ಶ್ರದ್ಧೆಯ ಕಾರ್ಯದಿಂದ ಪ್ರತಿಫಲ

ಮುಂಡರಗಿ: ಮಹಿಳೆಯರು ತಮ್ಮ ಆತ್ಮ ನಿರ್ಧಾರದ ಮೇಲೆ ಕಾರ್ಯ ನಿರ್ವಹಿಸಲು ಶಿಕ್ಷಣ ಅತ್ಯಂತ ಅವಶ್ಯವಾಗಿದೆ. ಶಿಕ್ಷಣ ಪಡೆಯುವುದರಿಂದ ಆತ್ಮಧೈರ್ಯ ಬೆಳೆಸಿಕೊಳ್ಳಲು ಸಾಧ್ಯ. ಶ್ರಮ ವಹಿಸಿ ಕಾರ್ಯ ನಿರ್ವಹಿಸುವವರಿಗೆ ಪ್ರತಿಫಲ ಕಟ್ಟಿಟ್ಟ ಬುತ್ತಿ ಎಂದು ಜ.ನಾಡೋಜ ಡಾ.ಅನ್ನದಾನೀಶ್ವರ ಮಹಾಸ್ವಾಮೀಜಿ ಹೇಳಿದರು.

ಇಂದು ಮಹಿಳೆಯರು ಎಲ್ಲ ರಂಗಗಳಲ್ಲಿಯೂ ಮುಂಚೂಣಿಯಲ್ಲಿದ್ದು ಕಾರ್ಯ ನಿರ್ವಹಿಸುತ್ತಿದ್ದಾರೆ. ನಮ್ಮ ಅನ್ನದಾನೀಶ್ವರ ಶಾಲಾ-ಕಾಲೇಜುಗಳಲ್ಲಿ ಕಲಿತ ಅನೇಕ ವಿದ್ಯಾರ್ಥಿಗಳು ಇಂದು ಉನ್ನತ ಹುದ್ದೆಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಅವರು ಎಷ್ಟೇ ದೊಡ್ಡ ಹುದ್ದೆಯಲ್ಲಿದ್ದರೂ ಕಲಿತ ಶಾಲೆಗೆ, ಶಿಕ್ಷಣ ಸಂಸ್ಥೆಗೆ ತನು,ಮನ, ಧನದಿಂದ ಸಹಾಯ ಸಹಕಾರ ನೀಡುತ್ತಾ ಬಂದಿದ್ದಾರೆ. ಇದೀಗ ವಿದ್ಯಾ ಸಮಿತಿ ಶತಮಾನೋತ್ಸವ ಆಚರಿಸಿಕೊಳ್ಳುತ್ತಿದ್ದು ಅದಕ್ಕೆ ಹಾಗೂ ಪಿಯು ಕಾಲೇಜಿನ ಕಟ್ಟಡ ನಿರ್ಮಾಣಕ್ಕಾಗಿಯೂ ಸಹ ಧನ ಸಹಾಯ ನೀಡಲು ಮುಂದಾಗಿರುವುದು ಸಂತಸ ತಂದಿದೆ ಎಂದರು.

ಐ.ಎಸ್. ಹಿರೇಮಠ ಮಾತನಾಡಿ, ನಾನು ಸರ್ಕಾರಿ ಶಾಲೆಗೆ ಸೇರುವ ಮೊದಲು ಇಲ್ಲಿ ಕೆಜಿಯಿಂದ ಪಿಜಿವರೆಗೆ ಪಾಠ ಮಾಡಲು ಅವಕಾಶ ನೀಡಿದ್ದು ಅನ್ನದಾನೀಶ್ವರ ಸಂಸ್ಥೆ. ಅದು ನನ್ನ ಮೊದಲ ಅನುಭವವಾಗಿದೆ.ನಮ್ಮ ಪ್ರತಿಸ್ಪರ್ಧಿ ಎದುರಿಸುವ ಶಕ್ತಿ ನೀಡಿದ್ದು ಸಹ ಈ ಅನ್ನದಾನೀಶ್ವರ ಸಂಸ್ಥೆ ಎನ್ನಲು ಹೆಮ್ಮೆಯಾಗುತ್ತದೆ. ನಾನೀಗ ರಾಜ್ಯ ಹಾಗೂ ರಾಷ್ಟ್ರ ಮಟ್ಟದ ತರಬೇತಿದಾರಳಾಗಿಯೂ ಕಾರ್ಯ ನಿರ್ವಹಿಸುತ್ತಿರುವೆ ಎಂದರು.

ಕಾರ್ಯಕ್ರಮದಲ್ಲಿ ಗಿರಿಜಾ ಜಕ್ಕಲಿ, ಪ್ರೇಮಾ ಶೇಡದ, ಪ್ರಿಯದರ್ಶಿನಿ ಮೇಟಿ, ಪ್ರತಿಭಾ ಹೊಸಮನಿ, ಶಂಕ್ರಮ್ಮ ಡಂಬಳ, ರಾಜೇಶ್ವರಿ ಸಾಲಿಮಠ, ಡಾ.ಮಂಗಳಾ ಇಟಗಿ, ದೀಪಾ ಹೂಗಾರ, ನೇತ್ರಾ ಅಳವಂಡಿ, ಗಾಯತ್ರಿ ಹಿರೇಮಠ, ಗೀತಾ ರಿತ್ತಿ, ಐ.ಎಸ್. ಹಿರೇಮಠ, ಸುಧಾರಾಣಿ ಬ್ಯಾಳಿಗೆ ಗೌರವ ಸನ್ಮಾನ ಜರುಗಿತು.

ವೀರಣ್ಣ ಮೇಟಿ ಸ್ವಾಗತಿಸಿದರು. ಡಾ.ಬಿ.ಜಿ.ಜವಳಿ ಪ್ರಾ ಸ್ತಾವಿಕವಾಗಿ ಮಾತನಾಡಿದರು. ಮಂಜುನಾಥ ಹರ್ತಿ ನಿರೂಪಿಸಿ, ವಂದಿಸಿದರು.