ಶೃತಿ ಸಾವಿನ ಹಿಂದೆ ಗೋವಾ ಕ್ಯಾಸಿನೋ ಲಿಂಕ್ ಇದೆಯಾ?

ಚಿಕ್ಕಪ್ಪನಹಳ್ಳಿ ಷಣ್ಮುಖ

ಬೆಂಗಳೂರಿನಲ್ಲಿ ಕೆಲಸ ಮಾಡುತ್ತಿದ್ದ ಮಲ್ಲಾಪುರ ಮೂಲದ ಟೆಕ್ಕಿ ಶೃತಿ ಸಾವಿನ ಹಿಂದೆ ಗೋವಾ ಕ್ಯಾಸಿನೋ ಲಿಂಕ್ ಏನಾದರೂ ಇದೆಯಾ ಎಂಬ ಅನುಮಾನಗಳು ಕಾಡಿವೆ. ಒಂದೂವರೆ ವರ್ಷದ ಅವಧಿಯಲ್ಲಿ ಒಂದೂವರೆ ಕೋಟಿ ರು. ಸಾಲ ಮಾಡಿದ್ದ ಶೃತಿ, ಇಷ್ಟೊಂದು ಬೃಹತ್ ಸಾಲ ಮಾಡುವುದರ ಹಿಂದಿನ ಉದ್ದೇಶವೇನು? ತೀರಿಸುವ ಬಗೆಯಾದರೂ ಹೇಗೆ? ತನ್ನ ನಾದಿನಿ ರಮ್ಯ 25 ಲಕ್ಷ ರು. ಸಾಲ ಹೇಗೆ ಕೊಟ್ಟರು? ಅಲ್ಲದೇ 27 ಲಕ್ಷ ರು. ಹೆಚ್ಚುವರಿ ಸಾಲವ ಶೃತಿಗೆ ಚಿಟ್ ಫಂಡ್ ಮೂಲಕ ಹೇಗೆ ಕೊಡಿಸಿದಳು ಎಂಬಿತ್ಯಾದಿ ಪ್ರಶ್ನೆಗಳು ಮೇಲು ನೋಟಕ್ಕೆ ನಿಗೂಢವಾಗಿ ಕಾಣಿಸುತ್ತಿವೆ.

ನನ್ನ ಮಗಳು ಒಂದು ಕಾಲು ಲಕ್ಷ ರು. ಸಂಬಳ ಪಡೆದುಕೊಂಡರೂ ಕೆಲವು ಸಲ ಮನೆ ಬಾಡಿಗೆ ಕಟ್ಟಲು ದುಡ್ಡಿಲ್ಲ ಎಂದು ಕೇಳುತ್ತಿದ್ದಳು, ಆಕೆಯ ತಂಗಿ ಬಳಿ ಮೊಬೈಲ್ ರಿಚಾರ್ಜ್ ಮಾಡಿಸಿಕೊಳ್ಳುತ್ತಿದ್ದಳು, ಕಷ್ಟ ಎಂದಾಗಲೆಲ್ಲ ಹಣ ಕೊಟ್ಟಿದ್ದೇನೆ ಎಂಬ ಅಚ್ಚರಿಯ ಮಾತುಗಳ ಹರುವುತ್ತಾರೆ ತಂದೆ ಗೊಂಚಿಗಾರ್ ತಿಪ್ಪೇಸ್ವಾಮಿ.

ಶೃತಿ ಸಾವಿಗೂ ಮುನ್ನ ಕಳಿಸಿದ ವಾಯ್ಸ್ ಮೆಸೇಜ್‌ನಲ್ಲಿ ಎಲ್ಲಿಯೂ ಕೂಡಾ ತನ್ನ ಪತಿ ರಂಜಿತ್ ಬಗ್ಗೆ ಆಕ್ಷೇಪಣೆ ಮಾತುಗಳನ್ನಾಡಿಲ್ಲ. ಯಾವ ಆಪಾದನೆಗಳ ಮಾಡಿಲ್ಲ. ನನ್ನ ಮಗನ ಸರಿಯಾಗಿ ನೋಡಿಕೋ ಎಂದಿದ್ದಾಳೆ. ಸೌಮ್ಯ(ನಾದಿನಿ) ಅಕ್ಕನಿಗೆ 25 ಲಕ್ಷ ರು. ಸಾಲ ವಾಪಸ್ಸು ಕೊಡಬೇಕು. ಅಲ್ಲದೇ ಬೇರೆಯವರಿಂದ 27 ಲಕ್ಷ ರು. ಸಾಲ ಕೊಡಿಸಿದ್ದಾಳೆ ಎಂಬ ಮಾತುಗಳ ಉಲ್ಲೇಖವಿದೆ. ಇದರಾಚೆಗೆ ಉಳಿದವರಿಗೆ ಕೊಡಬೇಕಾದ ಸಾಲದ ಪ್ರಸ್ತಾಪವೇ ಇಲ್ಲದಿರುವುದು ಹಲವು ಅನುಮಾನಗಳಿಗೆ ಅವಕಾಶ ಮಾಡಿಕೊಟ್ಟಿದೆ.

ಇತ್ತೀಚಿನ ವರ್ಷಗಳಲ್ಲಿ ದಿಡೀರ್ ಸಾಲಗಳ ಮಾಡಿ ನಂತರ ಸಾವು ನೋವುಗಳು ಸಂಭಿಸುವುದರ ಹಿಂದೆ ಜೂಜಿನಂತಹ ಕೆಟ್ಟ ವ್ಯಸನಗಳಿವೆ. ಶೃತಿ ಪತಿ ರಂಜಿತ್ ಏನಾದರೂ ಗೋವಾದ ಕ್ಯಾಸಿನೋ ಹಿಂದೆ ಬಿದ್ದಿದ್ದರಾ ? ಜೂಜಾಡಲು ಹಣಕ್ಕಾಗಿ ಪತ್ನಿ ಮೂಲಕ ಸಾಲ ಮಾಡಿಸಿದರಾ ಎಂಬ ಶಂಕೆಗಳೂ ಕೂಡಾ ದಟ್ಟವಾಗಿವೆ.

ಹೊಳಲ್ಕೆರೆ ತಾಲೂಕಿನ ಬಾಣಗೆರೆ ಗ್ರಾಮದ ಗಂಡನ ಮನೆ ನೆಲದಲ್ಲಿ ಶೃತಿ ಹೂತು ಹೋಗಿದ್ದಾಳೆ. ಅಂತ್ಯ ಸಂಸ್ಕಾರಕ್ಕೆ ಬಾರದ ಪತಿ ರಂಜಿತ್ ಬುಧವಾರ ಸಂಜೆಯಾದರೂ ಎಲ್ಲಿದ್ದಾರೆ ಎಂಬ ಬಗ್ಗೆ ಖಚಿತ ಮಾಹಿತಿಗಳು ಲಭ್ಯವಾಗಿಲ್ಲ.