ಬ್ರಾಹ್ಮಿ ಸ್ವರೂಪಿಣಿಯಾಗಿ ದರ್ಶನ ನೀಡಿದ ಶಾರದೆ

ಶೃಂಗೇರಿ ನವರಾತ್ರಿಯಲ್ಲಿ ಅಧಿದೇವತೆಗೆ ವಿಶೇಷ ಪೂಜೆ । ಜನಾಕರ್ಷಕ ಜಗದ್ಗುರುಗಳ ದಸರಾ ದರ್ಬಾರ್,

ದಕ್ಷಿಣಾಮ್ನಾಯ ಶ್ರೀ ಶಾರದಾ ಪೀಠದಲ್ಲಿ ಶರನ್ನರಾತ್ರಿ ಮಹೋತ್ಸವದಲ್ಲಿ ಎರಡನೇ ದಿನವಾದ ಮಂಗಳವಾರ ಅಧಿದೇವತೆ ಶ್ರೀ ಶಾರದಾಂಬೆಗೆ ಬ್ರಾಹ್ಮಿ ಅಲಂಕಾರ ಮಾಡಲಾಗಿತ್ತು.

ಜಗದ್ಗುರುಗಳಾದ ಶ್ರೀ ಭಾರತೀ ತೀರ್ಥ ಮಹಾಸ್ವಾಮಿ,ಶ್ರೀ ವಿಧುಶೇಖರ ಭಾರತೀ ತೀರ್ಥ ಸ್ವಾಮಿ ಶಾರದಾಂಬೆ ಸನ್ನಿದಿಯಲ್ಲಿ ನವರಾತ್ರಿಯ ವಿಶೇಷ ಪೂಜೆ , ಮಹಾಮಂಗಳಾರತಿ ನೆರವೇರಿಸಿದರು. ಶ್ರೀ ಶಂಕರ ಭಗವತ್ಪಾದಾಚಾರ್ಯ,ಶ್ರೀ ತೋರಣಗಣಪತಿ ಸಹಿತ ಶ್ರೀ ಮಠದ ಆವರಣದಲ್ಲಿರುವ ಎಲ್ಲಾ ದೇವಾಲಯಗಳಿಗೆ ತೆರಳಿ ನವರಾತ್ರಿ ಪೂಜೆ ಸಲ್ಲಿಸಿದರು. ಚಂದ್ರಮೌಳೀಶ್ವರ ಪೂಜೆ ಸಲ್ಲಿಸಿದರು.

ಶೃಂಗೇರಿ ದಸರಾ ದರ್ಬಾರ್ ಗೂ ಮೈಸೂರಿನ ದರ್ಬಾರ್ ಗೂ ಸಾಕಷ್ಟು ಸಾಮ್ಯತೆಯಿದೆ. ವಿಜಯನಗರ ಅರಸರ ಕಾಲದಲ್ಲಿ ನಡೆಯುತ್ತಿದ್ದ ಸಂಪ್ರದಾಯಗಳು ಶೃಂಗೇರಿಯಲ್ಲಿ ಇಂದಿಗೂ ಉಳಿದುಕೊಂಡು ಬಂದಿದೆ. ಈ ಪರಂಪರೆಯನ್ನೇ ಮೈಸೂರು ಅರಸರು ಅನುಸರಿಸಿಕೊಂಡು ಹೋಗುತ್ತಿದ್ದಾರೆ ಎನ್ನಲಾಗಿದೆ. ಶೃಂಗೇರಿ, ಮೈಸೂರಿನ ದಸರಾ ದರ್ಬಾರ್ ಉತ್ಸವಗಳು ಜನರನ್ನು ಇಂದಿಗೂ ಆಕರ್ಷಿಸುವುದು ಒಂದು ವಿಶೇಷ.

ರಾಜಬೀದಿ ಉತ್ಸವದಲ್ಲಿ ಮೆಣಸೆ ಗ್ರಾಪಂ ವ್ಯಾಪ್ತಿಯ ಭಕ್ತಾದಿಗಳೊಂದಿಗೆ ವಿವಿಧ ಸಂಘ ಸಂಸ್ಥೆಗಳು,ಭಜನಾ ತಂಡಗಳು ಪಾಲ್ಗೊಂಡಿದ್ದವು.ವಾದ್ಯ ಮೇಳ,ವಿವಿಧ ಸ್ತಬ್ದಚಿತ್ರಗಳು,ವಿಪ್ರೋತ್ತಮರ ವೇದಘೋಷಗಳು,ಭಜನೆಗಳು,ಭಕ್ತರ ಜೈಕಾರ ಘೋಷಗಳು ರಾಜಬೀದಿ ಉತ್ಸವಕ್ಕೆ ವಿಶೇಷ ಮೆರಗು ನೀಡಿತು.ಶ್ರೀ ಮಠದ ಆವರಣದ ಶ್ರೀ ಚಂದ್ರಶೇಖರ ಭಾರತೀ ಸಭಾಂಗಣದಲ್ಲಿ ಸಾಂಸ್ಕೃತಿಕ ಮಹೋತ್ಸವದಲ್ಲಿ ಚೈನ್ನೈನ ವಿದುಷಿ ಸವಿತಾ ಶ್ರೀರಾಮ್ ಮತ್ತು ತಂಡದವರಿಂದ ಹಾಡುಗಾರಿಕೆ ನಡೆಯಿತು. ಬುಧವಾರ ಶಾರದೆಗೆ ವೃಷಭ ವಾಹಿನಿಅಲಂಕಾರ ನಡೆಯಲಿದೆ.

ಶೃಂಗೇರಿ ಶಾರದೆ ಮಂಗಳವಾರ ಬ್ರಾಹ್ಮಿ ಸ್ವರೂಪಿಣಿಯಾಗಿ ಕಂಗೊಳಿಸಿದಳು.

ಶೃಂಗೇರಿ ನವರಾತ್ರಿಯಲ್ಲಿ ದರ್ಬಾರ್ ನಲ್ಲಿ ಕುಳಿತಿರುವ ಜಗದ್ಗುರು ಶ್ರೀ ವಿಧುಶೇಖರ ಭಾರತೀ ತೀರ್ಥರು.