ಮದ್ರಾಸ್ ವಿವಿ, ಆದಿಕವಿ ನಣ್ಣಯ್ಯ ವಿವಿಯ ದಾಖಲೆಯ ಆಟ

ಕನ್ನಡಪ್ರಭ ವಾರ್ತೆ ಮೈಸೂರು

ಮದ್ರಾಸ್ವಿವಿ ಮತ್ತು ಆದಿಕವಿ ನಣ್ಣಯ್ಯ ವಿವಿ ಮಹಿಳಾ ತಂಡಗಳು ಇಲ್ಲಿ ನಡೆಯುತ್ತಿರುವ ದಕ್ಷಿಣ ವಲಯ ಅಂತರ ವಿವಿ ಮಹಿಳಾ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ದಾಖಲೆಯ ಮೊತ್ತ ಪೇರಿಸಿ, ದಾಖಲೆಯ ಅಂತರದಲ್ಲಿ ಜಯಗಳಿಸಿದವು.

ಮಹಾರಾಜ ಕಾಲೇಜು ಮೈದಾನದಲ್ಲಿ ಶುಕ್ರವಾರ ನಡೆದ ದಕ್ಷಿಣ ವಲಯ ಅಂತರ ವಿವಿ ಮಹಿಳೆಯರ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಮದ್ರಾಸ್‌ ವಿವಿ ತಂಡವು, ಕೊನೇರು ಲಕ್ಷ್ಮಯ್ಯ ಎಜುಕೇಷನ್‌ ಫೌಂಡೇಷನ್‌ ವಿರುದ್ಧ 25 ಓವರ್‌ ಗಳಲ್ಲಿ ಕೇವಲ 3 ವಿಕೆಟ್‌ ನಷ್ಟಕ್ಕೆ 392 ರನ್‌ಗಳ ಬೃಹತ್‌ ಮೊತ್ತ ಕಲೆಹಾಕಿತು. ತಂಡದ ಪರ ಯೋಗ್ಯಶ್ರೀ ಕೌಸುರಿ 106 ಮತ್ತು ಎಂ.ಎಸ್. ಐಶ್ವರ್ಯ 55 ರನ್‌ ಗಳಿಸಿದರು. ಈ ಮೊತ್ತ ಬೆನ್ನು ಹತ್ತಿದ್ದ ಕೊನೇರು ಲಕ್ಷ್ಮಯ್ಯ ಎಜುಕೇಷನ್ ಫೌಂಡೇಷನ್‌ ತಂಡವು 17.2 ಓವರ್‌ ಗಳಲ್ಲಿ ತನ್ನೆಲ್ಲ ವಿಕೆಟ್‌ ಕಳೆದುಕೊಂಡು ಕೇವಲ 51 ರನ್‌ ಗಳಿಸಿ ಸೋಲೊಪ್ಪಿಕೊಂಡಿತು.

ಎಸ್.ಜೆ.ಸಿ.ಇ ಮೈದಾನದಲ್ಲಿ ನಡೆದ ಮತ್ತೊಂದು ಪಂದ್ಯಾವಳಿಯಲ್ಲಿ ದೇವಿಕಾ ಕಂಡ್ರೆಗುಳ ಮತ್ತು ಜಿ. ಉದ್ವಿತಾ ಅವರ ಭರ್ಜರಿ ಶತಕದ ನೆರವಿನಿಂದ ಆದಿಕವಿ ನಣ್ಣಯ್ಯ ವಿವಿ ಮಹಿಳಾ ತಂಡವು ಕೇವಲ 25 ಓವರ್‌ಗಳಲ್ಲಿ 345 ರನ್‌ಗಳ ಬೃಹತ್‌ ಮೊತ್ತ ಪೇರಿಸಿ, ಅಳಗಪ್ಪ ವಿವಿ ತಂಡವನ್ನು 291 ರನ್‌ಗಳ ಭಾರೀ ಅಂತರದಿಂದ ಪರಾಭವಗೊಳಿಸಿ ದಾಖಲೆ ನಿರ್ಮಿಸಿತು.

ನಗರದ ಎಸ್.ಜೆ.ಸಿ.ಇ ಮೈದಾನದಲ್ಲಿ ನಡೆಯುತ್ತಿರುವ ದಕ್ಷಿಣ ವಲಯ ಅಂತರ ವಿವಿ ಮಹಿಳೆಯರ ಕ್ರಿಕೆಟ್ಪಂದ್ಯಾವಳಿಯಲ್ಲಿ ಮೊದಲು ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡ ನಣ್ಣಯ್ಯ ವಿವಿ ತಂಡವು ನಿಗದಿತ 25 ಓವರ್‌ಗಳಲ್ಲಿ 5 ವಿಕೆಟ್‌ ನಷ್ಟಕ್ಕೆ 342 ರನ್‌ಗಳ ದಾಖಲೆಯ ಮೊತ್ತ ಕಲೆ ಹಾಕಿತು. ತಂಡದ ಪರವಾಗಿ ದೇವಿಕಾ ಕಂದ್ರೆಗುಳ (125) ಮತ್ತು ಜಿ. ಉದ್ವಿತಾ (133) ಶತಕ ಬಾರಿಸಿದರು.

ಈ ಬೃಹತ್‌ ಮೊತ್ತ ಬೆನ್ನು ಹತ್ತಿದ ಅಳಗಪ್ಪ ವಿವಿ ತಂಡವು 10.3 ಓವರ್‌ ಗಳಲ್ಲಿ ತನ್ನೆಲ್ಲ ವಿಕೆಟ್‌ ಕಳೆದುಕೊಂಡು 51 ರನ್‌ ಕಲೆ ಹಾಕಿದೆ. ನಣ್ಣಯ್ಯ ವಿವಿಯ ಕೆ. ಸಾಯಿಪೂಜಿತಾ 24 ರನ್ನೀಡಿ 6 ವಿಕೆಚ್‌ ಕಬಳಿಸಿ ಉತ್ತಮ ಬೌಲಿಂಗ್‌ ಪ್ರದರ್ಶನ ನೀಡಿದರು.

ಸೋಲ್ಕ ಕಿಶೋರ್‌ ಅವರ ಅಬ್ಬರದ ಬ್ಯಾಂಟಿಂಗ್‌ ಪ್ರದರ್ಶನ ಮತ್ತು ಸಿ.ಜೆ. ಸಿರ್ರಿ ಅವರ ಮಾರಕ ಬೌಲಿಂಗ್‌ ದಾಳಿಯಿಂದಾಗಿ ವಿಟಿಯು ತಂಡವು, ಆಚಾರ್ಯ ನಾಗಾರ್ಜುನ ವಿವಿಯನ್ನು 120 ರನ್‌ ಗಳ ಅಂತರದಲ್ಲಿ ಮಣಿಸಿತು.

ಟಾಸ್‌ ಗೆದ್ದು ಬೌಲಿಂಗ್‌ ಆಯ್ಕೆ ಮಾಡಿಕೊಂಡ ಆಚಾರ್ಯ ನಾಗಾರ್ಜುನ ವಿವಿ ತಂಡಕ್ಕೆ ಸೋಲ್ಕ ಕಿಶೋರ್ ಮಾರಕವಾಗಿ ಪರಿಣಮಿಸಿದರು. ಸೋಲ್ಕಾ ಅವರು 71 ರನ್ಗಳಿಸಿ ತಂಡವು ಉತ್ತಮ ಮೊತ್ತ ಕಲೆಹಾಕುವಲ್ಲಿ ನೆರವಾದರು. ಒಟ್ಟಾರೆ ವಿಟಿಯು ತಂಡವು ನಿಗದಿತ 25 ಓವರ್‌ ಗೆ 6 ವಿಕೆಟ್‌ ಕಳೆದುಕೊಂಡು 189 ರನ್‌ ಕಲೆ ಹಾಕಿತು. ಈ ಬೃಹತ್‌ ಮೊತ್ತ ಬೆನ್ನು ಹತ್ತಿದ ಆಚಾರ್ಯ ನಾಗಾರ್ಜುನ ವಿವಿ ತಂಡ 25 ಓವರ್ಗೆ ತನ್ನೆಲ್ಲ ವಿಕೆಟ್‌ ಕಳೆದುಕೊಂಡು ಕೇವಲ 69 ರನ್‌ ಗಳಿಸಲಷ್ಟೇ ಶಕ್ತವಾಯಿತು. ವಿಟಿಯು ಪರ ಸಿ.ಜೆ. ಸಿರ್ರಿ ಕೇವಲ 17 ರನ್‌ ನೀಡಿ 4 ವಿಕೆಟ್‌ ಕಬಳಿಸಿದರು.

ಮಹಾರಾಜ ಕಾಲೇಜು ಮೈದಾನದಲ್ಲಿ ನಡೆದ ಕರ್ನಾಟಕ ರಾಜ್ಯ ಅಕ್ಕಮಹಾದೇವಿ ಮಹಿಳಾ ವಿವಿ ಮತ್ತು ಸವಿತಾ ವೈದ್ಯಕೀಯ, ತಾಂತ್ರಿಕ ಮತ್ತು ವಿಜ್ಞಾನ ಸಂಸ್ಥೆ ತಂಡವನ್ನು 8 ವಿಕೆಟ್‌ ಗಳಿಂದ ಮಣಿಸಿತು.

ಟಾಸ್‌ ಗೆದ್ದ ಸವಿತಾ ವೈದ್ಯಕೀಯ, ತಾಂತ್ರಿಕ ಮತ್ತು ವಿಜ್ಞಾನ ಸಂಸ್ಥೆಯು ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡಿತು. 17.3 ಓವರ್‌ಗೆ ತನ್ನೆಲ್ಲ ವಿಕೆಟ್‌ ಕಳೆದುಕೊಂಡ ತಂಡ ಕೇವಲ 67 ರನ್‌ ಕಲೆ ಹಾಕಿತು. ಈ ಸಾಧಾರಣ ಮೊತ್ತದ ಬೆನ್ನತ್ತಿದ ಅಕ್ಕಮಹಾದೇವಿ ಮಹಿಳಾ ವಿವಿ ತಂಡವು ಕೇವಲ 6.7 ಓವರ್ಗಳಲ್ಲಿ 2 ವಿಕೆಟ್‌ ನಷ್ಟಕ್ಕೆ 71 ರನ್‌ ಕಲೆ ಹಾಕಿ ಗುರಿ ತಲುಪಿತು. ತಂಡದ ಪರ ನಂದಿನಿ ಪಟೇಲ್‌ ಮತ್ತು ಜಯಶ್ರೀ ರಾಜಶೇಖರ್ ಅವರು ತಲಾ 2 ವಿಕೆಟ್‌ ಪಡೆದರು.

ಮದ್ರಾಸ್‌ ವಿವಿಯು ಕೊನೇರು ಲಕ್ಷ್ಮಯ್ಯ ಎಜುಕೇಷನ್‌ ಫೌಂಡೇಶನ್‌ ವಿರುದ್ಧ 341 ರನ್‌ ಕಲೆ ಹಾಕಿತು.