ಮಂಗಗಳ ಹಾವಳಿಗೆ ಬೇಸತ್ತ ಕೃಷಿಕರು
ಸಾರಾಂಶ
ಅಡಕೆ ತೋಟಗಳಿಗೆ ನುಗ್ಗುವ ಮಂಗಗಳು ಅಡಕೆ ಗೊನೆಗಳನ್ನು ಹಾಳು ಮಾಡುವುದರ ಜತೆಗೆ, ಎಳೆ ತೆಂಗಿನಕಾಯಿಗಳನ್ನು ಕಿತ್ತು ಅವುಗಳಲ್ಲಿರುವ ಎಳೆನೀರನ್ನು ಕುಡಿದು, ಉಳಿದ ಕಾಯಿಗಳನ್ನು ಕೆಳಗೆ ಎಸೆಯುತ್ತಿವೆ.
ಪ್ರಸಾದ್ ನಗರೆ
ಈಗಾಗಲೇ ಕೃಷಿ ವೆಚ್ಚ, ಕಾರ್ಮಿಕರ ಕೊರತೆ, ಬೆಳೆಗಳ ನಿರ್ವಹಣೆ ಸೇರಿದಂತೆ ಹಲವು ಸಮಸ್ಯೆಗಳನ್ನು ಎದುರಿಸುತ್ತಿರುವ ರೈತರಿಗೆ ಮಂಗಗಳ ಹಾವಳಿ ಮತ್ತೊಂದು ತಲೆನೋವಾಗಿ ಪರಿಣಮಿಸಿದೆ. ಹಗಲು ಹೊತ್ತಿನಲ್ಲಿಯೇ ತೋಟಗಳಿಗೆ ಲಗ್ಗೆ ಇಡುವ ಮಂಗಗಳ ಗುಂಪನ್ನು ಓಡಿಸಲು ರೈತರು ಹರಸಾಹಸ ಪಡುತ್ತಿದ್ದಾರೆ. ಆದರೂ ಮಂಗಗಳ ಹಾವಳಿಗೆ ಕಡಿವಾಣ ಹಾಕಲು ಸಾಧ್ಯವಾಗುತ್ತಿಲ್ಲ ಎಂಬುದು ಕೃಷಿಕರ ಅಳಲಾಗಿದೆ.
ಪ್ರಾಣಿಗಳ ವಧೆಗೆ ನಿಷೇಧ: ಇನ್ನು ಕೃಷಿಗೆ ತೊಂದರೆಯನ್ನು ಉಂಟುಮಾಡುವ ಕಾಡುಪ್ರಾಣಿಗಳನ್ನು ಕೊಲ್ಲಲು ಕಾನೂನಿನ ತೊಡಕು ಇದೆ. ಹೀಗಾಗಿ ಗ್ರಾಮೀಣ ಭಾಗದ ಜನರು ಕಾಡುಪ್ರಾಣಿಗಳನ್ನು ಹಿಡಿಯಲು ಅಥವಾ ಕೊಲ್ಲಲು ಭಯವನ್ನು ಪಡುತ್ತಾರೆ. ಮಂಗ, ಹಂದಿ, ಮುಳ್ಳುಹಕ್ಕಿ ಮೊದಲಾದ ಕಾಡುಪ್ರಾಣಿಗಳನ್ನು ಹೊಡೆಯಲು ಸಾಧ್ಯವಾಗುತ್ತಿಲ್ಲ.ಇತ್ತ ಗ್ರಾಮೀಣ ಭಾಗದಲ್ಲಿ ರೈತರಿಗೆ ಕಾಡು ಪ್ರಾಣಿಗಳ ತೊಂದರೆ ಆಗುತ್ತದೆ ಎಂಬ ಅರಿವು ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ತಿಳಿದಿದ್ದರೂ ಅದನ್ನು ನಿಯಂತ್ರಿಸಿ ರೈತರಿಗೆ ಸಹಾಯ ಮಾಡುವುದಿಲ್ಲ ಎಂಬ ಮಾತನ್ನು ರೈತರು ಆಡಿಕೊಳ್ಳುತ್ತಾರೆ.ಸಂಬಂಧಪಟ್ಟ ಅರಣ್ಯ ಇಲಾಖೆ ಹಾಗೂ ಕೃಷಿ ಇಲಾಖೆ ಅಧಿಕಾರಿಗಳು ಗ್ರಾಮಕ್ಕೆ ಭೇಟಿ ನೀಡಿ ಬೆಳೆ ಹಾನಿಯ ವಾಸ್ತವ ಸ್ಥಿತಿಯನ್ನು ಪರಿಶೀಲಿಸಬೇಕು. ಮಂಗಗಳ ಹಾವಳಿ ನಿಯಂತ್ರಣಕ್ಕೆ ಸೂಕ್ತ ಕ್ರಮ ಕೈಗೊಳ್ಳುವುದರ ಜತೆಗೆ, ನಷ್ಟ ಅನುಭವಿಸುತ್ತಿರುವ ರೈತರಿಗೆ ಸರ್ಕಾರದ ನಿಯಮಾನುಸಾರ ಪರಿಹಾರ ಒದಗಿಸಬೇಕು ಎಂದು ಸ್ಥಳೀಯ ಕೃಷಿಕರು ಒತ್ತಾಯಿಸಿದ್ದಾರೆ.