ಸೋಮರಡ್ಡಿ ಅಳವಂಡಿ
ಚರಂಡಿ ನೀರು ಹರಿಯುವಂತೆ ಫಿನಾಯಿಲ್ ನೆಲದ ಮೇಲೆ ಹರಿದಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ. ಹಾಗಾದರೆ ಅಷ್ಟೊಂದು ಪ್ರಮಾಣದಲ್ಲಿ ಖರೀದಿ ಮಾಡಿದ್ದೇಕೆ? ಅಗತ್ಯದ ಅಂದಾಜು ಮಾಡದೆ ಖರೀದಿಸಲಾಗಿತ್ತೇ ಎಂಬ ಪ್ರಶ್ನೆಗಳು ಇದೀಗ ಉದ್ಭವಿಸಿವೆ.
ಈಗಾಗಲೇ ಸುಮಾರು 10 ಕ್ವಿಂಟಲ್ ಔಷಧಿಗಳನ್ನು ತ್ಯಾಜ್ಯಕ್ಕೆ ಸುರಿದಿರುವ ಲೆಕ್ಕ ಅಧಿಕೃತವಾಗಿ ಮುನ್ನೆಲೆಗೆ ಬಂದಿದೆ. ಆದರೆ, ಲೆಕ್ಕಕ್ಕೆ ಸಿಗದ ಇನ್ನೆಷ್ಟು ಔಷಧಿಗಳನ್ನು ವಿಲೇವಾರಿ ಮಾಡಲಾಗಿದೆ ಎಂಬ ಅನುಮಾನಗಳ ನಡುವೆಯೇ, ಫಿನಾಯಿಲ್ ಸೇರಿದಂತೆ ಇತರ ಬಳಕೆಯ ವಸ್ತುಗಳೂ ತ್ಯಾಜ್ಯಕ್ಕೆ ಸೇರಿರುವ ಮಾಹಿತಿ ಹೊರಬರುತ್ತಿದೆ. ಇವುಗಳ ಮೌಲ್ಯ ಕೋಟ್ಯಂತರ ರುಪಾಯಿ ಇರಬಹುದೆಂಬ ಶಂಕೆ ವ್ಯಕ್ತವಾಗಿದೆ.ತೆರೆಯದ ನೂರಾರು ಬಾಕ್ಸ್ಗಳು: ಫಿನಾಯಿಲ್ ತುಂಬಿದ ನೂರಾರು ಬಾಕ್ಸ್ಗಳನ್ನು ತೆರೆಯದೆಯೇ ತ್ಯಾಜ್ಯ ವಿಲೇವಾರಿ ಘಟಕಕ್ಕೆ ಕಳುಹಿಸಲಾಗಿದೆ ಎನ್ನಲಾಗಿದೆ. ಇದಕ್ಕಿಂತಲೂ ಹೆಚ್ಚಿನ ಪ್ರಮಾಣದ ಫಿನಾಯಿಲ್ ಅನ್ನು ನೇರವಾಗಿ ನೆಲಕ್ಕೆ ಸುರಿಯಲಾಗಿದೆ. ಬಳಕೆಗೆ ಬಾರದಷ್ಟು ಪ್ರಮಾಣದಲ್ಲಿ ಖರೀದಿ ಮಾಡಿದ್ದೇಕೆ? ಖರೀದಿ ಪ್ರಕ್ರಿಯೆಯಲ್ಲಿ ಬೇಡಿಕೆ ಮತ್ತು ದಾಸ್ತಾನು ಪರಿಶೀಲನೆ ನಡೆದಿತ್ತೇ? ಖರೀದಿಗೆ ಅನುಮೋದನೆ ನೀಡಿದವರು ಯಾರು? ಎಂಬ ಪ್ರಶ್ನೆಗಳಿಗೆ ತನಿಖೆಯಿಂದ ಉತ್ತರ ಸಿಗಬೇಕಿದೆ.
ವಿಕೆಟ್ ಪತನ: ಕಿಮ್ಸ್ನಲ್ಲಿನ ಔಷಧಿ ಅಕ್ರಮದ ಕುರಿತು ''''ಕನ್ನಡಪ್ರಭ''''ದಲ್ಲಿ ಸರಣಿ ವರದಿಗಳು ಪ್ರಕಟವಾಗುತ್ತಿದ್ದಂತೆ ಆಸ್ಪತ್ರೆಯ ಮೆಡಿಕಲ್ ಅಧಿಕ್ಷಕ ರಾಜೀನಾಮೆ ನೀಡಿದ್ದಾರೆ ಎನ್ನುವ ಮಾಹಿತಿ ಹೊರಬಿದ್ದಿದೆ. ಆದರೆ, ರಾಜೀನಾಮೆ ಇನ್ನೂ ಅಂಗೀಕಾರವಾಗಿಲ್ಲ ಎನ್ನಲಾಗಿದೆ. ಪ್ರಕರಣದ ಗಂಭೀರತೆ ಹೆಚ್ಚುತ್ತಿರುವ ಸಂದರ್ಭದಲ್ಲಿ ಈ ಬೆಳವಣಿಗೆಯೂ ಮಹತ್ವ ಪಡೆದುಕೊಂಡಿದೆ.
ಆದರೆ, ಕಳೆದ ಐದು ವರ್ಷಗಳಿಂದ ಈ ವ್ಯವಸ್ಥೆಯಡಿ ಲಕ್ಷಾಂತರ ರುಪಾಯಿ ಅವ್ಯವಹಾರ ನಡೆದಿರುವ ಶಂಕೆ ವ್ಯಕ್ತವಾಗಿದೆ. ಖಾಸಗಿಯಾಗಿ ಔಷಧಿ ಖರೀದಿಸಿದ ದಾಖಲೆ ಹಾಗೂ ಬಿಲ್ಗಳಿಲ್ಲದೆ ಹಣ ಪಡೆದಿರುವ ಆರೋಪಗಳೂ ಕೇಳಿಬಂದಿವೆ. ಈ ಎಲ್ಲ ವ್ಯವಹಾರಗಳ ಸಮಗ್ರ ತನಿಖೆ ನಡೆದರೆ ಇನ್ನಷ್ಟು ಅಕ್ರಮಗಳು ಬಯಲಾಗುವ ಸಾಧ್ಯತೆಯಿದೆ.