ಕಸಾಪ ಸಹಯೋಗದಲ್ಲಿ ಕನ್ನಡ ಕಾರ್ತಿಕ ‘ಅನುದಿನ ಅನುಸ್ಪಂದನ-2026’ರ ತಿಂಗಳ ಕಾರ್ಯಕ್ರಮ
ಕನ್ನಡ ಸಾಹಿತ್ಯವು ವಿಶ್ವ ಸಾಹಿತ್ಯದ ಭೂಪಟದಲ್ಲಿ ತನ್ನದೇ ಆದ ವಿಶಿಷ್ಟ ಸ್ಥಾನ ಹೊಂದಿದೆ. ಪಂಪ, ರನ್ನ, ಪೊನ್ನ, ಜನ್ನರಿಂದ ಆರಂಭಗೊಂಡ ಕನ್ನಡ ಸಾಹಿತ್ಯದ ಶ್ರೀಮಂತ ಪರಂಪರೆಯು ವಚನ, ದಾಸ, ಆಧುನಿಕ, ದಲಿತ ಹಾಗೂ ಬಂಡಾಯ ಸಾಹಿತ್ಯದ ಮೂಲಕ ಬೆಳೆದು ನಾಡಿನ ಚಿಂತನೆ, ಸಂಸ್ಕೃತಿ ಮತ್ತು ಸಾಮಾಜಿಕ ಪ್ರಜ್ಞೆಗೆ ಅಪಾರ ಕೊಡುಗೆ ನೀಡಿದೆ ಎಂದು ತಹಸೀಲ್ದಾರ ಫಿರೋಜ್ ಷಾ ಸೊಮನಕಟ್ಟಿ ಹೇಳಿದರು.
ಬುಧವಾರ ಸಂಜೆ ತಾಲೂಕಾಡಳಿತ ಸೌಧದಲ್ಲಿ ಕನ್ನಡ ಸಾಹಿತ್ಯ ಪರಿಷತ್ತು ಉತ್ತರ ಕನ್ನಡ ಜಿಲ್ಲಾ ಘಟಕ ಹಾಗೂ ಹಳಿಯಾಳ ತಾಲೂಕು ಘಟಕದ ಸಹಯೋಗದಲ್ಲಿ ಕನ್ನಡ ಕಾರ್ತಿಕ ‘ಅನುದಿನ ಅನುಸ್ಪಂದನ-2026’ರ ನವೆಂಬರ್ ತಿಂಗಳ ಸಾಹಿತ್ಯ ಪಯಣದ ಅಂಗವಾಗಿ ಆಯೋಜಿಸಿದ ಕವನ ರಚನಾ ಸ್ಪರ್ಧೆ ಹಾಗೂ ಕವಿಗೋಷ್ಠಿ ಕಾರ್ಯಮಕ್ಕೆ ಚಾಲನೆ ನೀಡಿ ಅವರು ಮಾತನಾಡಿದರು.ಕಾವ್ಯದಿಂದ ಯಶಸ್ಸು, ಕಾವ್ಯದಿಂದ ಅರ್ಥ, ಕಾವ್ಯದಿಂದ ವ್ಯವಹಾರ ಜ್ಞಾನ, ಕಾವ್ಯದಿಂದ ಶಿವನ ಆಶೀರ್ವಾದ ದೊರೆಯುತ್ತದೆ ಎಂದ ಅವರು, ಸತ್ಯ, ಶಾಂತಿ, ಪ್ರೀತಿ ಹಾಗೂ ಮಾನವೀಯ ಮೌಲ್ಯಗಳ ಬೆಳವಣಿಗೆಯಲ್ಲಿ ಸಾಹಿತ್ಯದ ಪಾತ್ರವನ್ನು ವಿವರಿಸಿದರು. ತಮ್ಮ ‘ಒಡೆದ ಕನಸುಗಳು’ ಕವನವನ್ನು ವಾಚಿಸಿ ಸಭಿಕರನ್ನು ಮಂತ್ರಮುಗ್ಧಗೊಳಿಸಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತು ಅಧ್ಯಕ್ಷೆ ಸುಮಂಗಲ ಚಂದ್ರಕಾಂತ ಅಂಗಡಿ ಮಾತನಾಡಿ ‘ಅನುದಿನ ಅನುಸ್ಪಂದನ’ದಂತಹ ಕಾರ್ಯಕ್ರಮಗಳು ಜನಮನ ತಲುಪಲಿ, ಮಕ್ಕಳಲ್ಲಿ ಓದು, ಬರಹ, ಕವನ ಹಾಗೂ ಸಾಹಿತ್ಯದ ಅಭಿರುಚಿ ಬೆಳೆಯಲಿ ಎಂದು ಆಶಿಸಿದರು.
ಕಾರ್ಯಕ್ರಮದಲ್ಲಿ ಕಸಾಪ ಪ್ರಮುಖರಾದ ಝಾಕೀರ ಜಂಗೂಬಾಯಿ, ಗೋಪಾಲ ಅರಿ, ಕಾಳಿದಾಸ ಬಡಿಗೇರ, ಹಾಗೂ ಇತರರು ಇದ್ದರು.