ಹಲವು ರೋಗಗಳಿಗೆ ಯೋಗಾಭ್ಯಾಸ ರಾಮಬಾಣ

ಯೋಗವು ‘ವಸುಧೈವ ಕುಟುಂಬಕಂ’ಎಂಬ ಭಾರತೀಯ ಸಂಸ್ಕಂತಿಯನ್ನು ಪ್ರತಿಬಿಂಬಿಸುತ್ತದೆ. ಯೋಗಭ್ಯಾಸವು ಎಲ್ಲಾ ರೋಗಗಳಿಗಳಿಂದ ಮುಕ್ತಿಗೊಳಿಸಿ ದೇಹವನ್ನು ಬಲಪಡಿಸಿ ಮನಸ್ಸನ್ನು ಸದೃಢಗೊಳಿಸುತ್ತದೆ. ಈ ವರ್ಷ ‘ಒಂದು ಭೂಮಿ, ಒಂದು ಆರೋಗ್ಯ’ ಎಂಬ ಧ್ಯೇಯವಾಕ್ಯದೊಂದಿಗೆ 11ನೇ ಅಂತಾರಾಷ್ಟ್ರೀಯ ಯೋಗ ದಿನವನ್ನು ಭಾರತ ಸೇರಿದಂತೆ ಜಗತ್ತಿನ ಅನೇಕ ದೇಶಗಳು ವಿಜೃಂಭಣೆಯಿಂದ ಆಚರಿಸುತ್ತಿವೆ.

-ಡಾ। ಆರ್.ಆರ್. ಬಿರಾದಾರ, ಕುಲಸಚಿವರು, ಕರ್ನಾಟಕ ಕೇಂದ್ರೀಯ ವಿವಿ ಕಲಬುರಗಿ

ಮಾನಸಿಕ ಒತ್ತಡ, ಮಾನಸಿಕ ಖಿನ್ನತೆ, ಹೆಚ್ಚಿದ ತೂಕ, ರಕ್ತದೊತ್ತಡ, ಕ್ಯಾನ್ಸರ್, ಆಸ್ತಮಾ, ಮಧುಮೇಹ, ಹೃದಯಾಘಾತ, ಹೃದಯ ಸಂಬಂಧಿತ ಕಾಯಿಲೆಗಳು ಮುಂತಾದ ಮಾನಸಿಕ, ದೈಹಿಕ ಮತ್ತು ಜೀವನಶೈಲಿ ಸಂಬಂಧಿತ ರೋಗಗಳ ಶಾಶ್ವತ ನಿವಾರಣೆಗಾಗಿ ಯೋಗಾಭ್ಯಾಸವು ಒಂದು ಪ್ರಮುಖ ಔಷಧಿ. ಇತ್ತಿಚೀನ ದಿನಮಾನಗಳಲ್ಲಿ ಜಗತ್ತಿನಾದ್ಯಾಂತ ಈ ರೋಗಗಳು ತ್ವರಿತವಾಗಿ ಹೆಚ್ಚಾಗುತ್ತಿರುವುದರಿಂದ, ಯೋಗಾಭ್ಯಾಸಕ್ಕೆ ಜಾಗತಿಕ ಮಟ್ಟದಲ್ಲಿ ಹೆಚ್ಚಿನ ಪ್ರಾಶಸ್ತ್ಯ ದೊರತಿದೆ. ಯೋಗವು ಸಮಾನ್ಯವಾಗಿ ಎಲ್ಲ ರೋಗಗಳಿಂದ ಮುಕ್ತಿಗೊಳಿಸಿ ದೇಹವನ್ನು ಬಲಪಡಿಸಿ ಮನಸ್ಸನ್ನು ಸದೃಢಗೊಳಿಸುತ್ತದೆ. ಜೊತೆಗೆ ದಿನನಿತ್ಯದ ಜೀವನದಲ್ಲಿ ಜಾಗೃತಿ ಮತ್ತು ಹೊಣೆಗಾರಿಕೆಯಿಂದ ಕೂಡಿದ ಜೀವನ ಸಾಗಿಸಲು ಸ್ಪೂರ್ತಿ ನೀಡುತ್ತದೆ.

ಯೋಗ ಅಂದ್ರೆ ಜೋಡಣೆ ಅಥವಾ ಏಕತೆ

ನಾವು ನಮ್ಮನ್ನು ಆರೈಸಿಕೊಳ್ಳುವುದರಿಂದ, ಭೂಮಿಯನ್ನೂ ಆರೈಸಲು ಇದು ದಾರಿಮಾಡಿಕೊಡುತ್ತದೆ. ಯೋಗವು ‘ವಸುಧೈವ ಕುಟುಂಬಕಂ’ಎಂಬ ಭಾರತೀಯ ಸಂಸ್ಕಂತಿಯನ್ನು ಪ್ರತಿಬಿಂಬಿಸುತ್ತದೆ. ಅಂದರೆ ವಿಶ್ವವೇ ಒಂದು ಕುಟುಂಬ ಎಂಬ ಸಂದೇಶವನ್ನು ಇದು ನೀಡುತ್ತದೆ. ಯೋಗ ಎನ್ನುವುದು ಭಾರತೀಯ ಪ್ರಾಚೀನ ದೈಹಿಕ, ಮಾನಸಿಕ ಮತ್ತು ಆಧ್ಯಾತ್ಮಿಕ ಅಭ್ಯಾಸ. ಯೋಗ ಎಂಬ ಪದವು ಸಂಸ್ಕೃತದ ‘ಯುಜ್’ ಧಾತುವಿನಿಂದ ಬಂದಿದ್ದು, ಇದರ ಅರ್ಥ ‘ಜೋಡಣೆ’ ಅಥವಾ ‘ಏಕತೆ’ಯಾಗಿದೆ. ಇದು ಶರೀರ, ಮನಸ್ಸು ಮತ್ತು ಆತ್ಮದ ಸಮನ್ವಯ. ಇದು ಮಾನವನ ದೈಹಿಕ, ಮಾನಸಿಕ ಮತ್ತು ಆತ್ಮೀಯ ಆರೈಕೆಗಾಗಿ ಮಾಡಿದ ಆಧ್ಯಾತ್ಮ ಶಾಸ್ತ್ರೀಯ ಅಭ್ಯಾಸ.

ಯೋಗವು ನಮ್ಮ ಪುರಾತನ ಪರಂಪರೆಯಿಂದ ದೊರೆತ ಅಮೂಲ್ಯ ಉಡುಗೊರೆ. ಇದು ದೇಹ ಮತ್ತು ಮನಸ್ಸಿನ ಏಕತೆ, ಚಿಂತನೆ ಮತ್ತು ಕ್ರಿಯೆಯ ಸಮ್ಮಿಲನವನ್ನು ಪ್ರತಿಬಿಂಬಿಸುತ್ತದೆ. ಇದು ದೈಹಿಕ ಆಸನಗಳು, ಪ್ರಾಣಾಯಾಮ ಮತ್ತು ಧ್ಯಾನವನ್ನು ಒಳಗೊಂಡಿದೆ. ಯೋಗದ ಮುಖ್ಯ ಉದ್ದೇಶ ವ್ಯಕ್ತಿಯನ್ನು ತನ್ನ ಆಂತರಿಕ ಚೇತನ ಹಾಗೂ ಪ್ರಕೃತಿಯೊಂದಿಗೆ ಸಂಯೋಜಿಸುವುದಾಗಿದೆ. ಯೋಗ ಕೇವಲ ವ್ಯಾಯಾಮವಲ್ಲ, ಬದಲಾಗಿ ಮಾನಸಿಕ ಶಾಂತಿ, ದೈಹಿಕ ಆರೋಗ್ಯ, ಆತ್ಮಸಾಕ್ಷಾತ್ಕಾರ ಮತ್ತು ಜೀವನದ ನಿಜವಾದ ಅರ್ಥವನ್ನು ಕಾಣುವ ಪ್ರಮುಖ ಮಾರ್ಗ. ಪ್ರಾಣಾಯಾಮ ಮತ್ತು ಮನಸ್ಸಿನ ಏಕಾಗ್ರತೆಯ ಮೂಲಕ ಸಮಗ್ರ ಆರೋಗ್ಯವನ್ನು ಸಾಧಿಸುವ ಒಂದು ಶಕ್ತಿಶಾಲಿ ಸಾಧನ.

ಜೂ.21 ವರ್ಷದಲ್ಲೇ ಅತೀ ಧೀರ್ಘ ದಿನ

ಯೋಗದ ಜಾಗತಿಕ ಮಹತ್ವವನ್ನು ಗುರುತಿಸಿ 2014ರ ಡಿ.11ರಂದು ಪ್ರಧಾನಿ ನರೇಂದ್ರ ಮೋದಿ ಅವರು ಸಂಯುಕ್ತ ರಾಷ್ಟ್ರಗಳ 69ನೇ ಜನರಲ್ ಅಸೆಂಬ್ಲಿಯ ಉದ್ಘಾಟನಾ ಭಾಷಣದಲ್ಲಿ ಅಂತಾರಾಷ್ಟ್ರೀಯ ಯೋಗ ದಿನಾಚರಣೆಯ ಕುರಿತಾಗಿ ಪ್ರಸ್ತಾಪಿಸಿದರು. ಪ್ರಯುಕ್ತವಾಗಿ ಸಂಯುಕ್ತ ರಾಷ್ಟ್ರಗಳ ಸಂಘವು ಪ್ರತಿ ವರ್ಷ ಜೂ.21ರಂದು ಅಂತಾರಾಷ್ಟ್ರೀಯ ಯೋಗ ದಿನವೆಂದು ಆಚರಣೆ ಮಾಡಲು ಘೋಷಿಸಿತು. ಪರಿಣಾಮವಾಗಿ, ಮೊದಲ ಅಂತಾರಾಷ್ಟ್ರೀಯ ಯೋಗ ದಿನವನ್ನು 2015ರ ಜೂನ್ 21ರಂದು ಭಾರತದ ನವದೆಹಲಿ ಸೇರಿದಂತೆ ನ್ಯೂಯಾರ್ಕ್, ಪ್ಯಾರಿಸ್, ಬೇಜಿಂಗ್, ಬ್ಯಾಂಕಾಕ್, ಕೌಲಾಲಂಪುರ್, ಸಿಯೋಲ್ ಜಗತ್ತಿನಾದ್ಯಾಂತ ಅನೇಕ ದೇಶಗಳು ಯಶಸ್ವಿಯಾಗಿ ಆಚರಿಸಿದವು. ಜೂ. 21ನ್ನು ಯೋಗ ದಿನವೆಂದು ಸೂಚಿಸುವಾಗ, ಪ್ರಧಾನಿ ಮೋದಿ ಅವರು ಈ ದಿನವು ವರ್ಷದಲ್ಲಿಯೇ ಅತಿದೀರ್ಘ ದಿನವಾಗಿದ್ದು, ಇದು ಜಗತ್ತಿನ ಅನೇಕ ಭಾಗಗಳಲ್ಲಿ ಒಂದು ಮಹತ್ವದ ದಿನವಾಗಿದೆ ಎಂದು ತಿಳಿಸಿದ್ದಾರೆ. ಭಾರತೀಯ ಪಂಚಾಂಗದಲ್ಲಿ ಈ ದಿನದಿಂದ ದಕ್ಷಿಣಾಯಾನ ಆರಂಭವಾಗುತ್ತದೆ. ಹಿಂದೂ ಪೌರಾಣಿಕ ಕಥೆಗಳ ಪ್ರಕಾರ, ಶಿವನು ಮೊದಲ ಯೋಗಿಯಾಗಿ ಇದೇ ದಿನ ಮಾನವಜಾತಿಗೆ ಯೋಗದ ಜ್ಞಾನವನ್ನು ನೀಡಲು ಆರಂಭಿಸಿದನು ಎಂಬ ನಂಬಿಕೆಯಿದೆ. ಪ್ರಾಚೀನ ಭಾರತೀಯ ಋಷಿಗಳೂ ಕೂಡ ಈ ದಿನವನ್ನು ಪವಿತ್ರ ದಿನ ಎಂದು ಕರೆದಿದ್ದಾರೆ. ಅಂತಾರಾಷ್ಟ್ರೀಯ ಯೋಗ ದಿನದ ಉದ್ದೇಶವೆಂದರೆ, ಯೋಗ ಅಭ್ಯಾಸದಿಂದ ಉಂಟಾಗುವ ಅನೇಕ ಲಾಭಗಳ ಕುರಿತು ಜಾಗತಿಕ ಮಟ್ಟದಲ್ಲಿ ಜನರಗೆ ಅರಿವು ಮೂಡಿಸುವುದಾಗಿದೆ.

‘ಒಂದು ಭೂಮಿ, ಒಂದು ಆರೋಗ್ಯ’

ಈ ವರ್ಷ ‘ಒಂದು ಭೂಮಿ, ಒಂದು ಆರೋಗ್ಯ’ ಎಂಬ ಪ್ರಮುಖ ವಿಷಯದೊಂದಿಗೆ 11ನೇ ಅಂತಾರಾಷ್ಟ್ರೀಯ ಯೋಗ ದಿನವನ್ನು ಭಾರತ ಸೇರಿದಂತೆ ಜಗತ್ತಿನ ಅನೇಕ ದೇಶಗಳು ವಿಜೃಂಭಣೆಯಿಂದ ಆಚರಿಸುತ್ತಿವೆ. ಇದು ವೈಯಕ್ತಿಕ ಆರೋಗ್ಯ ಮತ್ತು ಭೂಮಿಯ ಆರೋಗ್ಯ ಇವು ಎರಡೂ ಅವಿಭಾಜ್ಯವಾಗಿ ಸಂಪರ್ಕಹೊಂಡಿರುವ ಮಹತ್ವದ ಸತ್ಯವನ್ನು ಪ್ರತಿಧ್ವನಿಸುತ್ತದೆ. ಇಂದು ಯೋಗವನ್ನು ವಿವಿಧ ರೂಪಗಳಲ್ಲಿ ಜಗತ್ತಿನಾದ್ಯಾಂತ ಅಭ್ಯಾಸಿಸಲಾಗುತ್ತಿದೆ ಮತ್ತು ಇದರ ಮಹತ್ವ ದಿನೇ ದಿನೇ ಹೆಚ್ಚುತ್ತಿದೆ. ದೇಹವನ್ನು ಆರೋಗ್ಯವಾಗಿಡಲು, ಮನಸ್ಸನ್ನು ಶಾಂತವಾಗಿಡಲು, ಆತ್ಮವನ್ನು ಜ್ಞಾನದತ್ತ ಕೊಂಡೊಯ್ಯುಲು ಮತ್ತು ಮಾನವರು ಮುಕ್ತಿಯ ಮಾರ್ಗವನ್ನು ತಲುಪಲು ಹಲವಾರು ಯೋಗಾಭ್ಯಾಸಗಳು ಅಭಿವೃದ್ಧಿಗೊಂಡಿವೆ. ದೇಹದ ಅಭ್ಯಾಸಗಳಿಗೆ ಆಸನಗಳು, ಉಸಿರಾಟದ ನಿಯಂತ್ರಣಕ್ಕೆ ಪ್ರಾಣಾಯಾಮ, ಧ್ಯಾನ ಅಥವಾ ಮೌನತೆಯ ಅಭ್ಯಾಸಕ್ಕೆ ಧ್ಯಾನ, ಏಕಾಗ್ರತೆಗೆ ಸಂಬಂಧಿಸಿದಂತೆ ಧಾರಣೆ ಯೋಗಾಭ್ಯಾಸಗಳಿವೆ. ಈ ವಿವಿಧ ಯೋಗ ಶೈಲಿಗಳು ಮುಖ್ಯವಾಗಿ 4 ವಿಭಾಗಗಳೊಳಗೆ ಬರುವವು . ಅವುಗಳೆಂದರೆ ಕರ್ಮ ಯೋಗ, ಜ್ಞಾನ ಯೋಗ, ಭಕ್ತಿ ಯೋಗ ಮತ್ತು ಕ್ರಿಯಾ ಯೋಗ.

300 ದಶಲಕ್ಷ ಜನರಿಂದ ಯೋಗಾಭ್ಯಾಸ

ಯೋಗ ಒಂದು ವೈಜ್ಞಾನಿಕ ಮತ್ತು ಆಧ್ಯಾತ್ಮಿಕ ಮಾರ್ಗವಾಗಿದೆ. ಇದು ದೈಹಿಕ ಹಾಗೂ ಮಾನಸಿಕ ಆರೋಗ್ಯವನ್ನು ಸಮಗ್ರವಾಗಿ ನಿಭಾಯಿಸುವ ಒಂದು ಅಭ್ಯಾಸ. ವಿಶೇಷವಾಗಿ ಜೀವನಶೈಲಿ, ಮಾನಸಿಕ ಒತ್ತಡ ಮತ್ತು ಕೆಟ್ಟ ನಡವಳಿಕೆಯೊಂದಿಗೆ ಸಂಬಂಧಿಸಿದ ಹಲವಾರು ಸಾಮಾನ್ಯ ಆರೋಗ್ಯ ಸಮಸ್ಯೆಗಳನ್ನು ಯೋಗದ ಮೂಲಕ ತಡೆಗಟ್ಟಬಹುದು, ನಿರ್ವಹಿಸಬಹುದು ಅಥವಾ ಸುಧಾರಿಸಬಹುದು. ಯೋಗವು ಎಲ್ಲ ಸಮಸ್ಯೆಗಳಿಗೆ ಪರಿಹಾರವಲ್ಲದಿದ್ದರೂ, ಇದು ಪರಿಣಾಮಕಾರಿ ಪೂರಕ ಚಿಕಿತ್ಸೆ. ಇಂದು ಜಾಗತಿಕ ಮಟ್ಟದಲ್ಲಿ 300 ದಶಲಕ್ಷ ಜನರು ಯೋಗಾಸನ ಮಾಡುತ್ತಾರೆಂದು ಅಂದಾಜಿಸಲಾಗಿದೆ. ಇದರಲ್ಲಿ ಶೇ.72ರಷ್ಟು ಮಹಿಳೆರಿದ್ದರೆ, ಶೇ.28ರಷ್ಟು ಮಾತ್ರ ಪುರುಷರಿದ್ದಾರೆ. ಜಗತ್ತಿನ ಒಟ್ಟು ಜನಸಂಖ್ಯೆಯಲ್ಲಿ ಶೇ.4.5ರಷ್ಟು ಮಾತ್ರ ಯೋಗಾಭ್ಯಾಸದಲ್ಲಿ ತೊಡಗಿಕೊಂಡಿದ್ದಾರೆ. 2024ರಲ್ಲಿ ಜಾಗತಿಕ ಯೋಗ ಮಾರುಕಟ್ಟೆಯ ಗಾತ್ರ (ಸ್ಟುಡಿಯೋಗಳು, ತರಗತಿಗಳು, ರಿಟ್ರೀಟ್‍ಗಳು, ಆಕ್ಸೆಸರಿಗಳು, ಡಿಜಿಟಲ್ ವೇದಿಕೆಗಳು ಸೇರಿ) ಸುಮಾರು 136.8 (ಜಿಡಿಪಿಯ ಶೇ.0.2) ಬಿಲಿಯನ್ ಅಮೆರಿಕ ಡಾಲರ್‌ಗಳಷ್ಟಿದೆ ಎಂದು ಅಂದಾಜಿಸಲಾಗಿದ್ದು, ಇದು ವಾರ್ಷಿಕ ಸರಾಸರಿ ಶೇ.6.6ರ ದರದಲ್ಲಿ ಬೆಳೆಯಲಿದೆ. ಅಲ್ಲದೆ 2033ರ ವೇಳೆಗೆ ಇದು ಸುಮಾರು 243.5 ಬಿಲಿಯನ್ ಅಮೆರಿಕ ಡಾಲರ್‌ಗಳಿಗೆ ಹೆಚ್ಚಾಗಲಿದೆ ಎಂದು ಅಂದಾಜಿಸಲಾಗಿದೆ.

ಯೋಗದಿಂದ ₹5000 ಕೋಟಿ ಆದಾಯ

ಭಾರತವು ಯೋಗದ ಜನ್ಮ ಭೂಮಿ ಆಗಿದ್ದರಿಂದ 150 ದಶಲಕ್ಷ ಜನರು (ಶೇ.12) ಯೋಗಾಸನದಲ್ಲಿ ತೊಡಗಿದ್ದಾರೆ. ಅದರಂತೆ ಅಮೆರಿಕದಲ್ಲಿ (ಶೇ.10.3) 35 ದಶಲಕ್ಷ, ಚೀನಾದಲ್ಲಿ (ಶೇ.0.7) 10 ದಶಲಕ್ಷ, ಕೆನಡಾದಲ್ಲಿ (ಶೇ.19.5) 7.6 ದಶಲಕ್ಷ, ಇಟಲಿದಲ್ಲಿ (ಶೇ.5.1) 3 ದಶಲಕ್ಷ, ಜರ್ಮನ್‍ದಲ್ಲಿ (ಶೇ.3.6) 3.21 ದಶಲಕ್ಷ, ಅಸ್ಟ್ರೇಲಿಯಾದಲ್ಲಿ(ಶೇ.5.6) 1.5 ದಶಲಕ್ಷ ಮತ್ತು ಇಂಗ್ಲೆಂಡ್‌ನಲ್ಲಿ (ಶೇ.0.7) 0.50 ದಶಲಕ್ಷ ಜನರು ವಿವಿಧ ಯೋಗಾಸನಗಳಲ್ಲಿ ತೊಡಗಿಕೊಂಡಿದ್ದಾರೆ. ಜಗತ್ತಿನಲ್ಲಿಯೇ ಭಾರತವು ಯೋಗಾಸನದಲ್ಲಿ ಮುಂಚೋಣಿಯಲ್ಲಿದ್ದು, ಶೇ.12ರಷ್ಟು ಜನರು ಯೋಗಾಭ್ಯಾಸ ಮಾಡುತ್ತಿದ್ದಾರೆ. ಆದರೆ ಶೇ.7ರಷ್ಟು ಪ್ರತಿದಿನ, ಶೇ.6ರಷ್ಟು ವಾರಕ್ಕೊಮ್ಮೆ, ಶೇ.22ರಷ್ಟು ತಿಂಗಳಿಗೆ ಒಮ್ಮೆ ಮತ್ತು ಶೇ. 62ರಷ್ಟು ಜನರು ಅಪರೂಪವಾಗಿ ವಿವಿಧ ಯೋಗಾಸನಗಳು ಮಾಡುತ್ತಿದ್ದಾರೆ. 2024ರಲ್ಲಿ ಭಾರತದ ಯೋಗ ಮಾರುಕಟ್ಟೆಯ ಗಾತ್ರ 81.7 ಬಿಲಿಯನ್ ಅಮೆರಿಕ ಡಾಲರ್‌ಗಳಿಷ್ಟಿದೆ ಎಂದು ಲೆಕ್ಕಹಾಕಲಾಗಿದೆ. ಯೋಗಕ್ಕೆ ಸಂಬಂಧಿಸಿದ ಆರ್ಥಿಕ ಚಟುವಟಿಕೆಗಳಿಂದ ಪ್ರತಿ ವರ್ಷ ₹5000 ಕೋಟಿಗಳಷ್ಟು ಆದಾಯವಿದೆ. ಅಂದರೆ ಪ್ರತಿ ವರ್ಷ ಶೇ.2ರಷ್ಟು ಇದು ಜಿಡಿಪಿಗೆ ಕೊಡುಗೆ ನೀಡುತ್ತದೆ. ಯೋಗಾಸನಗಳ ನಿಯಮಿತ ಅಭ್ಯಾಸದಿಂದ ಗರಿಷ್ಠ ಆರೋಗ್ಯ ಲಾಭಗಳು ಲಭ್ಯವಾಗುತ್ತವೆ. ಯೋಗ ಅಭ್ಯಾಸಕರ ಒಂದು ಸಮೀಕ್ಷಯ ಪ್ರಕಾರ, ಶೇ.77ರಷ್ಟು ಜನರ ನೋವು ಮತ್ತು ಜಿಡ್ಡು ಕಡಿಮೆಯಾಗಿ ಶಾರೀರಿಕ ಶಕ್ತಿ ಮತ್ತು ಸಹನಶೀಲತೆಯಲ್ಲಿ ಹೆಚ್ಚಳ, ಶೇ. 82ರಷ್ಟು ಜನರು ಉರಿಯೂತದಲ್ಲಿ ಕಡಿತ, ಶೇ. 80ರಷ್ಟು ಜನರು ಬೆನ್ನುನೋವು ನಿವಾರಣೆ, ಶೇ. 47ರಷ್ಟು ಜನರು ಹೃದಯ ಸಂಬಂಧಿತ ಸಮಸ್ಯಗಳು ಕಡಿಮೆಯಾಗಿವೆ ಎಂದು ಹೇಳಿದ್ದಾರೆ.

ಆಯುಷ್‌ ಸಚಿವಾಲಯ ಸ್ಥಾಪನೆ

ಅಲ್ಲದೆ, ಶೇ.74ರಷ್ಟು ಜನರು ಚಲನೆ ಸಾಮಥ್ರ್ಯ ಹೆಚ್ಚಾಗಿದೆ ಮತ್ತು ಶೇ.37ರಷ್ಟು ಜನರು ಮದ್ಯಪಾನ ಮತ್ತು ಧೂಮಪಾನ ಅಭ್ಯಾಸದಲ್ಲಿ ಕಡಿಮೆಯಾಗಿದೆ ಎಂದು ವರದಿಮಾಡಿದ್ದಾರೆ. ಯೋಗ ಅಭ್ಯಾಸಕರ ಪೈಕಿ ಶೇ. 80ರಷ್ಟು ಜನರ ಬೆನ್ನು ಹಿಂದಿನ ನಡುಮೂಳೆ ನೋವು ಕಡಿಮೆಯಾಗಿದೆ. ಈ ಪುರಾತನ ವಿಜ್ಞಾನವು ಭಾರತೀಯ ಜೀವನದ ಭಾಗವಾಗಿ ಬೆರೆತು ಹೋಗಿರುವುದರಿಂದ, ಭಾರತ ಸರ್ಕಾರವು ರಾಷ್ಟ್ರ ಮಟ್ಟದಲ್ಲಿ ಜನರ ಸಮಗ್ರ ಆರೋಗ್ಯವನ್ನು ಉತ್ತೇಜಿಸುವ ಉದ್ದೇಶದಿಂದ ಆಯುಷ್‌ ಸಚಿವಾಲಯ (ಆಯುರ್ವೇದ, ಯೋಗ, ಯುನಾನಿ, ಸಿದ್ಧ, ಮತ್ತು ಹೋಮಿಯೋಪಥಿ) ಎಂಬ ವಿಶೇಷ ಸಚಿವಾಲಯವನ್ನೇ ಸ್ಥಾಪಿಸಿದೆ. ಉತ್ತಮ ಆರೋಗ್ಯದ ಮೂಲಕ, ಜ್ಞಾನಭರಿತ, ಸಂಪತ್‍ಭರಿತ, ಸಂತೋಷಭರಿತ, ದೀಘಕಾಲಿಕ ಜೀವನ ಸಾಗಿಸಲು, ಪ್ರತಿಯೊಬ್ಬರೂ ವಿವಿಧ ಯೋಗಾಸನಗಳ ಕುರಿತಾಗಿ ಸಮಗ್ರವಾಗಿ ತಿಳಿದಕೊಂಡು ನಮಗೆ ಅವಶ್ಯಕವಾದ ಯೋಗಾಸನಗಳನ್ನು ಪ್ರತಿದಿನವೂ ಅಭ್ಯಾಸಮಾಡಬೇಕಿದೆ. ಶಿಕ್ಷಣದ ವಿವಿಧ ಹಂತಗಳಲ್ಲಿ ಯೋಗಾಸನವು ಒಂದು ಕಡ್ಡಾಯ ವಿಷಯವಾಗಿ ಇಂದಿನ ಯುವಕರು ಅಭ್ಯಾಸಮಾಡಿ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕಿದೆ. ಇದರಿಂದ ಸ್ವಾಸ್ಥ್ಯ, ಸದೃಢ ಮತ್ತು ಶ್ರೇಷ್ಠ ಸಮಾಜವನ್ನು ನಿರ್ಮಾಣ ಮಾಡುವುದರ ಮೂಲಕ 2047ರೊಳಗೆ ವಿಕಸಿತ ಭಾರತ ಕನಸು ನನಾಸಾಗಿಸುವಲ್ಲಿ ಪ್ರತಿಯೊಬ್ಬರೂ ಸಕ್ರೀಯವಾಗಿ ಪಾಲ್ಗೊಳ್ಳಬೇಕಿದೆ.

ಉತ್ತಮ ಆರೋಗ್ಯದ ಮೂಲಕ, ಜ್ಞಾನಭರಿತ, ಸಂಪತ್‍ಭರಿತ, ಸಂತೋಷಭರಿತ, ದೀಘಕಾಲಿಕ ಜೀವನ ಸಾಗಿಸಲು, ಪ್ರತಿಯೊಬ್ಬರೂ ವಿವಿಧ ಯೋಗಾಸನಗಳ ಕುರಿತಾಗಿ ಸಮಗ್ರವಾಗಿ ತಿಳಿದಕೊಂಡು ನಮಗೆ ಅವಶ್ಯಕವಾದ ಯೋಗಾಸನಗಳನ್ನು ಪ್ರತಿದಿನವೂ ಅಭ್ಯಾಸಮಾಡಬೇಕಿದೆ. ಶಿಕ್ಷಣದ ವಿವಿಧ ಹಂತಗಳಲ್ಲಿ ಯೋಗಾಸನವು ಒಂದು ಕಡ್ಡಾಯ ವಿಷಯವಾಗಿ ಇಂದಿನ ಯುವಕರು ಅಭ್ಯಾಸಮಾಡಿ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕಿದೆ. ಇದರಿಂದ ಸ್ವಾಸ್ಥ್ಯ, ಸದೃಢ ಮತ್ತು ಶ್ರೇಷ್ಠ ಸಮಾಜವನ್ನು ನಿರ್ಮಾಣ ಮಾಡುವುದರ ಮೂಲಕ 2047ರೊಳಗೆ ವಿಕಸಿತ ಭಾರತ ಕನಸು ನನಾಸಾಗಿಸುವಲ್ಲಿ ಪ್ರತಿಯೊಬ್ಬರೂ ಸಕ್ರೀಯವಾಗಿ ಪಾಲ್ಗೊಳ್ಳಬೇಕಿದೆ.