ಕನ್ನಡಪ್ರಭ ವಾರ್ತೆ ಹುನಗುಂದ
ನಗರದ ರಾಮವಾಡಗಿ ಕ್ರಾಸ್ ಹತ್ತಿರದ ತಗಡಿನ ಶೆಡ್ ಮುಂದೇ ರಸ್ತೆಯ ಮೇಲೆ ಅಕ್ರಮವಾಗಿ ಗಾಂಜಾ ಮಾರಾಟ ಮಾಡುತ್ತಿದ್ದ ಓರ್ವ ವ್ಯಕ್ತಿಯನ್ನು ಹುನಗುಂದ ಪೊಲೀಸ್ರು ಗುರುವಾರ ಬಂಧಿಸಿ, ₹ 58 ಸಾವಿರ ಮೌಲ್ಯದ 588 ಗ್ರಾಂ ಒಣಗಿದ ಮಾದಕ ವಸ್ತು ಗಾಂಜಾ ವಶಕ್ಕೆ ಪಡೆದಿದ್ದಾರೆ.ನಗರದ ನಿವಾಸಿ ಅಜೀಮ ಶಬ್ಬಿರ ಖಾಜಿ (24) ಎಂಬುವನು ಗಾಂಜಾ ಮಾರುತ್ತಿದ್ದ ಆರೋಪಿ. ಅಕ್ರಮವಾಗಿ ಹುನಗುಂದ ನಗರದಲ್ಲಿ ಅನೇಕ ದಿನಗಳಿಂದ ಬೇರೆಡೆಯಿಂದ ಗಾಂಜಾ ತಂದು ಪ್ಯಾಕೆಟ್ ಮಾಡಿ ಹುನಗುಂದ ನಗರ ಸೇರಿ ಸುತ್ತಮುತ್ತಲಿನ ಗ್ರಾಮಗಳ ಜನರಿಗೆ ಮಾರುತ್ತಿದ್ದಾನೆ ಎಂಬ ಖಚಿತ ಮಾಹಿತಿ ಹುನಗುಂದ ಪೊಲೀಸರಿಗೆ ಲಭ್ಯವಾಗಿತ್ತು. ನಿಖರ ಮಾಹಿತಿಯ ಮೇರೆಗೆ ಕಾರ್ಯಪ್ರವೃತ್ತರಾದ ನಗರದ ಪಿಎಸ್ಐ ಸಿದ್ದಾರೂಢ ಆಲದಕಟ್ಟಿ ನೇತೃತ್ವದ ಪೊಲೀಸ್ ತಂಡ ಆರೋಪಿತ ಗಾಂಜಾ ಮಾರುತ್ತಿದ್ದಾಗ ರೆಡ್ ಹ್ಯಾಂಡಾಗಿ ಸಿಕ್ಕುಬಿದ್ದಿದ್ದಾನೆ.ಆರೋಪಿತನನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ. ಗಾಂಜಾ ಸಮೇತ ರಾಷ್ಟ್ರೀಯ ಹೆದ್ದಾರಿ 50ಕ್ಕೆ ಹೊಂದಿಕೊಂಡ ಪಂಚನಾಮೆ ಮಾಡಲಾಯಿತು. ತಹಸೀಲ್ದಾರ ಪ್ರದೀಪಕುಮಾರ ಹಿರೇಮಠ, ಎಸ್.ಬಿ.ಆಜೂರ, ಪಿಎಸ್ಐ ಸಿದ್ದಾರೂಢ ಆಲದಕಟ್ಟಿ, ಎನ್.ಎಂ.ಸಿಮಾನಿ, ಪೊಲೀಸ್ ಸಿಬ್ಬಂದಿ ಇದ್ದರು.
