ಜೆಎಸ್ಎಸ್ ಸಂಸ್ಥೆಗಳಲ್ಲಿ ಸೇವೆಗೈದು ನಿವೃತ್ತರಾದವರಿಗೆ ಸನ್ಮಾನ

ಕನ್ನಡಪ್ರಭ ವಾರ್ತೆ ಮೈಸೂರು

ಮೈಸೂರು ಸುತ್ತೂರು ಶಾಖಾಮಠದಲ್ಲಿ ನಡೆದ ಡಾ. ಶ್ರೀ ಶಿವರಾತ್ರಿ ರಾಜೇಂದ್ರ ಸ್ವಾಮೀಜಿಯವರ 109ನೇ ಜಯಂತಿ ಮಹೋತ್ಸವದ ಸಂದರ್ಭದಲ್ಲಿ ಶ್ರೀ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಅಭಿನಂದಿಸಿ ಆಶೀರ್ವದಿಸಿದರು.

ಕಾರ್ಯಕ್ರಮದಲ್ಲಿ ಮಹಾವಿದ್ಯಾಪೀಠದ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿ 2023ರ ಸೆಪ್ಟೆಂಬರ್ ನಿಂದ 2024ರ ಆಗಸ್ಟ್ 25 ರವರೆಗೆ ನಿವೃತ್ತರಾದವರು, ಹಾಗೂ ಸೇವೆಯಿಂದ ಬಿಡುಗಡೆಗೊಂಡವರಿಗೆ ಅಭಿನಂದನೆ ಮತ್ತು ಸೇವೆ ಸಲ್ಲಿಸುತ್ತಿರುವಾಗಲೇ ಅಗಲಿದವರ ಕುಟುಂಬದವರಿಗೆ ಸಾಂತ್ವನ ಹೇಳಲಾಯಿತು. ಹೀಗೆ ಒಟ್ಟು 177 ನೌಕರರು ಹಾಗೂ ಅವರ ಕುಟುಂಬ ವರ್ಗದವರನ್ನು ಶ್ರೀಗಳು ಆಶೀರ್ವದಿಸಿ ಅಭಿನಂದಿಸಿದರು.

ಡಾ.ಬಿ. ಪ್ರಭುಸ್ವಾಮಿ, ಡಾ.ಎಚ್.ಎಸ್. ಅಂಬಿಕಾ, ಆರ್.ಜೆ. ಪ್ರತಿಭಾ, ಡಾ.ಎನ್. ಮಹೇಶ್ವರಿ, ಆರ್.ಎಸ್. ಕುಮಾರ್, ಡಿ.ಎಸ್. ಅಂಬಿಕಾ, ಕೆ.ಜಿ. ವಿನುತಾ, ಡಾ. ಪ್ರಿಯದರ್ಶಿನಿ, ಎಚ್.ಎಸ್. ಮಾನಸ ಅವರು ನಿವೃತ್ತರ ಪರಿಚಯವನ್ನು ನಡೆಸಿಕೊಟ್ಟರು. ಕಾನೂನು ಕಾಲೇಜು ವಿದ್ಯಾರ್ಥಿಗಳಾದ ತೇಜಸ್ ಎಚ್. ಬಡಾಲ ಮತ್ತು ಕೃತಿ ಕೈಲಾರ್ ಪ್ರಾರ್ಥಿಸಿದರು. ಪ್ರೊ.ಆರ್. ಮೂಗೇಶಪ್ಪ ಸ್ವಾಗತಿಸಿದರು. ಸಹಾಯಕ ಪ್ರಾಧ್ಯಾಪಕ ಡಾ.ಪಿ. ಶಿವಾನಂದ ಭಾರತಿ ವಂದಿಸಿದರು. ಡಾ.ಎಸ್. ನಟರಾಜು ನಿರೂಪಿಸಿದರು.