ಕ್ಯಾನ್ಸರ್‌ ರೋಗಿಗಳಿಗೆ ರಮಿಲಾ ಪ್ರಶಾಂತಿ ಮಂದಿರ ವರದಾನ

ಹುಬ್ಬಳ್ಳಿ: ಬಹಳಷ್ಟು ಕ್ಯಾನ್ಸರ್​ ರೋಗಿಗಳನ್ನು ಕೊನೆಯ ಹಂತದಲ್ಲಿ ನೋಡಿಕೊಳ್ಳಲು ಸಾಧ್ಯವಾಗದೇ ಕುಟುಂಬದವರು ಸುಸ್ತಾಗಿ ಹೋಗುತ್ತಿದ್ದಾರೆ. ಅಂತಹ ರೋಗಿಗಳಿಗೆ ಮಜೇಥಿಯಾ ಫೌಂಡೇಷನ್​ ಆರಂಭಿಸಿರುವ ರಮಿಲಾ ಪ್ರಶಾಂತಿ ಮಂದಿರ (ಹಾಸ್ಪೈಸ್​) ವರದಾನವಾಗಿದೆ ಎಂದು ಕ್ಯಾನ್ಸರ್​ ತಜ್ಞೆ, ಪದ್ಮಶ್ರೀ ಡಾ.ವಿಜಯಲಕ್ಷ್ಮೀ ದೇಶಮಾನೆ ಹೇಳಿದರು.

ಇಲ್ಲಿಯ ನವನಗರದ ಕರ್ನಾಟಕ ಕ್ಯಾನ್ಸರ್​ ಥೆರಫಿ ಹಾಗೂ ಸಂಶೋಧನಾ ಸಂಸ್ಥೆ(ಕೆಸಿಟಿಆರ್​ಐ)ಯ ಆವರಣದಲ್ಲಿರುವ ಹಾಸ್ಪೈಸ್​ ರಮಿಲಾ ಪ್ರಶಾಂತಿ ಮಂದಿರದಲ್ಲಿ ಶನಿವಾರ ಹಮ್ಮಿಕೊಳ್ಳಲಾಗಿದ್ದ ವಿಶ್ವ ಹಾಸ್ಪೈಸ್​ ಪ್ಯಾಲಿಯೇಟಿವ್​ ಕೇರ್​ ದಿನಾಚರಣೆ ಉದ್ಘಾಟಿಸಿ ಮಾತನಾಡಿದರು.

ವಯಸ್ಸಾದ ಅನೇಕ ರೋಗಿಗಳಿಗೆ ಮನೆಯಲ್ಲಿ ಆರೈಕೆ ಮಾಡಲು ಕಷ್ಟವಾಗುತ್ತದೆ. ಆದರೆ, ಹಾಸ್ಪೈಸ್​ ಅಂಥವರಿಗೆ ಆರೈಕೆಯ ಜತೆ ಇರುವಷ್ಟು ಕಾಲ ನೆಮ್ಮದಿಯ ಬದುಕು ನೀಡಲು ಶ್ರಮಿಸುತ್ತದೆ. ಅನೇಕ ಕಡೆಗಳಲ್ಲಿ ಇಂತಹ ವ್ಯವಸ್ಥೆ ಮಾಡಲಾಗಿದೆ. ಕ್ಯಾನ್ಸರ್​ ಕಾಯಿಲೆ ಬರದಂತೆ ಜೀವನ ಕ್ರಮ ಉತ್ತಮಗೊಳಿಸಿಕೊಳ್ಳಬೇಕು. ಹಸಿರು ತರಕಾರಿ, ಸಸ್ಯಾಹಾರ ಸೇವನೆ ಮಾಡುವ ಮೂಲಕ ಆರೋಗ್ಯಕರ ಜೀವನ ಸಾಗಿಸಬಹುದು ಎಂದು ಸಲಹೆ ನೀಡಿದರು.

ಅತಿಥಿಗಳಾಗಿ ಆಗಮಿಸಿದ್ದ ನವನಗರ ಕೆಸಿಟಿಆರ್​ಐ ಚೇರ್‌ಮನ್​ ಡಾ. ಬಿ.ಆರ್​.ಪಾಟೀಲ ಮಾತನಾಡಿ, ಆಸ್ಪತ್ರೆಯಲ್ಲಿ ಚಿಕಿತ್ಸೆಯ ಎಲ್ಲ ಹಂತಗಳು ಮುಗಿದ ನಂತರ ರೋಗಿಯನ್ನು ಹಾಸ್ಪೈಸ್​ನಲ್ಲಿ ಒಂದಿಷ್ಟು ದಿನ ಇಡಬಹುದಾಗಿದೆ. ಫೌಂಡೇಷನ್​ ಸಹಾಯದಿಂದ ನೂತನವಾದ ಇಂತಹ ವ್ಯವಸ್ಥೆ ಕಲ್ಪಿಸುವಲ್ಲಿ ನಾವು 10 ವರ್ಷ ಮುಂಚೂಣಿಯಲ್ಲಿದ್ದೇವೆ. ಜೀವನದ ಕೊನೆಯ ಗಳಿಗೆಯಲ್ಲಿ ರೋಗಿಗಳಿಗೆ ಗೌರವ ಬದುಕು ನೀಡುವುದು ಇದರ ಉದ್ದೇಶ. ಇದರಿಂದ ಎಷ್ಟೋ ಜನರಿಗೆ ಅನುಕೂಲವಾಗಿದೆ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಮಜೇಥಿಯಾ ಫೌಂಡೇಷನ್​ ಚೇರ್‌ಮನ್​ ಜಿತೇಂದ್ರ ಮಜೇಥಿಯಾ ಮಾತನಾಡಿ, ನನ್ನ ಕರ್ಮಭೂಮಿ ಹುಬ್ಬಳ್ಳಿಗೆ ಏನಾದರೂ ಮಾಡಬೇಕು ಎಂದುಕೊಂಡು ಫೌಂಡೇಶನ್​ ಮೂಲಕ ಸಾಮಾಜಿಕ ಸೇವಾ ಕಾರ್ಯ ಆರಂಭಿಸಿದ್ದೇವೆ. ಅದರಲ್ಲಿ ಹಾಸ್ಪೈಸ್​ ಒಂದಾಗಿದೆ. ಆಸ್ಪತ್ರೆ ಮಾದರಿಯಲ್ಲಿ ಕ್ಯಾನ್ಸರ್​ ರೋಗಿಗಳಿಗೆ ಉಪಚರಿಸಲಾಗುತ್ತದೆ ಎಂದರು.

ಫೌಂಡೇಷನ್​ ಅಧ್ಯಕ್ಷೆ ನಂದಿನಿ ಕಶ್ಯಪ್ ಮಜೇಥಿಯಾ ಮಾತನಾಡಿ, ನನ್ನ ತಾಯಿ ಸಣ್ಣ ವಯಸ್ಸಿನಲ್ಲಿ ಕ್ಯಾನ್ಸರ್​ನಿಂದ ಬಳಲಿದರು. ಬಹಳಷ್ಟು ಗಂಭೀರವಾದ ಈ ಕಾಯಿಲೆ ಬಗ್ಗೆ ಎಚ್ಚರಿಕೆ ವಹಿಸಬೇಕು. ಜೀವನದ ಕೊನೆಯಲ್ಲಿ ಉತ್ತಮ ಆರೈಕೆ ಬೇಕಾಗುತ್ತದೆ. ಇಂತಹ ಸೇವೆ ಇದೆ ಎಂಬುದೇ ಅನೇಕರಿಗೆ ಗೊತ್ತಿರುವುದಿಲ್ಲ. ಇದರ ಬಗ್ಗೆ ಜನರಲ್ಲಿ ಜಾಗೃತಿ ಅಗತ್ಯ ಎಂದರು.

ವೈದ್ಯಾಧಿಕಾರಿ ಡಾ. ನಾಗರಾಜರಾವ ಸಾನು ಮಾತನಾಡಿದರು. ಹಾಸ್ಪೈಸ್​ ನಲ್ಲಿ ಲಭ್ಯ ಇರುವ ಸೇವೆಯ ಬಗ್ಗೆ ಉಮಾ ಹಿರೇಮಠ, ಕವಿತಾ, ರಾಕೇಶ ಇತರರು ಅಭಿಪ್ರಾಯ ಹಂಚಿಕೊಂಡರು. ಹಾಸ್ಪೈಸ್​ ದಿನಾಚರಣೆ ಅಂಗವಾಗಿ ಏರ್ಪಡಿಸಿದ್ದ ಚರ್ಚಾಕೂಟದಲ್ಲಿ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು. ಬಳಿಕ ಮಾಹಿತಿ ಪುಸ್ತಕ ಬಿಡುಗಡೆಗೊಳಿಸಲಾಯಿತು.

ಈ ವೇಳೆ ರಮಿಲಾ ಮಜೇಥಿಯಾ, ಕಶ್ಯಪ್ ಮಜೇಥಿಯಾ, ಡಾ.ಪ್ರಹ್ಲಾದರಾವ್​, ಅಮೃತಲಾಲ್​ ಪಟೇಲ್​, ಡಾ. ಸುನಿಲಕುಮಾರ ಕುಕನೂರ, ಬಾಲಚಂದ್ರ ಡಂಗನವರ ಸೇರಿದಂತೆ ಹಲವರಿದ್ದರು. ಆರತಿ ನಿರೂಪಿಸಿದರು. ಡಾ. ವಿ.ಬಿ.ನಿಟಾಲಿ ಪರಿಚಯಿಸಿದರು. ಡಾ. ರಮೇಶಬಾಬು ಸ್ವಾಗತಿಸಿದರು. ಗೌರವ ಕಾರ್ಯದರ್ಶಿ ಅಮರೇಶ ಹಿಪ್ಪರಗಿ ವಂದಿಸಿದರು.