇಶನಾಯ್ಕ, ತಹಸೀಲ್ದಾರ್‌ ಕೆ.ಎಂ.ಗುರುಬಸವರಾಜ, ತಾಪಂ ಇಒ ಜಿ.ಪರಮೇಶ್ವರ ಸೇರಿದಂತೆ ಇತರರಿದ್ದರು.

PREV
Get the latest news from across Karnataka (ಕರ್ನಾಟಕ ನ್ಯೂಸ್)— breaking headlines, politics, local developments, crime reports, district updates, civic issues and more. Stay informed with Kannada Prabha’s real‑time Karnataka news coverage.

Recommended Stories

ಪ್ರಜಾಸೇವಾ ಜನರ ಸಮಸ್ಯೆ ಪರಿಹಾರಕ್ಕೆ ಸಹಕಾರ
ಶಾಸನಗಳ ಸಂರಕ್ಷಣೆ ನಮ್ಮೆ ಹೊಣೆ