ಕತಗಾಲ ಯಕ್ಷೋತ್ಸವದಲ್ಲಿ ಯಕ್ಷಗಾನ ಕಲಾವೈಭವ ಅನಾವರಣ

ಕುಮಟಾ: ತೆಂಕು ಮತ್ತು ಬಡಗು ತಿಟ್ಟುಗಳ ಪ್ರಸಿದ್ಧ ಯಕ್ಷಗಾನ ಕಲಾವಿದರ ಅದ್ಭುತ ಕಲಾಪ್ರದರ್ಶನ, ಮೂರು ವೈವಿಧ್ಯಮಯ ಯಕ್ಷಗಾನ ಪ್ರಸಂಗಗಳ ಮನಮೋಹಕ ಪ್ರದರ್ಶನ ಹಾಗೂ ಯಕ್ಷಗಾನ ಕ್ಷೇತ್ರಕ್ಕೆ ಅಪಾರ ಕೊಡುಗೆ ನೀಡಿದ ಪ್ರಸಿದ್ಧ ಭಾಗವತ ಸತೀಶ ಶೆಟ್ಟಿ ಪಟ್ಲ ಅವರಿಗೆ ಯಕ್ಷೋತ್ಸವ ಪ್ರಶಸ್ತಿ ಪ್ರದಾನ. ಇವೆಲ್ಲದಕ್ಕೂ ಸಾಕ್ಷಿಯಾದ ಕತಗಾಲ ಯಕ್ಷೋತ್ಸವ, ಯಕ್ಷಪ್ರೇಮಿಗಳ ಮನಸೂರೆಗೊಂಡಿತು. ತೆಂಕು ಮತ್ತು ಬಡಗು ತಿಟ್ಟುಗಳ 56 ಹೆಸರಾಂತ ಕಲಾವಿದರು ಭಾನುವಾರ ಒಂದೇ ವೇದಿಕೆಯಲ್ಲಿ ಸಮಾಗಮಗೊಂಡು ತಮ್ಮ ಕಲಾಪ್ರತಿಭೆಯನ್ನು ಅನಾವರಣಗೊಳಿಸಿದ್ದು ಕಾರ್ಯಕ್ರಮದ ವಿಶೇಷವಾಗಿತ್ತು. ಎರಡೂ ತಿಟ್ಟುಗಳ ವೈಶಿಷ್ಟ್ಯಪೂರ್ಣ ನೃತ್ಯ, ವೇಷಭೂಷಣ, ಮಾತುಗಾರಿಕೆ, ಹಿಮ್ಮೇಳ ಹಾಗೂ ಅಭಿನಯದ ಸೊಬಗು ಪ್ರೇಕ್ಷಕರನ್ನು ಯಕ್ಷಲೋಕದಲ್ಲಿ ತೇಲಾಡಿಸಿತು. ಮಧುರಾ ಮಹೀಂದ್ರ, ಮಹಿಷಾಸುರ ಮರ್ಧಿನಿ ಹಾಗೂ ಕದಂಬ ಕೌಶಿಕೆ ಈ ಮೂರೂ ಯಕ್ಷಗಾನ ಪ್ರಸಂಗಗಳು ಕಲಾಭಿಮಾನಿಗಳ ಮೆಚ್ಚುಗೆಗೆ ಪಾತ್ರವಾದವು.

ಪಟ್ಲ ಸತೀಶ ಶೆಟ್ಟಿ, ರಾಘವೇಂದ್ರ ಆಚಾರ್ಯ ಜನ್ಸಾಲೆ, ರಾಮಕೃಷ್ಣ ಹೆಗಡೆ ಹಿಲ್ಲೂರ, ಸರ್ವೇಶ್ವರ ಹೆಗಡೆ ಕೋಣಾರೆ, ವಿದ್ಯಾಧರ ರಾವ್ ಜಲವಳ್ಳಿ, ಶಂಕರ ಹೆಗಡೆ ನೀಲ್ಕೋಡ, ಸುಧೀರ ಉಪ್ಪೂರ, ಕಾರ್ತೀಕ ಚಿಟ್ಟಾಣಿ, ವಿನಯ ಬೇರೊಳ್ಳಿ, ಶಶಿಕಾಂತ ಶೆಟ್ಟಿ, ದಿನೇಶ ಶೆಟ್ಟಿ ಮತ್ತಿತರ ಕಲಾವಿದರು ಅಮೋಘ ಪ್ರದರ್ಶನ ನೀಡಿದರು.

ಯಕ್ಷಗಾನ ಕ್ಷೇತ್ರದಲ್ಲಿ ತಮ್ಮ ವಿಶಿಷ್ಟ ಭಾಗವತಿಕೆ, ಕಲಾ ಸೇವೆ ಹಾಗೂ ಕಲಾವಿದರ ಕ್ಷೇಮಾಭ್ಯುದಯಕ್ಕಾಗಿ ದುಡಿಯುತ್ತಿರುವ ಪ್ರಸಿದ್ಧ ಭಾಗವತ ಸತೀಶ ಶೆಟ್ಟಿ ಪಟ್ಲ ಅವರೆ ಯಕ್ಷೋತ್ಸವ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.

ಸಂಘಟಕರಾದ ಭಂಡಿವಾಳದ ವಿನಾಯಕ ಭಟ್ ಹಾಗೂ ಮಂಜುನಾಥ ಭಟ್ ಸಹೋದರರು, ರಾಜೇಂದ್ರ ಭಟ್, ಅಶೋಕ ಭಟ್, ಗಜಾನನ ಪೈ, ದೇವು ಗೌಡ ಮತ್ತಿತರ ಗಣ್ಯರು ಸತೀಶ ಶೆಟ್ಟಿ ಪಟ್ಲ ಅವರಿಗೆ ಪ್ರಶಸ್ತಿ ಪ್ರದಾನ ಮಾಡಿ ಸತ್ಕರಿಸಿದರು.

ಪ್ರಶಸ್ತಿ ಸ್ವೀಕರಿಸಿದ ಸತೀಶ ಶೆಟ್ಟಿ, ಕಲಾವಿದರಿಗೆ ಆಸರೆಯಾಗಿ ನಾನು ನಿಲ್ಲಲು ಕಲಾಪ್ರೇಮಿಗಳ ಕೊಡುಗೆ ದೊಡ್ಡದು. ನನ್ನ ಮೂಲಕ ನೀವು ನೆರವಾಗಿದ್ದೀರಿ. ಯಕ್ಷಗಾನ, ನಾಟಕ ಕಲಾವಿದರು, ದೈವಾರಾಧನೆಯಲ್ಲಿ ತೊಡಗಿಕೊಂಡವರಿಗೂ ನಾವು ಸಹಾಯಹಸ್ತ ಚಾಚಿದ್ದೇವೆ. ಕತಗಾಲ ಯಕ್ಷೋತ್ಸವ ಯಶಸ್ವಿಯಾಗಿದೆ ಎಂದು ತಿಳಿಸಿದರು. 2 ಸಾವಿರ ಪ್ರೇಕ್ಷಕರು

ಭಂಡಿವಾಳದ ವಿನಾಯಕ ಭಟ್ ಹಾಗೂ ಮಂಜುನಾಥ ಭಟ್ ಅವರ ಅಚ್ಚುಕಟ್ಟಾದ ಸಂಘಟನೆಯನ್ನು ಸಾರ್ವಜನಿಕರು ಪ್ರಶಂಸಿಸಿದರು. ಉಚಿತವಾಗಿ ಯಕ್ಷಗಾನ ಏರ್ಪಡಿಸಿದ್ದು ವಿಶೇಷವಾಗಿತ್ತು. ಸುಮಾರು ಎರಡು ಸಾವಿರಕ್ಕೂ ಹೆಚ್ಚು ಪ್ರೇಕ್ಷಕರು ಯಕ್ಷಗಾನ ವೀಕ್ಷಿಸಿ ಸಂತಸಪಟ್ಟರು.