ನೀರಜ್ ಮುಡಿಗೆ ‘ಡೈಮಂಡ್‌’ ಕಿರೀಟ : 88.16 ಮೀ. ದೂರ ಜಾವೆಲಿನ್‌ ಎಸೆದ ಚೋಪ್ರಾ
2 ಬಾರಿ ಒಲಿಂಪಿಕ್‌ ಪದಕ ವಿಜೇತ ಭಾರತದ ತಾರಾ ಜಾವೆಲಿನ್‌ ಎಸೆತಗಾರ ನೀರಜ್ ಚೋಪ್ರಾ 2 ವರ್ಷಗಳ ಬಳಿಕ ಡೈಮಂಡ್‌ ಲೀಗ್‌ ಕಿರೀಟ ಗೆದ್ದಿದ್ದಾರೆ.
;Resize=(400,300))
ಪ್ಯಾರಿಸ್‌: 2 ಬಾರಿ ಒಲಿಂಪಿಕ್‌ ಪದಕ ವಿಜೇತ ಭಾರತದ ತಾರಾ ಜಾವೆಲಿನ್‌ ಎಸೆತಗಾರ ನೀರಜ್ ಚೋಪ್ರಾ 2 ವರ್ಷಗಳ ಬಳಿಕ ಡೈಮಂಡ್‌ ಲೀಗ್‌ ಕಿರೀಟ ಗೆದ್ದಿದ್ದಾರೆ. ಶುಕ್ರವಾರ ಮಧ್ಯರಾತ್ರಿ ನಡೆದ ಪ್ಯಾರಿಸ್‌ ಡೈಮಂಡ್‌ ಲೀಗ್‌ನಲ್ಲಿ 27 ವರ್ಷದ ನೀರಜ್ ಮೊದಲ ಪ್ರಯತ್ನದಲ್ಲೇ 88.13 ಮೀಟರ್‌ ದೂರಕ್ಕೆ ಜಾವೆಲಿನ್‌ ಎಸೆದು ಅಗ್ರಸ್ಥಾನಿಯಾದರು.
2ನೇ ಪ್ರಯತ್ನದಲ್ಲಿ 85.10 ಮೀ. ದಾಖಲಿಸಿದ ನೀರಜ್, ಮುಂದಿನ 3 ಪ್ರಯತ್ನಗಳಲ್ಲಿ ಫೌಲ್‌ ಮಾಡಿದರು. 6ನೇ ಎಸೆತದಲ್ಲಿ 82.89 ಮೀಟರ್‌ ದಾಖಲಿಸಿದರು. ಅವರಿಗೆ ಕಠಿಣ ಸ್ಪರ್ಧೆ ನೀಡಿದ ಜರ್ಮನಿಯ ಜೂಲಿಯನ್‌ ವೆಬೆರ್ 87.88 ಮೀಟರ್‌ನೊಂದಿಗೆ 2ನೇ ಸ್ಥಾನಿಯಾದರೆ, ಬ್ರೆಜಿಲ್‌ನ ಲೂಯಿಸ್‌ ಮೌರಿಸಿಯೊ ಡ ಸಿಲ್ವ(86.62 ಮೀ.) 3ನೇ ಸ್ಥಾನ ಪಡೆದುಕೊಂಡರು.
ಇತ್ತೀಚೆಗೆ ನಡೆದ ದೋಹಾ ಡೈಮಂಡ್‌ ಲೀಗ್‌ನಲ್ಲಿ ನೀರಜ್ 90 ಮೀ. ಗುರಿ ದಾಟಿದ್ದರು. 90.23 ಮೀಟರ್‌ ಎಸೆದಿದ್ದ ಅವರು 2ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದರು. ವೆಬೆರ್ 91.06 ಮೀ. ದಾಖಲಿಸಿ ಅಗ್ರಸ್ಥಾನಿಯಾಗಿದ್ದರು. ಈ ಬಾರಿ ವೆಬೆರ್‌ರನ್ನು ಹಿಂದಿಕ್ಕಿ ನೀರಜ್ ಕಿರೀಟ ಗೆದ್ದಿದ್ದಾರೆ.
2 ವರ್ಷಗಳ ಬಳಿಕ
ಡೈಮಂಡ್‌ ಕಿರೀಟ
ನೀರಜ್ ಈ ಹಿಂದೆ ಡೈಮಂಡ್‌ ಲೀಗ್‌ ಗೆದ್ದಿದ್ದು 2023ರ ಜೂನ್‌ನಲ್ಲಿ. ಅವರು ಸ್ವಿಜರ್‌ಲೆಂಡ್‌ನ ಲಾಸನ್‌ ಲೀಗ್‌ನಲ್ಲಿ ಕೊನೆ ಬಾರಿ ಕಿರೀಟ ಗೆದ್ದಿದ್ದರು. ಆ ಬಳಿಕ ನಡೆದ 6 ಡೈಮಂಡ್‌ ಲೀಗ್‌ ಸ್ಪರ್ಧೆಗಳಲ್ಲಿ 2ನೇ ಸ್ಥಾನಿಯಾಗಿದ್ದರು. ಅಲ್ಲದೆ, ಪ್ಯಾರಿಸ್‌ ಲೀಗ್‌ನಲ್ಲಿದು ನೀರಜ್‌ಗೆ ಮೊದಲ ಜಯ. 2017ರಲ್ಲಿ ಅವರು 5ನೇ ಸ್ಥಾನಿಯಾಗಿದ್ದರು.