ಎಂಆರ್‌ಪಿಎಲ್‌: ಜಾಗೃತಿ ಅರಿವು ಸಪ್ತಾಹ ಉದ್ಘಾಟನೆ

ಮಂಗಳೂರು: ಮಂಗಳೂರು ರಿಫೈನರಿ ಮತ್ತು ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ (ಎಂಆರ್‌ಪಿಎಲ್‌) ವತಿಯಿಂದ ಜಾಗೃತಿ ಅರಿವು ಸಪ್ತಾಹ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಯಿತು.

ಎಂಆರ್‌ಪಿಎಲ್‌ ವ್ಯವಸ್ಥಾಪಕ ನಿರ್ದೇಶಕ ಮುಂಡ್ಕೂರ್ ಶ್ಯಾಮಪ್ರಸಾದ್ ಕಾಮತ್ ಮಾತನಾಡಿ, ಜಾಗರೂಕತೆ ಸಾಮೂಹಿಕ ಜವಾಬ್ದಾರಿಯಾಗಿದೆ. ಅದನ್ನು ನ್ಯಾಯಯುತ, ವಸ್ತುನಿಷ್ಠತೆಯಿಂದ ನಿರ್ವಹಿಸಬೇಕು. ವ್ಯವಸ್ಥೆಗಳು ಜನರನ್ನು ನ್ಯಾಯಯುತವಾಗಿ ನಡೆಸಿಕೊಂಡಾಗ ಪ್ರಾಮಾಣಿಕತೆ ಅಭಿವೃದ್ಧಿ ಹೊಂದುತ್ತದೆ. ಉದ್ಯೋಗಿಗಳು ನಿರ್ವಹಿಸುವ ಘಟಕಗಳು, ನಿರ್ವಹಿಸುವ ಸಾರ್ವಜನಿಕ ನಿಧಿಗಳು ಮತ್ತು ಅವರು ನೀಡುವ ಒಪ್ಪಂದಗಳು ರಾಷ್ಟ್ರೀಯ ಹಿತಾಸಕ್ತಿಯಲ್ಲಿ ಅವರಿಗೆ ವಹಿಸಲಾದ ಜವಾಬ್ದಾರಿಗಳಾಗಿವೆ ಎಂದರು.

ನಿರ್ದೇಶಕ ನಂದಕುಮಾರ್ ವೇಲಾಯುಧನ್ ಪಿಳ್ಳೈ ಮಾತನಾಡಿ, ಸಮಗ್ರತೆ ಕೇವಲ ಔಪಚಾರಿಕ ಆಚರಣೆಗಳಿಗೆ ಸೀಮಿತವಾಗಿರದೆ, ದೈನಂದಿನ ನಿರ್ಧಾರಗಳಿಗೆ ಮಾರ್ಗದರ್ಶನ ನೀಡಬೇಕು. ಪ್ರಾಮಾಣಿಕತೆ ಯಾವಾಗಲೂ ತಕ್ಷಣದ ಪ್ರತಿಫಲ ತರದಿರಬಹುದು. ಆದರೆ ಅದರ ಶ್ರೇಷ್ಠ ಪ್ರತಿಫಲವೆಂದರೆ ಮನಸ್ಸಿನ ಶಾಂತಿ ಎಂದರು.

ನಿರ್ದೇಶಕ (ಹಣಕಾಸು) ದೇವೇಂದ್ರ ಕುಮಾರ್ ಮಾತನಾಡಿ, ಸಮಗ್ರತೆ ಮತ್ತು ದಕ್ಷತೆ ಪರಸ್ಪರ ಪೂರಕವಾಗಿರಬೇಕು. ಸರ್ಕಾರಿ ಸುಧಾರಣೆಗಳು ಮತ್ತು ಸುಧಾರಿತ ವ್ಯವಸ್ಥೆಗಳು ಕೇವಲ ಆರ್ಥಿಕ ನಷ್ಟವನ್ನು ತಡೆಗಟ್ಟುವುದರಿಂದ ಸಂಪನ್ಮೂಲಗಳನ್ನು ಅತ್ಯುತ್ತಮವಾಗಿಸುವುದು ಮತ್ತು ಸಾರ್ವಜನಿಕ ಮೌಲ್ಯವನ್ನು ಹೆಚ್ಚಿಸುವುದಕ್ಕೆ ಒತ್ತು ನೀಡಿವೆ ಎಂದರು.

ಮುಖ್ಯ ವಿಜಿಲೆನ್ಸ್‌ ಅಧಿಕಾರಿ ಮೊಹಮ್ಮದ್ ಅಲಿ ಶಿಹಾಬ್ ಮಾತನಾಡಿ, ಪ್ರಾಮಾಣಿಕತೆ ರಾಷ್ಟ್ರ ನಿರ್ಮಾಣ ಮತ್ತು ಸಾಂಸ್ಥಿಕ ನಂಬಿಕೆಗೆ ಮೂಲಭೂತವಾಗಿದೆ ಎಂದರು.

ಉದ್ಘಾಟನಾ ಕಾರ್ಯಕ್ರಮದ ಅಂಗವಾಗಿ ರಾಷ್ಟ್ರಪತಿ, ಪ್ರಧಾನ ಮಂತ್ರಿ ಮತ್ತು ಕೇಂದ್ರ ವಿಜಿಲೆನ್ಸ್ ಆಯೋಗದ ಸಂದೇಶಗಳನ್ನು ಪಿ.ಸುಜಿತ್ ಮತ್ತು ಡಾ.ದೀಪಕ್ ಪ್ರಭಾಕರ್ ಪಿ. ಓದಿದರು. ಜನರಲ್‌ ಮ್ಯಾನೆಜರ್‌ಗಳಾದ ಸತ್ಯನಾರಾಯಣ ಎಚ್‌ಸಿ, ಸುರೇಶ್ ಕೆ.ರಾವ್, ರಾಜೀವ್ ಎಚ್‌ಎಸ್ ವಿಜಿಲೆನ್ಸ್ ಪ್ರತಿಜ್ಞೆ ಬೋಧಿಸಿದರು.

ಸಿಜಿಎಂ (ಎಚ್‌ಆರ್) ಮನೋಜ್ ಕುಮಾರ್ ಸ್ವಾಗತಿಸಿದರು. ವಿಜಿಲೆನ್ಸ್‌ ಜಿಎಂ ಕೇಶವ ಕುರ್ರ ವಂದಿಸಿದರು. ವಿಜಿಲೆನ್ಸ್ ವ್ಯವಸ್ಥಾಪಕ ಜಯೇಶ್ ನಿರೂಪಿಸಿದರು.