ರೈಲ್ವೆ ಸೇತುವೆ ಪೂರ್ಣಗೊಂಡರೂ ಸಂಚಾರಕ್ಕಿಲ್ಲ ಮುಕ್ತಿ

ಸೋಮರಡ್ಡಿ ಅಳವಂಡಿ

ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಸಹಯೋಗದಲ್ಲಿ ಶೇ. 50ರ ಅನುದಾನದಡಿ ಸೇತುವೆ ನಿರ್ಮಿಸಲಾಗಿದೆ. ಆದರೆ, ಯೋಜನೆ ರೂಪಿಸುವ ವೇಳೆ ಲಿಂಕ್ ರಸ್ತೆಯ ನಿರ್ಮಾಣದ ಪ್ರಸ್ತಾವನೆಯನ್ನೇ ಮಾಡಿಲ್ಲ. ಹೀಗಾಗಿ ಸೇತುವೆ ಮಾತ್ರ ನಿರ್ಮಿಸಲಾಗಿದೆ. ಲಿಂಕ್‌ ರಸ್ತೆ ನಿರ್ಮಾಣಕ್ಕೆ ಯಾರು ಅನುದಾನ ನೀಡಬೇಕೆಂಬುದು ಯಕ್ಷಪ್ರಶ್ನೆಯಾಗಿದೆ. ರೈಲ್ವೆ ಇಲಾಖೆ ನಾವು ಸೇತುವೆ ನಿರ್ಮಿಸಿದ್ದು ರಸ್ತೆ ನಿರ್ಮಿಸುವುದಿಲ್ಲ, ರಾಜ್ಯ ಸರ್ಕಾರವೇ ಇದಕ್ಕೆ ಅನುದಾನ ನೀಡಬೇಕೆಂದು ಹೇಳಿದರೆ, ರಾಜ್ಯ ಸರ್ಕಾರ ಈಗಾಗಲೇ ನಾವು ಶೇ. 50ರಷ್ಟು ಅನುದಾನ ನೀಡಿದ್ದು ಲಿಂಕ್‌ ರಸ್ತೆ ನಿರ್ಮಾಣಕ್ಕೆ ಅನುದಾನ ನೀಡುವುದಿಲ್ಲವೆಂದು ಕೈಚೆಲ್ಲಿದೆ. ಹೀಗಾಗಿ ಸೇತುವೆ ಮೇಲಿನ ಸಂಚಾರ ಮುಕ್ತಗೊಳಿಸುವುದು ವಿಳಂಬವಾಗಿದೆ.

ಈ ಹಿಂದೆ ಸೇತುವೆ ನಿರ್ಮಾಣದ ವೇಳೆ ಲಿಂಕ್ ರಸ್ತೆ ನಿರ್ಮಾಣ ಮತ್ತು ಭೂ ಸ್ವಾಧೀನ ಪ್ರಕ್ರಿಯೆಗೆ ಕೇವಲ ₹ 1.86 ಕೋಟಿ ಅಂದಾಜು ಮಾಡಲಾಗಿತ್ತು. ಆಗ ಆಗಲಿಲ್ಲ. 2024ರಲ್ಲಿ ಸೇತುವ ಪೂರ್ಣಗೊಳಿಸುವ ವೇಳೆಯಲ್ಲಿ ₹ 4.26 ಕೋಟಿ ಯೋಜನೆ ರೂಪಿಸಲಾಗಿತ್ತು. ಆದರೆ, ಈಗ ₹ 5.26 ಕೋಟಿ ತಗಲುತ್ತಿದೆ ಎಂದು ಅಂದಾಜಿಸಲಾಗಿದೆ. ಈ ಕುರಿತು ಪ್ರಸ್ತಾವನೆಯನ್ನು ಜಿಲ್ಲಾಧಿಕಾರಿ ನೈಋತ್ಯ ರೈಲ್ವೆ ಇಲಾಖೆಗೆ ಕಳುಹಿಸಿದ ಮೇಲೆ, ಕೇಂದ್ರದಿಂದ ಅನುಮತಿ ದೊರೆಯಬೇಕಾಗಿದೆ. ಇದೆಲ್ಲವೂ ಸುಲಭ ಸಾಧ್ಯವೇ ಎನ್ನುವುದು ಮಾತ್ರ ಪ್ರಶ್ನಾರ್ಥಕ.