ವಿಧಾನ ಪರಿಷತ್‌ ಚುನಾವಣೆ: ಬಾರ್, ಡಾಬಾ, ನಾನ್ ವೆಜ್ ಹೋಟೆಲ್ ಗಳು ಫುಲ್ ರಶ್!

ಚಿಕ್ಕಪ್ಪನಹಳ್ಳಿ ಷಣ್ಮುಖ

ಚಿತ್ರದುರ್ಗ ಜಿಲ್ಲೆಯ ಯಾವುದೇ ಬಾರುಗಳು,ರೆಸ್ಟೋರೆಂಟ್ ಗಳು, ತೋಟದ ಮನೆಗಳು, ಹೊರ ವಲಯದ ಒಂಟಿ ಮನೆಗಳು ಸೂರ್ಯ ಮುಳುಗುತ್ತಿದ್ದಂತೆ ರಶ್ ಆಗುತ್ತಿವೆ. ವಿಧಾನ ಪರಿಷತ್ತಿಗೆ ಆಗ್ನೇಯ ಶಿಕ್ಷಕರ ಕ್ಷೇತ್ರದಿಂದ ನಡೆಯುತ್ತಿರುವ ಚುನಾವಣೆ ಇಂತಹದ್ದೊಂದು ವಾತಾವರಣ ಸೃಷ್ಟಿಸುತ್ತಿದೆ. ತಾಲೂಕು ಕೇಂದ್ರದ ಯಾವುದೇ ಬಾರುಗಳಿಗೆ ಹೋದರೂ ಪಾರ್ಟಿಗಳು ನಡೆಯುತ್ತಿರುವ ದೃಶ್ಯ ಕಾಣುತ್ತವೆ. ಇದಕ್ಕಾಗಿ ಹತ್ತಾರು ಟೇಬಲ್ ಗಳ ನೀಟಾಗಿ ಜೋಡಿಸಿ ಪ್ರತ್ಯೇಕ ವ್ಯವಸ್ಥೆ ಕಲ್ಪಿಸಲಾಗುತ್ತಿದೆ. ಮತಗಳ ಹೇಗೆ ಗುಡ್ಡೆ ಹಾಕಬೇಕೆಂಬ ಬಗ್ಗೆಯೇ ಚರ್ಚೆಗಳು ಅಲ್ಲಿ ನಡೆಯುತ್ತವೆ. ಸಂಜೆ ಏಳರಿಂದ ಆರಂಭವಾದ ಪಾರ್ಟಿ ರಾತ್ರಿ ಹನ್ನೊಂದಾದರೂ ನಡೆಯುತ್ತಿರುತ್ತವೆ. ಈ ಟೇಬಲ್ ಗಳಲ್ಲಿ ವಿರಾಜಮಾನರಾಗಿ ಕುಳಿತವರು ಪರಿಷತ್ ಚುನಾವಣೆಯಲ್ಲಿ ಮತಚಲಾಯಿಸಲು ಅವಕಾಶ ಪಡೆದ ಮತದಾರರು ಎಂಬುದ ಗ್ರಹಿಸಲು ಸಮಯವೇನೂ ಬೇಕಾಗದು. ಇದರಿಂದಾಗಿ ನಿತ್ಯದ ಕುಡುಕರಿಗೆ ಬಾರ್ ಗಳಲ್ಲಿ ಜಾಗವಿಲ್ಲದೆ ಎಂಎಸ್ಐಲ್ ಮಳಿಗೆಗಳಿಗೆ ಹೋಗಿ ಮನೆಗಳಿಗೆ ಪಾರ್ಸೆಲ್ ಒಯ್ಯುವ ಸ್ಥಿತಿ ನಿರ್ಮಾಣವಾಗಿದೆ.

ಪಾರ್ಟಿ ಮಾಡಬೇಡ ಅಂತ ಎಲ್ಲಿದೆ?ಶಿಕ್ಷಕರು ಪ್ರಚಾರದಲ್ಲಿ ತೊಡಗಬಾರದೆಂಬ ಬಿಗಿ ನಿರ್ದೇಶನವನ್ನು ಚುನಾವಣಾ ಆಯೋಗ ನೀಡಿದೆ. ಆದರೆ ಎಲ್ರೂ ಒಟ್ಟಿಗೆ ಕುಳಿತು ಪಾರ್ಟಿ ಮಾಡಬಾರದು ಎಂದು ಎಲ್ಲಿ ಹೇಳಿದೆ ಎಂದು ಪ್ರಶ್ನಿಸುತ್ತಿದ್ದಾರೆ ಗಣ್ಯ ಮತದಾರರು. ಪ್ರಾಥಮಿಕ ಶಾಲೆಗಳ ಶಿಕ್ಷಕರು ಮತದಾನದಿಂದ ಹೊರಗಿದ್ದಾರೆ. ಹೈಸ್ಕೂಲ್, ಜ್ಯೂನಿಯರ್ ಕಾಲೇಜು, ಪದವಿ ಕಾಲೇಜು, ಡಿಪ್ಲಮೋ, ಇಂಜಿನಿಯರಿಂಗ್, ಮೆಡಿಕಲ್ ಕಾಲೇಜಿನಲ್ಲಿರುವ ಚಿತ್ರದುರ್ಗ ಜಿಲ್ಲೆಯ 4615 ಶಿಕ್ಷಕರು ಮತದಾನದ ಹಕ್ಕು ಪಡೆದಿದ್ದಾರೆ. ಈ ನಾಲ್ಕುವರೆ ಸಾವಿರ ಮತದಾರರ ನಿತ್ಯದ ನಿರ್ವಹಣೆಗೆ ನೋಟುಗಳ ಕಂತೆ ಕರಗಿ ಹೋಗುತ್ತಿವೆ.ಈಗಾಗಲೇ ಕೋರಿಯರ್ ಸರ್ವಿಸ್‍ನವರಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದ್ದು, ಪಕ್ಷದವರು ಶಿಕ್ಷಕ ಮತದಾರರಿಗೆ ಉಚಿತ ಉಡುಗೊರೆಗಳನ್ನು ಕೋರಿಯರ್, ಪಾರ್ಸೆಲ್ ಕಳುಹಿಸುವುದು ಕಂಡುಬಂದರೆ ಸಂಬಂಧಪಟ್ಟವರ ವಿರುದ್ಧ ಪ್ರಕರಣ ದಾಖಲಿಸಲಾಗುವುದು. ಉಚಿತ ಉಡುಗೊರೆಗಳನ್ನು ಸ್ವೀಕರಿಸುವುದು ಸಹ ಮಾದರಿ ನೀತಿ ಸಂಹಿತೆ ಉಲ್ಲಂಘನೆ. ಜತೆಗೆ ಸಂಬಂಧಪಟ್ಟವರ ವಿರುದ್ಧ ಅಮಾನತಿಗೆ ಆದೇಶ ಮಾಡಲಾಗುವುದು ಎಂದು ಜಿಲ್ಲಾಧಿಕಾರಿ ಟಿ.ವೆಂಕಟೇಶ್ ಬಿಗಿ ನಿರ್ದೇಶ ನೀಡಿದ್ದಾರೆ. ಹೇಳಿದರು.

ಈ ಬಾರಿ ಉಡುಗೊರೆಗಳಿಲ್ಲ!

ಬಿಜೆಪಿಯಿಂದ ಈ ಹಿಂದೆ ಮೂರು ಬಾರಿ ಪರಿಷತ್ ಸದಸ್ಯರಾಗಿರುವ ವೈ.ಎ.ನಾರಾಯಣಸ್ವಾಮಿ ಕಣದಲ್ಲಿದ್ದರೆ ಕಾಂಗ್ರೆಸ್ ನಿಂದ ಡಿ.ಟಿ.ಶ್ರೀನಿವಾಸ್ ಸ್ಪರ್ಧಿಸಿದ್ದಾರೆ. ಡಿ.ಟಿ.ಶ್ರೀನಿವಾಸ್ ಪ್ರವೇಶದಿಂದಾಗಿ ಕಣ ರಂಗೇರಿದೆ. ಶಾಲೆಗಳಿಗೆ ರಜೆ ಇರುವುದರಿಂದ ಶಿಕ್ಷಕರೂ ಕೂಡಾ ರಂಗೇರುತ್ತಿದ್ದಾರೆ.