ವಿದ್ಯಾರ್ಥಿಗಳ ಕಲಿಕೆ ಸುಧಾರಣೆಗೆ ದಸರಾ ರಜೆ ಬಳಕೆ

-ಶಿಕ್ಷಕರ ಕಾಳಜಿಗೆ ಪೋಷಕರಿಂದ ಭಾರೀ ಮೆಚ್ಚುಗೆ

ಸ್ಥಳೀಯ ರಾಷ್ಟ್ರೀಯ ಮಾಧ್ಯಮಿಕ (ಆರ್.ಎಂ.ಎಸ್.ಎ.) ಪ್ರೌಢಶಾಲೆಯ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳ ಕಲಿಕೆ ಮಟ್ಟ ಸುಧಾರಿಸುವ ಹಾಗೂ ಶೇ. ನೂರು ಫಲಿತಾಂಶ ಸಾಧಿಸುವ ಗುರಿ ಹೊಂದಿರುವ ಶಿಕ್ಷಕರು ದಸರಾ ರಜಾ ದಿನಗಳನ್ನು ಬಳಸಿಕೊಂಡು ವಿಶೇಷ ತರಗತಿಗಳ ನಡೆಸುವ ಮೂಲಕ ಪೋಷಕರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.

ಶಿಕ್ಷಣ ಪ್ರೇಮಿಗಳ ಸಹಕಾರ:

ಬೇಸಿಗೆ ಹಾಗೂ ದಸರಾ ರಜೆಯನ್ನು ನಮ್ಮ ಶಾಲೆಯ ಶಿಕ್ಷಕರು ಪಡೆದುಕೊಳ್ಳದೆ ವಿದ್ಯಾರ್ಥಿಗಳ ಭವಿಷ್ಯಕ್ಕೆ ತನು, ಮನ, ಧನ ಸಹಾಯದ ಜೊತೆಯಲ್ಲಿ ನಿತ್ಯ ತರಗತಿಯಂತೆ ಪಾಠ ಭೋಧನೆ ಜರಗುತ್ತಿರುವುದರಿಂದ ಶಾಲೆಯ ಕೀರ್ತಿ ಹಾಗೂ ಮಕ್ಕಳಲ್ಲಿ ಪ್ರಗತಿ ಕಂಡಿರುವುದರಿಂದ ಪಾಲಕರಲ್ಲಿ, ಮಕ್ಕಳಲ್ಲಿ ಆತ್ಮವಿಶ್ವಾಸ ಹೆಚ್ಚಾಗಿದೆ ಎಂದು ಎಸ್‍ಡಿಎಂಸಿ ಅಧ್ಯಕ್ಷ ಮಹಾದೇವಪ್ಪ ಮಾನೇಗಾರ ಹೇಳಿದರು.ವಿದ್ಯಾರ್ಥಿಗಳಿಗೆ 10ನೇ ತರಗತಿ ಅತ್ಯಂತ ಮಹತ್ವದ ಘಟ್ಟವಾಗಿದ್ದು, ಭವಿಷ್ಯ ನಿರ್ಮಾಣಕ್ಕೆ ಅಡಿಪಾಯ ಹಾಕುವುದು ನಮ್ಮ ಕರ್ತವ್ಯವಾಗಿದೆ. ಇದಕ್ಕೆ ಶಾಲಾ ಶಿಕ್ಷಣ ಇಲಾಖೆ ಡಿಡಿಪಿಐ ಹಾಗೂ ಬಿಇಒ, ಎಸ್‍ಡಿಎಂಸಿ, ಶಿಕ್ಷಣ ಪ್ರೇಮಿಗಳು, ಶಿಕ್ಷಕರ ಸಹಕಾರದಿಂದ ಪ್ರತಿ ವರ್ಷ ವಿಶೇಷ ತರಗತಿಗಳು ನಡೆದು ಯಶಸ್ವಿಯಾಗುತ್ತಿದೆ ಎಂದು ಸರ್ಕಾರಿ ಪ್ರೌಢಶಾಲೆಯ ಮುಖ್ಯ ಶಿಕ್ಷಕ ಶರಣು ಪೂಜಾರ ತಿಳಿಸಿದ್ದಾರೆ.ಜಿಲ್ಲಾದ್ಯಂತ 324 ಪ್ರೌಢಶಾಲೆಯಲ್ಲಿ ವಿಶೇಷ ಎಸ್ಸೆಸ್ಸೆಲ್ಸಿ ತರಗತಿ ನೆಡೆದಿದ್ದು, ಪ್ರಮುಖವಾಗಿ ಮುಳಗುಂದ ಸರ್ಕಾರಿ ಶಾಲೆಯಲ್ಲಿ ಉಪಾಹಾರ, ಊಟ ವಸತಿ ಸಹಿತ ತರಗತಿಗಳು ಜರಗುತ್ತಿರುವುದರಿಂದ ವಿದ್ಯಾರ್ಥಿಗಳ ಕಲಿಕೆ ಮತ್ತು ಫಲಿತಾಂಶವನ್ನು ಉತ್ತಮ ಪಡಿಸುವ ನಿಟ್ಟಿನಲ್ಲಿ ವಿಶೇಷ ತರಗತಿಗಳನ್ನು ಆಯೋಜಿಸಿದ ಶಾಲಾ ಶಿಕ್ಷಕರಿಗೆ, ಎಸ್‍ಡಿಎಂಸಿ ಹಾಗೂ ಶಿಕ್ಷಣ ಪ್ರೇಮಿಗಳಿಗೆ ಧನ್ಯವಾದಗಳು ಎನ್ನುತ್ತಾರೆ ಗದಗದ ಡಿಡಿಪಿಐ ಆರ್.ಎಸ್. ಬುರಡಿ.