ಸರ್ವಧರ್ಮ ಸಾಮೂಹಿಕ ವಿವಾಹ ಬಡವರಿಗೆ ಸಹಕಾರಿ: ಡಾ. ವೈಜನಾಥ ಶಿವಲಿಂಗೇಶ್ವರ ಸ್ವಾಮೀಜಿ
ಸಾರಾಂಶ
ಶಿಗ್ಗಾಂವಿ ತಾಲೂಕಿನ ಬನ್ನೂರಿನಲ್ಲಿ ಭಾರತ ಸೇವಾ ಸಂಸ್ಥೆ ವತಿಯಿಂದ ದಶಮಾನೋತ್ಸವ ಸರ್ವಧರ್ಮ ಸಾಮೂಹಿಕ ವಿವಾಹ ಕಾರ್ಯಕ್ರಮ ನಡೆಯಿತು.
ಕನ್ನಡಪ್ರಭ ವಾರ್ತೆ ಶಿಗ್ಗಾಂವಿ
ತಾಲೂಕಿನ ಬನ್ನೂರಿನಲ್ಲಿ ಭಾರತ ಸೇವಾ ಸಂಸ್ಥೆ ವತಿಯಿಂದ ದಶಮಾನೋತ್ಸವ ಸರ್ವಧರ್ಮ ಸಾಮೂಹಿಕ ವಿವಾಹದಲ್ಲಿ ನವ ವಧುವರರಿಗೆ ಆಶೀರ್ವದಿಸಿ ನಂತರ ಮಾತನಾಡಿದರು.
ಕಂಕಣ ಭಾಗ್ಯದಿಂದ ಬಹು ದೂರವೇ ಉಳಿದಿದ್ದ ಬಡವರ ಪಾಲಿನ ಆಶಾಕಿರಣವಾಗಿ, ಇಲ್ಲಿ ವರೆಗೂ ಸಾವಿರಾರು ಜೋಡಿಗಳಿಗೆ, ಕಂಕಣ ಭಾಗ್ಯ ಕರುಣಿಸಿ, ದಾಂಪತ್ಯ ಜೀವನಕ್ಕೆ ಮುನ್ನುಡಿ ಬರೆದಿದ್ದಾರೆ. ತನ್ಮೂಲಕ ಸಾಮಾಜಿಕ ಮಿತವ್ಯಯಕ್ಕೂ ಪ್ರೇರಕರಾಗಿ, ಸರ್ವಧರ್ಮಗಳ ವಿವಾಹಗಳನ್ನು ಒಂದೇ ವೇದಿಕೆಯಲ್ಲಿ ನೆರವೇರಿಸಿ ಸಮಾಜದ ಸಾಮರಸ್ಯಕ್ಕೂ ಸಾಕ್ಷಿಯಾಗಿದ್ದಾರೆ ಎಂದರು.ಬಂಕಾಪುರ ಅರಳೆಲೇಹಿರೇಮಠ ರೇವಣಸಿದ್ದೇಶ್ವರ ಶ್ರೀಗಳು ಆಶೀರ್ವಚನದಲ್ಲಿ ಶ್ರೀಕಾಂತ ದುಂಡಿಗೌಡ್ರ ದಿನದ ಪ್ರತಿಕ್ಷಣವೂ ಸಮಾಜದ ಒಳಿತಿಗಾಗಿ ಚಿಂತಿಸುವ, ಸ್ವಹಿತಾಸಕ್ತಿಗಿಂತ ಪರರ ಹಿತದಲ್ಲಿಯೇ ಪರಮಾನಂದ ಕಾಣುವವರು. ತಮ್ಮ ಅಧ್ಯಕ್ಷತೆಯಲ್ಲಿ ಭಾರತ್ ಸೇವಾ ಸಂಸ್ಥೆಯ ಮೂಲಕ ಅನೇಕ ಸಮಾಜಮುಖಿ ಅಭಿವೃದ್ಧಿ ಕಾರ್ಯಕ್ರಮಗಳನ್ನು ನಡೆಸಿಕೊಂಡು ಬಂದಿರುವುದು ಬಾನಂಗಳದ ಭಾಸ್ಕರನ ಪ್ರಖರತೆಯಷ್ಟೇ ಸತ್ಯ ಎಂದರು. ಶಿಗ್ಗಾಂವಿ ವಿರಕ್ತಮಠದ ಸಂಗನಬಸ ಶ್ರೀಗಳು ಆಶೀರ್ವದಿಸಿ ಶ್ರೀಕಾಂತ ದುಂಡಿಗೌಡ್ರ ಬರೋಬ್ಬರಿ ೧೦ ವರ್ಷಗಳಿಂದ ಹತ್ತಾರು ಸಮಾಜಮುಖಿ ಕಾರ್ಯಗಳನ್ನು ಕೈಗೊಂಡಿರುವ ನೂರಾರು ಜೋಡಿಗಳ ಹೃದಯದಲ್ಲಿ ಮದುವೆ ಎಂಬ ಮೂರು ಅಕ್ಷರಗಳನ್ನು ಮುದ್ರಿಸಿರುವ ಇವರ ಮಹೋನ್ನತ ಕಾರ್ಯ ಮುಂದುವರಿಯಲಿ. ದಶ ದಿಕ್ಕುಗಳಲ್ಲಿಯೂ ಇವರ ಸೇವಾ ಕಾರ್ಯ ಶರವೇಗದಲ್ಲಿ ಸಾಂಗವಾಗಿ ಸಾಗಲಿ. ಇನ್ನೊಂದಿಷ್ಟು ಸಮಾಜ ಉಪಯೋಗಿ ಕಾರ್ಯಗಳನ್ನು ನೆರವೇರಿಸಲು ಭಾರತ ಸಂಸ್ಥೆ ಆಲದ ಮರದಂತೆ ಹೆಮ್ಮರವಾಗಿ ಬೆಳೆಯಲಿ ಎಂದರು.
ಹಿರೇಮಣಕಟ್ಟಿ ವಿಶ್ವಾರಾಧ್ಯ ಶ್ರೀಗಳು ಆಶೀರ್ವದಿಸಿದರು. ತಾಲೂಕಿನ ಶ್ರೀಗಳ ಸಮ್ಮುಖದಲ್ಲಿ ೧೧ ನವ ಜೋಡಿಗಳು ದಾಂಪತ್ಯ ಜೀವನಕ್ಕೆ ಸಾಕ್ಷಿಯಾದರು.
ಈ ಸಂದರ್ಭದಲ್ಲಿ ವೇದಮೂರ್ತಿ ಮುಪ್ಪಯ್ಯನವರ ಹಿರೇಮಠ, ಮಹಾಲಿಂಗಯ್ಯ ಚಿಕ್ಕಮಠ, ಶಂಕರಗೌಡ್ರ ಪೊಲೀಸಗೌಡ್ರ. ವೀರಭದ್ರಪ್ಪ ಅಂಗಡಿ, ಗಿರಿಜವ್ವ ದೊಡ್ಡಮನಿ, ಶಂಕ್ರಪ್ಪ ಬಡ್ಡಿ, ನಾಗೇಶ ಅಣ್ಣಿಗೇರಿ, ವೀರನಗೌಡ ಹೊನ್ನಾಗೌಡ್ರ, ಕುಬೇರಗೌಡ ಪೊಲೀಸಗೌಡ್ರ, ಮಹಾದೇವಪ್ಪ ಸಿದ್ದಣ್ಣವರ, ಟಿ.ವಿ. ಪಾಟೀಲ, ಧರ್ಮಗೌಡ ಪೊಲೀಸಪಾಟೀಲ, ಈಶ್ವರಗೌಡ ಪಾಟೀಲ ಸೇರಿದಂತೆ ಇತರರು ಉಪಸ್ಥಿತರಿದ್ದರು.