ಕಾವ್ಯದ ಮುಖ್ಯ ನೆಲೆ ಮನುಷ್ಯನ ಬದುಕು: ಡಿ. ರಾಮಣ್ಣ ಅಲ್ಮರ್ಸಿಕೇರಿ

ಗದಗ: ಕಾವ್ಯದ ಮುಖ್ಯ ನೆಲೆಯೆಂದರೆ ಅದು ಮನುಷ್ಯನ ಬದುಕು. ಈ ಬದುಕಿನ ಕಾವ್ಯಕ್ಕೆ ಕನಿಕರದ ಕರುಳಿರುತ್ತದೆ. ಮನುಷ್ಯತ್ವದ ಬೇರಿರುತ್ತದೆ ಎಂದು ಸಾಹಿತಿ ಡಿ. ರಾಮಣ್ಣ ಅಲ್ಮರ್ಸಿಕೇರಿ ಹೇಳಿದರು.

ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಡಾ. ಜಿ.ಬಿ.ಬಿಡನಾಳ ಮಾತನಾಡಿ, ಕಾವ್ಯಕನ್ನಿಕೆಯೆಡೆಗಿನ ಅನಂತ ಪ್ರೇಮದಿಂದ ಕಾವ್ಯ ಕೃಷಿಗೆ ತೊಡಗಿರುವ ಕವಿಯಿತ್ರಿ ಸತ್ವಯುತ ಕವಿತೆ ಬರೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಲೋಕದ ಸತ್ಯ ನೇರವಾಗಿ ಪ್ರಶ್ನಿಸುವ ಎದೆಗಾರಿಕೆ ಅವರಿಗಿದೆ. ಸಾಮಾಜಿಕ ಕಳಕಳಿ ಜೀವ ಪರ ನಿಲುವುಗಳಿಂದ ಕೂಡಿದ ಇವರ ಕವಿತೆಗಳು ಓದುಗರ ಜತೆ ಮಾತಿಗಿಳಿಯುತ್ತವೆ. ತಾಯಿಯ ಬಗೆಗೆ ಮಾರ್ಮಿಕವಾಗಿ ಕವನ ಹೆಣೆದಿದ್ದಾರೆ ಎಂದರು.

ಕವಿ ಎ.ಎಸ್. ಮಕಾನದಾರ ಮಾತನಾಡಿ, ಕಾವ್ಯವೆಂದರೆ ವೇದ ಬೋಧಗಳ ನ್ಯಾಸ ಉಪನ್ಯಾಸವಲ್ಲ, ವಾಚನ ಪ್ರಚನಗಳ ಯೋಚನೆಯೂ ಅಲ್ಲ, ಕವಿಯಂತರಂಗದ ಸಂವಾದವಾಗಿದೆ. ನಿಶ್ಚಲ ಮನದಿಂದ ಆಸ್ವಾದಿಸುವ ಸ್ವಾದವಾಗಿದೆ. ಚಿಗಟೇರಿ ಅವರ ಕವನಗಳಲ್ಲಿ ನಾಗರಪಂಚಮಿ ದೀಪಾವಳಿ ಮುಂತಾದ ಕವನಗಳು ಜನಪದೀಯ ಸೊಗಡನ್ನು ನುಡಿಚಿತ್ರವಾಗಿಸಿವೆ ಎಂದರು.

ಕಿಶೋರಬಾಬು ನಾಗರಕಟ್ಟಿ ಸ್ವಾಗತಿಸಿದರು. ಶಿವಾನಂದ ಗಿಡ್ನಂದಿ ಕಾರ್ಯಕ್ರಮ ನಿರೂಪಿಸಿದರು. ರಕ್ಷಿತಾ ಗಿಡ್ನಂದಿ ವಂದಿಸಿದರು.