ಕುಕ್ಕೆ ಸುಬ್ರಹ್ಮಣ್ಯ ಕ್ಷೇತ್ರ: ಎರಡು ಆದ್ಯತೆ ಅಭಿವೃದ್ಧಿ ಕಾಮಗಾರಿ ಸಿದ್ಧತೆ

ಕನ್ನಡಪ್ರಭ ವಾರ್ತೆ ಸುಬ್ರಹ್ಮಣ್ಯ

ಕಡಬ ತಾಲೂಕಿನ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಸಮಗ್ರ ಅಭಿವೃದ್ಧಿಗೆ ಸಂಬಂಧಿಸಿದಂತೆ ಮೂರನೇ ಹಂತದ ಪ್ರಸ್ತಾಪಿತ ಕಾಮಗಾರಿಗಳ ಬಗ್ಗೆ ಮಾಸ್ಟರ್ ಪ್ಲಾನ್ ಯೋಜನೆಯ ಮೇಲ್ವಿಚಾರಣಾ ಸಮಿತಿ ಸಭೆ ಬೆಂಗಳೂರಿನ ಧಾರ್ಮಿಕದತ್ತಿ ಇಲಾಖಾ ಕಚೇರಿಯಲ್ಲಿ ಇತ್ತೀಚೆಗೆ ನಡೆಯಿತು.ಮುಜರಾಯಿ ಸಚಿವ ರಾಮಲಿಂಗ ರೆಡ್ಡಿ ನೇತೃತ್ವ ವಹಿಸಿದ್ದರು.

ವಿವಿಧ ಕಾಮಗಾರಿಗಳು:

ಎರಡನೇ ಆದ್ಯತೆಯಲ್ಲಿ ೧೧ ಕಾಮಗಾರಿಗಳನ್ನು ನಡೆಸಲಾಗುತ್ತದೆ. ೬೮ ಕೋಟಿಯಲ್ಲಿ ವಾಣಿಜ್ಯ ಸಂಕೀರ್ಣ ಕಟ್ಟಡ, ೨.೫೦ ಕೋಟಿಯಲ್ಲಿ ಕಾಶಿಕಟ್ಟೆ ಶ್ರೀ ಗಣಪತಿ ಮತ್ತು ಶ್ರೀ ಆಂಜನೇಯ ದೇವಸ್ಥಾನದ ಪುನರ್ ನಿರ್ಮಾಣ ಕಾಮಗಾರಿ, ೩ ಕೋಟಿಯಲ್ಲಿ ಶ್ರೀದೇವಳದ ಶೃಂಗೇರಿ ಮಠ ಪುನರ್ ನಿರ್ಮಾಣ ಕಾಮಗಾರಿ, ೧ ಕೋಟಿಯಲ್ಲಿ ಉತ್ತರಾಧಿಮಠದ ಬೀದಿ ಆಂಜನೇಯ ಗುಡಿ ನವೀಕರಣ, ೨೦ ಕೋಟಿಯಲ್ಲಿ ಇಂಜಾಡಿಯಲ್ಲಿ ಸಿಬ್ಬಂದಿ ವಾಸ್ತವ್ಯಕ್ಕಾಗಿ ೧೦೦ ಕೊಠಡಿಗಳ ವಸತಿಗೃಹ ನಿರ್ಮಾಣ, ೫ ಕೋಟಿಯಲ್ಲಿ ೫೦ ಕೊಠಡಿಗಳ ಡಾರ್ಮೆಟರಿ ಕಟ್ಟಡ ನಿರ್ಮಾಣ, ೦.೫೦ ಕೋಟಿಯಲ್ಲಿ ಶ್ರೀದೇವಳದಲ್ಲಿ ಪ್ರತ್ಯೇಕ ಸರ್ಪಸಂಸ್ಕಾರ ಬಯಸುವ ಭಕ್ತಾದಿಗಳಿಗೆ ಯಾಗಶಾಲೆ ನಿರ್ಮಾಣ, ೯.೫೦ ಕೋಟಿಯಲ್ಲಿ ರಥಬೀದಿಯ ಬಲಭಾಗದಲ್ಲಿ ಸೂಕ್ತ ಮೂಲಭೂತ ವ್ಯವಸ್ಥೆಯೊಂದಿಗೆ ಪ್ರಸಾದ ಭೋಜನಕ್ಕೆ ಸರದಿ ಸಾಲು ಹಾಗೂ ದೇವರ ದರ್ಶನಕ್ಕೆ ಸಾಲು ವ್ಯವಸ್ಥೆಗಳ ಕಾಮಗಾರಿ, ೧೦ ಕೋಟಿಯಲ್ಲಿ ಪವರ್‌ಹೌಸ್ ನಿರ್ಮಾಣ, ೫ ಕೋಟಿಯಲ್ಲಿ ಭಕ್ತಾದಿಗಳು ಪೂರ್ವಧ್ವಾರದಲ್ಲಿ ಪ್ರವೇಶಿಸಿ ದರ್ಶನ ಪಡೆದು ಪಶ್ಚಿಮ ಧ್ವಾರದಲ್ಲಿ ತೆರಳಲು ಅನುಕೂಲವಾಗುವಂತೆ ಒತ್ತಡ ನಿಯಂತ್ರಿಸಲು ದರ್ಪಣತೀರ್ಥ ನದಿಗೆ ಸೇತುವೆ ಹಾಗೂ ರಸ್ತೆ ನಿರ್ಮಾಣ, ೩೫ ಕೋಟಿಯಲ್ಲಿ ಶಿಥಿಲಾವಸ್ಥೆಯಲ್ಲಿರುವ ಕಾರ್ತಿಕೇಯ ವಸತಿಗೃಹಗಳನ್ನು ತೆರವುಗೊಳಿಸಿ ಅಲ್ಲಿ ನೂತನವಾಗಿ ೧೦೦ ಕೊಠಡಿಗಳ ವಸತಿಗೃಹ ನಿರ್ಮಾಣ ಮಾಡುವುದು ಸೇರಿದಂತೆ ಒಟ್ಟು ೧೫೯.೫೦ ಕೋಟಿ ವೆಚ್ಚದ ಕಾಮಗಾರಿ ನಡೆಸಲು ನಿರ್ಧರಿಸಲಾಗಿದೆ.