ಅತ್ಯಂತ ಲಾಭದಾಯಕ, ಪರಿಸರ ಪೂರಕವಾದ ‘ಜೇನು ಕೃಷಿ’

ಬಿ.ಶೇಖರ್‌ ಗೋಪಿನಾಥಂ

ಇಂದಿನ ಬದಲಾಗುತ್ತಿರುವ ಕಾಲಘಟ್ಟದಲ್ಲಿ ಕೃಷಿಯು ಕೇವಲ ಬೆಳೆ ಬೆಳೆಯುವುದಕ್ಕೆ ಸೀಮಿತವಾಗಿಲ್ಲ. ರೈತರ ಆದಾಯ ದ್ವಿಗುಣಗೊಳಿಸಲು ಮತ್ತು ಕೃಷಿ ಉತ್ಪಾದಕತೆ ಸುಸ್ಥಿರವಾಗಿ ಹೆಚ್ಚಿಸಲು ಉಪ ಕಸುಬುಗಳ ಅಗತ್ಯತೆ ತುಂಬಾ ಇದೆ. ಇಂತಹ ಉಪಕಸುಬುಗಳಲ್ಲಿ ಅತ್ಯಂತ ಲಾಭದಾಯಕ ಮತ್ತು ಪರಿಸರ ಪೂರಕವಾದದ್ದು ಎಂದರೇ ಜೇನು ಕೃಷಿ.

ಜೇನು ಕೃಷಿಯು ಅತಿ ಕಡಿಮೆ ಬಂಡವಾಳದೊಂದಿಗೆ, ಸಣ್ಣ ಭೂಮಿ ಇರುವ ಅಥವಾ ಭೂಹೀನ ರೈತರೂ ಮಾಡಬಹುದಾದ ಒಂದು ವಿಶಿಷ್ಟ ಉದ್ಯಮವಾಗಿದೆ. ಇದು ಕೇವಲ ಜೇನುತುಪ್ಪದ ಉತ್ಪಾದನೆಗೆ ಮಾತ್ರವಲ್ಲದೆ, ಸಮಸ್ತ ಜೀವಸಂಕುಲದ ಅಸ್ತಿತ್ವಕ್ಕೆ ಕಾರಣವಾಗಿರುವ ಪರಾಗಸ್ಪರ್ಶ ಪ್ರಕ್ರಿಯೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಜೇನು ನೊಣಗಳು ಸಂಘ ಜೀವಿಗಳು, ಗೂಡುಗಳನ್ನು ಕಟ್ಟಿಕೊಂಡು ಸಹಕಾರ ಬಾಳ್ವೆಯಲ್ಲಿ ಅನ್ಯೋನ್ಯತೆಯಿಂದ ಜೀವನ ನಡೆಸುತ್ತವೆ. ಶಿಸ್ತು, ಸಹಕಾರ, ಸ್ವಾವಲಂಭನೆಯಿಂದ ಕೂಡಿದ ಸಾಮಾಜಿಕ ಜೀವನ ನಡೆಸುವ ಕೀಟ, ಆಹಾರ ಸಂಗ್ರಹಣೆ, ಜೇನು ಉತ್ಪಾದಿಸುವುದು, ಮರಿಗಳ ಲಾಲನೆ ಪಾಲನೆ ಮಾಡುವುದು ಮತ್ತು ಕುಟುಂಬ ರಕ್ಷಣೆ ಎಂಬ ಮುಂತಾದ ಕುತೂಹಲ ಕೆರಳಿಸುವ ನಡವಳಿಕೆಗಳನ್ನು ನೋಡಬಹುದು ಎಂದು ಮೈಸೂರು ತಾಲೂಕು ನಾಗನಹಳ್ಳಿಯ ವಿಸ್ತರಣಾ ಶಿಕ್ಷಣ ಘಟಕದ ಕೃಷಿ ಕೀಟಶಾಸ್ತ್ರ ಸಹಾಯಕ ಪ್ರಾಧ್ಯಾಪಕಿ ಡಾ.ಎಂ.ಆರ್. ಮೌಲ್ಯ ತಿಳಿಸಿದ್ದಾರೆ.

ಎಲ್ಲಕ್ಕಿಂತ ಮಿಗಿಲಾಗಿ ಜೇನು ನೊಣಗಳು ಮಾಡುವ ಪರಾಗಸ್ಪರ್ಶಕ್ರಿಯೆಯಿಂದ ಬೆಳೆಗಳಲ್ಲಿ ಆಗುವ ಹೆಚ್ಚಿನ ಇಳುವರಿಯು ಅತ್ಯಂತ ಮಹತ್ತರವಾದದ್ದು, ಜೇನುತುಪ್ಪ ಉತ್ಪಾದನೆಗಿಂತ ನಮ್ಮ ಬೆಳೆಗಳಲ್ಲಿ ಜೇನುನೊಣಗಳ ಪರಾಗಸ್ಪರ್ಶಕ್ರಿಯೆಯಿಂದ ಆಗುವ ಲಾಭ ಸುಮಾರು 20 ಪಟ್ಟು ಹೆಚ್ಚು ಎಂದು ಕಂಡು ಬಂದಿದೆ.

ಜೇನು ಕೃಷಿ ತಿಳವಳಿಕೆ ಅವಶ್ಯಕ:

ಜೇನು ಮನೆಯಿಂದ ಒಂದು ಕಿ.ಮೀ. ಸುತ್ತಳತೆಯಲ್ಲಿ ವರ್ಷಪೂರ್ತಿ ಹೂ ಬಿಡುವ ಸಸ್ಯ ಸಂಪತ್ತು ಸಿಗುವಂತಿರಬೇಕು. ಶುದ್ಧವಾದ ನೀರು ಸಿಗುತ್ತಿರಬೇಕು. ಮಳೆ, ಗಾಳಿ ಮತು ಬಿಸಿಲಿನಿಂದ ಜೇನು ಕುಟುಂಬಗಳಿಗೆ ರಕ್ಷಣೆ ಇರಬೇಕು. ಐಎಸ್ಐ ಜೇನು ಪೆಟ್ಟಿಗೆಗಳನ್ನೇ ಜೇನು ಸಾಕಾಣಿಕೆಗೆ ಉಪಯೋಗಿಸಬೇಕು.

ಬಾಳೆ, ಹುಚ್ಚೆಳ್ಳು, ತುಂಬೆ, ಹುರುಳಿ, ಕಾಫಿ, ಎಳ್ಳು, ಏಲಕ್ಕಿ, ಸೂರ್ಯಕಾಂತಿ, ಸಾಸಿವೆ, ಕೊತ್ತಂಬರಿ, ಹತ್ತಿ ಗಿಡಗಳು, ಕುದುರೆ ಮಸಾಲೆ, ಸೀಗೆ, ರಾಗಿ, ಈರುಳ್ಳಿ, ಭತ್ತ, ಜೋಳ, ಅಂಟಿಗೋನಂ ಇತ್ಯಾದಿ ಹುಲು ಮತ್ತು ಬಳ್ಳಿಗಳು ಜೇನು ನೊಣಗಳಿಗೆ ಆಹಾರವನ್ನೊದಗಿಸುವ ಪ್ರಮುಖ ಬೆಳೆಗಳು.

ಇದಕ್ಕಿಂತ ಮುಖ್ಯವಾಗಿ ಜೇನುನೊಣಗಳ ಪರಾಗಸ್ಪರ್ಶ ಕಾರ್ಯದಿಂದ ವಿವಿಧ ಬೆಳೆಗಳಲ್ಲಿ ಉತ್ತಮ ಗುಣಮಟ್ಟ ಕಾಳಿನ ಹೆಚ್ಚಿನ ಇಳುವರಿಯಿಂದ ಬರುವ ಆದಾಯ ಇನ್ನು ಹೆಚ್ಚಾಗಿರುತ್ತದೆ. ಬೇಕಾದರೆ ಜೇನು ಕುಟುಂಬಗಳನ್ನು ಬೇರೆ ರೈತರ ಬೆಳೆಗಳ ಪರಾಗಸ್ಪರ್ಶ ಕಾರ್ಯಕ್ಕೆ ಒದಗಿಸಿ ಅದರಿಂದಲೂ ಹೆಚ್ಚಿನ ಜೇನುತುಪ್ಪದ ಜೊತೆಗೆ ಹಣವನ್ನು ಸಹ ಸಂಪಾದಿಸಬಹುದು.

ಒಂದು ಜೇನುಗೂಡಿನಲ್ಲಿ ರಾಣಿ, ಕೆಲಸಗಾರ ಮತ್ತು ಗಂಡು ನೊಣಗಳೆಂಬ ಮೂರು ಬಗೆಯ ಜಾತಿಗಳಿರುತ್ತವೆ. ಒಂದು ಸಾಧಾರಣ ಜೇನು ಸಂಸಾರದಲ್ಲಿ ಸುಮಾರು 20 ಸಾವಿರದಿಂದ 40 ಸಾವಿರ ಜೇನು ನೊಣಗಳಿದ್ದು, ಅವುಗಳಲ್ಲಿ ಒಂದೇ ಒಂದು ರಾಣಿ ನೊಣ ಮತ್ತು ಕೆಲವು ನೂರು ಗಂಡು ನೊಣಗಳಿದ್ದು, ಉಳಿದ ಎಲ್ಲವೂ ಕೆಲಸಗಾರ ನೊಣಗಳಾಗಿರುತ್ತವೆ.

ಭೂಮಿಯ ಫಲವತ್ತತೆ ಮತ್ತು ಬೆಳೆಗಳ ಇಳುವರಿಯನ್ನು ಕಾಪಾಡಿಕೊಳ್ಳುತ್ತಲೇ ರೈತರು ಸ್ವಾವಲಂಬಿಗಳಾಗಲು ಜೇನು ಸಾಕಣೆ ಅತ್ಯುತ್ತಮ ಮಾರ್ಗ. ಸರ್ಕಾರ ಮತ್ತು ಸಮಾಜವು ಜಂಟಿಯಾಗಿ ಜಾಗೃತಿ ಮೂಡಿಸಿದರೆ, ಮುಂದಿನ ದಿನಗಳಲ್ಲಿ ಪ್ರತಿಯೊಬ್ಬ ರೈತನ ತೋಟದಲ್ಲೂ ಒಂದು ಜೇನು ಪೆಟ್ಟಿಗೆಯನ್ನು ಕಾಣಬಹುದು. ಆ ಮೂಲಕ ನಮ್ಮ ಕೃಷಿ ಕ್ಷೇತ್ರವು ಜೇನು ಸಮೃದ್ಧವಾಗುವುದರಲ್ಲಿ ಸಂದೇಹವಿಲ್ಲ.