ಎಲ್ಲರಿಗೂ ಸಂಸ್ಕೃತಿ- ಪರಂಪರೆಯ ಪರಿಚಯವಿರಲಿ: ಹಾರಿಕಾ ಮಂಜುನಾಥ

ಕುಮಟಾ: ಸಾವಿರಾರು ವರ್ಷಗಳ ಕಾಲ ಪರಕೀಯರ ದಾಳಿ ನಡೆದರೂ ಭಾರತ ಇಂದಿಗೂ ಭಾರತವಾಗಿಯೇ ಉಳಿದಿದೆ. ನಮ್ಮ ರಕ್ತದಲ್ಲಿ ಹರಿಯುತ್ತಿರುವ ಸಂಸ್ಕೃತಿ- ಪರಂಪರೆಯ ಸಾಮರ್ಥ್ಯದ ಪರಿಚಯವನ್ನು ಪ್ರತಿಯೊಬ್ಬರೂ ತಿಳಿಯಬೇಕಿದೆ ಎಂದು ಪ್ರಸಿದ್ಧ ವಾಗ್ಮಿ ಹಾರಿಕಾ ಮಂಜುನಾಥ ಬೆಂಗಳೂರು ತಿಳಿಸಿದರು.

ಸಂಸ್ಕೃತಿಯ ಉಳಿವೇ ಸನಾತನ ಧರ್ಮದ ಗುರಿ. ವಿಶ್ವದಲ್ಲಿ ಎಷ್ಟೋ ಸಂಸ್ಕೃತಿಗಳು ನಾಮಾವಶೇಷವಾಗಿದೆ. ಆದರೆ ಸನಾತನ ಹಿಂದು ಸಂಸ್ಕೃತಿ ಮಾತ್ರ ಯಾವತ್ತೂ ಉಳಿದು ಬೆಳೆದಿದೆ. ೧೭ ಬಾರಿ ಧ್ವಂಸವಾದರೂ ೧೮ ಬಾರಿಗೆ ಮತ್ತೆ ತಲೆ ಎತ್ತಿನಿಂತ ಸೋಮನಾಥ ಮಂದಿರ, ೫೦೦ ವರ್ಷಗಳ ಹೋರಾಟದ ಬಳಿಕ ರಾಷ್ಟ್ರ ಮಂದಿರವಾಗಿ ತಲೆ ಎತ್ತಿದ ಅಯೋಧ್ಯಾ ಶ್ರೀರಾಮಮಂದಿರ ಮುಂತಾದವು ಜ್ವಲಂತ ಸಾಕ್ಷಿಯಾಗಿದೆ ಎಂದರು.ನಾವಿಂದು ಬದಲಾದ ಕಾಲಘಟ್ಟದಲ್ಲಿ ಸಂಸ್ಕೃತಿಯ ಜಾಗೃತಿಯೆಡೆಗೆ ಸಾಗುತ್ತಿದ್ದೇವೆ. ನಮ್ಮ ಹೊಸ ವರುಷ ಯುಗಾದಿಯೆಂಬ ಪ್ರಜ್ಞೆ ಬೆಳೆಯುತ್ತಿದೆ. ಕ್ಷಾತ್ರ ತೇಜಸ್ಸು ಮತ್ತೆ ಬೆಳಗುತ್ತಿದೆ. ಇದನ್ನು ಭಾರತೀಯತೆಯ ಪುನರುತ್ಥಾನದ ಕಾಲವಾಗಿ ಪರಿಗಣಿಸಬಹುದಾಗಿದೆ. ಪ್ರತಿಯೊಬ್ಬರೂ ಇತಿಹಾಸವನ್ನು ಅರಿಯುವ, ಪರಂಪರೆಯನ್ನು ತಿಳಿಯುವ ಮೂಲಕ ಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ದಾಟಿಸಬೇಕಿದೆ ಎಂದರು.

ಕು. ನಿಶಾ ಸಂದೀಪ ಗಣೇಶ ಸ್ತುತಿ ಪ್ರಸ್ತುತಪಡಿಸಿದಳು. ಖಜಾಂಚಿ ಜಿ.ಎಸ್. ಹೆಗಡೆ ವಂದಿಸಿದರು. ಎಂ.ಟಿ. ಗೌಡ, ಎಸ್.ಜಿ. ನಾಯ್ಕ, ಆನಂದು ವೈ. ನಾಯ್ಕ, ಎಸ್.ವಿ. ಹೆಗಡೆ ಭದ್ರನ್, ನವ್ಯ ಹೆಬ್ಬಾರ ಇತರರು ಇದ್ದರು.