ಪಾಲಿಕೆ ತೋಟಗಾರಿಕೆ ವಿಭಾಗ ನಿಷ್ಕ್ರಿಯ ಆರೋಪ

- -ಮೈಸೂರು ಗ್ರಾಹಕ ಪರಿಷತ್ ಸೇರಿದತೆ ವಿವಿಧ ಸಂಘ ಸಂಸ್ಥೆಗಳಿಂದ ಪ್ರತಿಭಟನೆ----

ನಗರ ಪಾಲಿಕೆ ತೋಟಗಾರಿಕೆ ವಿಭಾಗ ನಿಷ್ಕ್ರಿಯವಾಗಿದ್ದು, ಭ್ರಷ್ಟಾಚಾರ ನಡೆಯುತ್ತಿದೆ ಎಂದು ಆರೋಪಿಸಿ ಮೈಸೂರು ಗ್ರಾಹಕ ಪರಿಷತ್, ಪರಿಸರ ಬಳಗ, ಕ್ಲೀನ್ ಮೈಸೂರು ಫೌಂಡೇಷನ್ ಸದಸ್ಯರು ಪಾಲಿಕೆ ಮುಂಭಾಗದಲ್ಲಿ ಶನಿವಾರ ಪ್ರತಿಭಟಿಸಿದರು.

ನಿಯಮಾನುಸಾರ ತೋಟಗಾರಿಕೆ ಬಗ್ಗೆ ಅನುಭವವಿರುವಂತಹವರನ್ನು ನೇಮಿಸಬೇಕು. ಇವರ ಕೈಕೆಳಗೆ ಪಾಲಿಕೆಯ 9 ವಲಯ ಕಚೇರಿಗಳ ಉದ್ಯಾನವನಗಳು ಬರುತ್ತವೆ. ವಲಯ ಕಚೇರಿಗೆ ಒಬ್ಬ ತೋಟಗಾರಿಕೆ ಇನ್ಸ್ ಪೆಕ್ಟರ್ ಇರಬೇಕು. ಆದರೆ, ಕೇವಲ ಇಬ್ಬರು ಇನ್ಸ್ ಪೆಕ್ಟರ್ ಇದ್ದಾರೆ. 90 ಕೆಲಸಗಾರರ ಬದಲಿಗೆ 27 ಜನರಿದ್ದಾರೆ. ಇದರಲ್ಲೂ ಸಾಕಷ್ಟು ಜನ ನಿವೃತ್ತಿಯಾಗಿದ್ದಾರೆ. ತೋಟಗಾರಿಕೆ ವಿಭಾಗದ ಕೆಲಸವನ್ನು ಸಂಪೂರ್ಣವಾಗಿ ನಿಯಮಬಾಹಿರವಾಗಿ ವಲಯ ಕಚೇರಿಗೆ ವರ್ಗಾಯಿಸಲಾಗಿದೆ. ಇದಕ್ಕೆ ಕಾರಣ ಭ್ರಷ್ಟಾಚಾರ ಎಂದು ಅವರು ಆರೋಪಿಸಿದರು.

ತೋಟಗಾರಿಕೆ ವಿಭಾಗ ಹಾಗೂ ಅರಣ್ಯ ಇಲಾಖೆ ಜಂಟಿಯಾಗಿ ಕಾರ್ಯ ನಿರ್ವಹಿಸಬೇಕು. ಅರಣ್ಯ ಇಲಾಖೆ ಗಿಡಗಳನ್ನು ನೆಡುವ ಕೆಲಸ ಮಾಡಬೇಕು. ಅರಣ್ಯ ಇಲಾಖೆಯಲ್ಲಿ ಗಿಡಗಳ ನರ್ಸರಿ ವ್ಯವಸ್ಥೆ ಇದ್ದು, ನಿರ್ವಹಣೆಯನ್ನು ಪಾಲಿಕೆ ತೋಟಗಾರಿಕೆ ವಿಭಾಗ, ನುರಿತ ಸಿಬ್ಬಂದಿ ನೋಡಿಕೊಳ್ಳಬೇಕು. ಇದರಲ್ಲಿ ಜನಪ್ರತಿನಿಧಿಗಳ ಹಸ್ತಕ್ಷೇಪ ಇರಬಾರದು ಎಂದು ಅವರು ಒತ್ತಾಯಿಸಿದರು.