ವಿಶ್ವಕರ್ಮರ ದಾರಿದೀಪದಲ್ಲಿ ನಡೆಯೋಣ

ಕನ್ನಡಪ್ರಭ ವಾರ್ತೆ ಹಾಸನ

ಶ್ರೀ ಕ್ಷೇತ್ರ ಪುಷ್ಪಗಿರಿ ಮಠದ ಶ್ರೀ ಸೋಮಶೇಖರ ಶಿವಾಚಾರ್ಯ ಸ್ವಾಮೀಜಿಯವರು ಮಾತನಾಡಿ, ಕರ್ಮ ಅಂದರೆ ಕೆಲಸ ಹಾಗಾಗಿ ಇಡೀ ವಿಶ್ವದ ಕೆಲಸ ಮಾಡುತ್ತಿರುವವರು ವಿಶ್ವಕರ್ಮ ಸಮುದಾಯದವರಾಗಿದ್ದಾರೆ. ಯಾವುದೇ ಅಪೇಕ್ಷೆ ಇಲ್ಲದೆ, ನಿರಾಪೇಕ್ಷತೆಯಿಂದ ವಿಶ್ವವನ್ನು ಸುಂದರಗೊಳಿಸುವ, ಯಾವುದೇ ವಸ್ತು ಸಿಕ್ಕರು ಅದನ್ನು ಸುಂದರತೆ ಮಾಡುವ ಕೆಲಸ ಮಾಡಿದ್ದಾರೆ ಎಂದರು. ಜೀವಂತವಾಗಿ ಉಳಿದಿರುವ ಕೆಲಸಗಳೆಂದರೆ ಅದು ವಿಶ್ವಕರ್ಮ ಸಮಾಜದವರು ಮಾಡಿರುವ ಕೆಲಸಗಳಾಗಿವೆ. ವಿಶ್ವ ನೋಡುತ್ತಿರುವ ಹಳೇಬೀಡು, ಬೇಲೂರಿನ ಶಿಲ್ಪ ಕಲೆ, ದೇವಾಲಯವನ್ನು ನಿರ್ಮಿಸಿದ ಜಕಣಾಚಾರಿಯವರು ಮಹಾನುಭಾವರಾಗಿದ್ದಾರೆ. ಅವರ ರೀತಿಯಲ್ಲಿ ನಿಮ್ಮ ನಿಮ್ಮ ಕರ್ಮಗಳ ಮಾಡುವುದೇ ನಿಮ್ಮನ್ನು ಶಾಶ್ವತವಾಗಿ ಉಳಿಯುವಂತೆ ಮಾಡುತ್ತದೆ. ಶಾಶ್ವತವಾಗಿ ನೆನಪಿಡುವ ಕೆಲಸವನ್ನು ಈ ಸಮಾಜ ಮಾಡಿದೆ ಅದನ್ನು ಮುಂದುವರಿಸಿ ಮಕ್ಕಳಿಗೆ ಕಲಿಸಿಕೊಡಿ ಎಂದು ತಿಳಿಸಿದರು.ಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷರಾದ ಬಿ.ಪಿ ಕೃಷ್ಣೇಗೌಡ ಅವರು ಮಾತನಾಡಿ, ಮಹಾಭಾರತ, ಪೌರಾಣಿಕ ಕಾಲದಿಂದಲೂ ಎಲ್ಲಾ ಮಠಗಳಿಗೆ ಶಿಲ್ಪಗಳನ್ನು ಕೆತ್ತನೆ ಮಾಡಿಕೊಟ್ಟವರು ವಿಶ್ವಕರ್ಮ ಸಮಾಜದವರು. ರೈತರಿಗೆ ನೇಗಿಲ ಸೃಷ್ಟಿ ಮಾಡಿಕೊಟ್ಟು ಅನ್ನದಾತರಾದವರು ವಿಶ್ವಕರ್ಮ ಸಮಾಜದವರು ಎಂದರು.ಉಡುಪಿ ಜಿಲ್ಲೆಯ ಬಾರ್ಕೂರಿನ ವಾಗ್ಮಿಗಳಾದ ಎನ್.ಆರ್ ದಾಮೋದರ ಶರ್ಮ ಅವರು ಮಾತನಾಡಿ, ವಿಶ್ವಬ್ರಾಹ್ಮಣ ಪರಂಪರೆ ವೈದಿಕ ಧರ್ಮದ ಹಿನ್ನೆಲೆಯಲ್ಲಿ ಬಂದಿದೆ. ವಿಶ್ವಕರ್ಮ ದೇವತೆ ಕೇವಲ ಒಂದು ಸಮಾಜದ ದೇವತೆಯಲ್ಲ, ಜಗತ್ತಿನ ದೇವತೆ. ಜಗತ್ತನ್ನು ನಿರ್ಮಿಸಿ ಇಲ್ಲಿ ಏನೇನೂ ನಡೆಯುತ್ತಿದೆ ಅದನ್ನು ನಿಯಂತ್ರಿಸುವಂತವರೆ ವಿಶ್ವಕರ್ಮ ಸಮಾಜದವರು. ನಮ್ಮ ಪರಂಪರೆಯ ನೆನಪು ಇದ್ದರೆ ಮಾತ್ರ ಆ ಪರಂಪರೆಗೆ ಚ್ಯುತಿ ಬಾರದಂತೆ ಸರಿದಾರಿಯಲ್ಲಿ ನಡೆಯಲು ಸಾಧ್ಯವಾಗುತ್ತದೆ ಎಂದು ತಿಳಿಸಿದರು.ಮೂಗಿನ ನತ್ತಿನಿಂದ ಹಿಡಿದು ದೇಶದ ರಕ್ಷಣೆ ಬೇಕಾದ ಆಯುಧಗಳನ್ನು ಮಾಡಿಕೊಟ್ಟಿದ್ದು ವಿಶ್ವಕರ್ಮ ಸಮುದಾಯದವರು. ಹಾಗೂ ವಿಶ್ವಬ್ರಾಹ್ಮಣ ಸಮುದಾಯ ಕಟ್ಟಲು ಯಾವ ಸ್ವಾರ್ಥವೂ ಇಲ್ಲದೆ ಸಮಾಜಕ್ಕೆ ಶ್ರಮಿಸಿದರು ಅನೇಕರಿದ್ದಾರೆ ಎಂದು ಅನೇಕೆ ಮಹನೀಯರ ಜೀವನದ ಕುರಿತು, ವಿಶ್ವಕರ್ಮ ಸಮುದಾಯದ ಕುರಿತಾಗಿ ಸವಿವರವಾಗಿ ಉಪನ್ಯಾಸ ನೀಡಿದರು.ಕಾರ್ಯಕ್ರಮದಲ್ಲಿ ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ವೆಂಕಟೇಶ್ ನಾಯ್ಡು, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ನಿರ್ದೇಶಕರಾದ ಡಾ. ಎಚ್.ಪಿ ತಾರಾನಾಥ್, ಸಮುದಾಯದ ಮುಖಂಡರು ಹಾಗೂ ಮತ್ತಿತರರು ಉಪಸ್ಥಿತರಿದ್ದರು.