ಕಬ್ಬು ರೈತರ ಹೋರಾಟಕ್ಕೆ ನಮ್ಮ ಬೆಂಬಲ- ಸಂತೋಷ ಲಾಡ್
ಸಾರಾಂಶ
ಕಬ್ಬು ಬೆಳೆಗಾರರ ಸದ್ಯದ ಸ್ಥಿತಿಗೆ ಹಾಗೂ ಸಕ್ಕರೆ ಕಾರ್ಖಾನೆಗಳ ಬಿಕ್ಕಟ್ಟಿಗೆ ಕೇಂದ್ರ ಸರ್ಕಾರದ ನೀತಿಗಳೇ ನೇರ ಕಾರಣ
ಧಾರವಾಡ: ರಾಜ್ಯ ಸರ್ಕಾರ ಹಾಗೂ ನಮ್ಮ ಸಚಿವರು ಸದಾ ಕಬ್ಬು ಬೆಳೆಗಾರರು ಮತ್ತು ಹೋರಾಟಗಾರರ ಪರವಾಗಿ ಇರುತ್ತೇವೆ. ಆದರೆ ಈ ಸಮಸ್ಯೆಗೆ ಶಾಶ್ವತ ಕಡಿವಾಣ ಹಾಕಬೇಕೆಂದರೆ ಇದರ ಮೂಲ ಬೇರಿಗೆ ಹೋಗಿ ಪರಿಹಾರ ಕಂಡುಕೊಳ್ಳಬೇಕಿದೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಸಂತೋಷ್ ಲಾಡ್ ಕೇಂದ್ರ ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.
ಕೇಂದ್ರದ ನೀತಿಗೆ ಆಕ್ಷೇಪ: ದೇಶದಲ್ಲಿ ವರ್ಷಕ್ಕೆ ಸುಮಾರು 6 ಸಾವಿರ ಕೋಟಿ ಲೀಟರ್ ನಷ್ಟು ಪೆಟ್ರೋಲ್ ಖರ್ಚಾಗುತ್ತಿದೆ. ಈ ಪೆಟ್ರೋಲ್‌ಗೆ ಶೇಕಡಾ 20ರಷ್ಟು ಎಥೆನಾಲ್ ಮಿಕ್ಸ್ ಮಾಡಲಾಗುತ್ತದೆ. ಈ ಎಥೆನಾಲ್ ಸಕ್ಕರೆ ಕಾರ್ಖಾನೆಗಳಲ್ಲೇ ತಯಾರಾಗುತ್ತದೆ. ಕೇಂದ್ರ ಸರ್ಕಾರವೇ ಎಥೆನಾಲ್ ಉತ್ಪಾದನೆ ಮಾಡಿ ಎಂದು ಹೇಳುತ್ತದೆ ಹಾಗೂ ಎಥೆನಾಲ್ ಪ್ಲ್ಯಾಂಟ್, ಶುಗರ್ ಪ್ಲ್ಯಾಂಟ್‌ಗಳಿಗೆ ಅನುಮತಿ ನೀಡುತ್ತದೆ. ಅಷ್ಟೇ ಅಲ್ಲದೆ, ಕಬ್ಬಿಗೆ ಎಫ್‌ಆರ್‌ಪಿ ನಿಗದಿಪಡಿಸುವುದು ಸಹ ಕೇಂದ್ರ ಸರ್ಕಾರವೇ ಎಂದರು.
ಉತ್ತರ ಪ್ರದೇಶ, ಗುಜರಾತ್‌ನಂತಹ ರಾಜ್ಯಗಳಿಗೆ ಹೆಚ್ಚಿನ ಕೋಟಾ ನೀಡಲಾಗುತ್ತಿದೆ. ಆದರೆ ಕರ್ನಾಟಕಕ್ಕೆ ಕೋಟಾ ಕಡಿಮೆ ನೀಡಲಾಗುತ್ತಿದೆ. ಎಲ್ಲಿ ಪ್ಲ್ಯಾಂಟ್‌ಗಳು ಕಡಿಮೆಯಿವೆಯೋ ಅಲ್ಲಿಗೆ ಹೆಚ್ಚಿನ ಕೋಟಾ ಕೊಡುವ ವಿಚಿತ್ರ ನೀತಿ ಕೇಂದ್ರದಲ್ಲಿದೆ. ಸಕ್ಕರೆ ಕ್ಷೇತ್ರ ಸಂಪೂರ್ಣವಾಗಿ ಕೇಂದ್ರ ಸರ್ಕಾರದ ಅಧೀನದಲ್ಲಿದೆ " ಎಂದರು.ಲಾಭ ಕೇಂದ್ರಕ್ಕೆ, ನಷ್ಟ ರೈತರಿಗೆ: ಸಕ್ಕರೆ ಕಾರ್ಖಾನೆಗಳಿಂದ ಕೇಂದ್ರ ಸರ್ಕಾರ ಎಥೆನಾಲ್ ಅನ್ನು ಕೇವಲ 55 ರೂಪಾಯಿಗೆ ಖರೀದಿ ಮಾಡಿ, ಮಾರುಕಟ್ಟೆಯಲ್ಲಿ 110 ರೂಪಾಯಿಗೆ ಮಾರಾಟ ಮಾಡುತ್ತಿದೆ. ಅದರಲ್ಲಿ ಬರುವ ಲಾಭದಲ್ಲಿ ಕೇವಲ 4 ರೂಪಾಯಿಯನ್ನು ರೈತರಿಗೆ ನೀಡಿದರೆ ಅವರು ನೆಮ್ಮದಿಯಿಂದ ಬದುಕುತ್ತಾರೆ. ಪ್ರಸ್ತುತ ಹೊಲಗಳಲ್ಲಿ ಕಬ್ಬು ಒಣಗುತ್ತಿದ್ದು, ರೈತರಿಗೆ ಸೂಕ್ತ ಬೆಲೆ ನಿಗದಿಯಾಗುವವರೆಗೂ ಅವರ ಹೋರಾಟ ನಡೆಯಲಿ. ರೈತರ ಈ ನ್ಯಾಯಯುತ ಹೋರಾಟಕ್ಕೆ ನಮ್ಮ ಸಂಪೂರ್ಣ ಸಹಕಾರವಿದೆ, " ಎಂದು ಬೆಂಬಲ ಸೂಚಿಸಿದರು.