ನರಗುಂದದಲ್ಲಿ ಬರಗಾಲದಲ್ಲೂ ನೆರವಾದ ಅರಣ್ಯ ಕೃಷಿ

ಎಸ್.ಜಿ. ತೆಗ್ಗಿನಮನಿ

ನರಗುಂದ ಪಟ್ಟಣದ ದಂಡಾಪುರ ಓಣಿಯ ಶ್ರೀಪಾದ ವಿಶ್ವೇಶ್ವರ ಅವರು ವೃತ್ತಿಯಲ್ಲಿ ಬಾಗಲಕೋಟೆಯ ತೋಟಗಾರಿಕೆ ವಿಶ್ವವಿದ್ಯಾನಿಲಯದ ಸಹಾಯಕ ಪ್ರಾಧ್ಯಾಪಕರು. ಪ್ರವೃತ್ತಿಯಲ್ಲಿ ಕೃಷಿಕರು. ಚಿಕ್ಕನರಗುಂದ ಗ್ರಾಮದ ರಸ್ತೆಯ ಬಳಿ ಮಲಪ್ರಭಾ ಬಲದಂಡೆ ಮುಖ್ಯ ಕಾಲುವೆ ಪಕ್ಕದಲ್ಲಿನ ಹೊಲದ ಬದುವಿನಲ್ಲಿ ಮತ್ತು ಕೆರೆ ದಡದಲ್ಲಿ ಸುಮಾರು 15 ಸಾವಿರ ಸುಬಾಬುಲ್, 3 ಸಾವಿರ ಗಾಳಿ ಗಿಡ ಸೇರಿದಂತೆ ಹತ್ತಾರು ನೇರಳೆ, ತೆಂಗು, ನುಗ್ಗೆ ಮತ್ತು ಹುಣಸೆ ಮರಗಳನ್ನು 3 ವರ್ಷದ ಹಿಂದೆ ನೆಟ್ಟಿದ್ದರು. ಈಗ ಅವುಗಳ ಪೈಕಿ ಹಲವು ಫಲ ನೀಡುವ ಹಂತಕ್ಕೆ ಬೆಳೆದು ನಿಂತಿದೆ.

₹10ರಿಂದ ₹15 ಲಕ್ಷ ಲಾಭ: ಇವರು ತಮ್ಮ 10 ಎಕರೆ ಭೂಮಿಯ ಬದುಗಳಲ್ಲಿ ಮೂರು ವರ್ಷದ ಹಿಂದೆ ಸುಬಾಬುಲ್ ಗಿಡ ಮತ್ತು ಗಾಳಿಗಿಡಗಳನ್ನು ಬೆಳೆಸಿದ್ದಾರೆ. 4 ವರ್ಷದ ನಂತರ ಕಟಾವು ಮಾಡಿದಾಗ 300 ಟನ್ ಹಸಿ ಕಟ್ಟಿಗೆ ಸಿಗುತ್ತದೆ. ಸದ್ಯದ ಮಾರುಕಟ್ಟೆ ಬೆಲೆ ಟನ್ ಕಟ್ಟಿಗೆಗೆ 5 ಸಾವಿರ ರುಪಾಯಿ ಇದೆ. ಕಟಾವು ಮಾಡಿದ ನಂತರವೂ ಮತ್ತೆ ಚಿಗುರೊಡೆಯುತ್ತದೆ. ಹೀಗೆ ಒಮ್ಮೆ ಬೆಳೆಸಿದ ಗಿಡಗಳು 30 ವರ್ಷದವರೆಗೆ ಬಾಳಿಕೆ ಬರುತ್ತವೆ. ಒಟ್ಟಾರೆ ಅರಣ್ಯ ಕೃಷಿ ಮಾಡಿದರೆ ಲಾಭ ಬರುತ್ತದೆ ಎನ್ನುತ್ತಾರೆ ಶ್ರೀಪಾದ ವಿಶ್ವೇಶ್ವರ(ಮೊ. 9448344103) ಅವರು.ಕೃಷಿ ಜತೆಗೆ ಅರಣ್ಯ ಕೃಷಿ ಮಾಡಿದರೆ, ಅತಿವೃಷ್ಟಿ, ಅನಾವೃಷ್ಟಿ ಅಥವಾ ಬೆಲೆ ಏರಿಳಿತ ಸಂದರ್ಭದಲ್ಲಿ ರೈತರಿಗೆ ವರದಾನವಾಗಲಿದೆ. ಆದ್ದರಿಂದ ರೈತರು ಬೆಳೆಹಾನಿಯಾಯಿತೆಂದು ಅಂಜದೇ ಅರಣ್ಯ ಕೃಷಿಗೆ ಆದ್ಯತೆ ನೀಡಬೇಕು ಎಂದು ತಿಳಿಸಿದರು.