ಅಂಗವೈಕಲ್ಯ ತಡೆಗೆ ಮೋದಿ ಸರ್ಕಾರ ಒತ್ತು: ಡಾ.ಜಿ.ಎಂ.ಸಿದ್ದೇಶ್ವರ

ಕನ್ನಡಪ್ರಭ ವಾರ್ತೆ ದಾವಣಗೆರೆ

ತಾಲೂಕಿನ ವಡ್ಡಿನಹಳ್ಳಿ ಗ್ರಾಮದಲ್ಲಿ ಸುಮಾರು 25 ಕೋಟಿ ರು. ವೆಚ್ಚದಲ್ಲಿ ನಿರ್ಮಿಸಿರುವ ದಿವ್ಯಾಂಗ ವ್ಯಕ್ತಿಗಳ ಕೌಶಲ್ಯಾಭಿವೃದ್ಧಿ ಪುನರ್ವಸತಿ ಸಬಲೀಕರಣ ಸಂಯುಕ್ತ ಪ್ರಾದೇಶಿಕ ಕೇಂದ್ರವನ್ನು ಸಾಮಾಜಿಕ ನ್ಯಾಯ, ಸಬಲೀಕರಣ ಕೇಂದ್ರ ಸಚಿವ ಡಾ.ವೀರೇಂದ್ರಕುಮಾರ ವರ್ಚ್ಯುವಲ್ ಮೂಲಕ ಉದ್ಘಾಟಿಸಿದ ನಂತರ ಮಾತನಾಡಿದ ಅವರು, ದೇಶದ ಎಲ್ಲ ರಾಜ್ಯಗಳಿಗೂ ಒಂದರಂತೆ ಸಿಆರ್‌ಸಿ ಕೇಂದ್ರ ಆರಂಭಿಸಿದ್ದು, ಕರ್ನಾಟಕ-ಗೋವಾ ರಾಜ್ಯಗಳಿಗೆಂದೇ ಸಿಆರ್‌ಸಿ ಕೇಂದ್ರವನ್ನು ದಾವಣಗೆರೆಯಲ್ಲಿ ಆರಂಭಿಸಿದ್ದು ಜನರ ಪುಣ್ಯ ಎಂದರು. ಒಂದು ವರ್ಷದಲ್ಲಿ 25 ಕೋಟಿ ವೆಚ್ಚದಲ್ಲಿ ಸಿಆರ್‌ಸಿ ಕೇಂದ್ರ ನಿರ್ಮಾಣವಾಗಿ, ಉದ್ಘಾಟನೆಯಾಗುತ್ತಿದೆ. ಇಲ್ಲಿನ ಸಿಆರ್‌ಸಿ ಕೇಂದ್ರದಲ್ಲಿ ಅಂಗವಿಕಲತೆಯನ್ನು ಮೊದಲೇ ಪತ್ತೆ ಹಚ್ಚುವ ತಂತ್ರಜ್ಞಾನದ ವ್ಯವಸ್ಥೆ ಕಲ್ಪಿಸಲು ಕೇಂದ್ರದ ಅನುಮತಿಯೂ ದೊರೆತಿದೆ. ಬಾಕಿ ಜಾಗ ಬಳಸಿಕೊಂಡು ಸಿಆರ್‌ಸಿ ಕೇಂದ್ರ ಪೂರ್ಣ ಪ್ರಮಾಣದಲ್ಲಿ ನಿರ್ಮಿಸಲಾಗುವುದು. ಸಮೀಪದ ಕೊಗ್ಗನೂರು ಬಳಿ 7.23 ಎಕರೆ ಜಾಗದಲ್ಲಿ ದಿವ್ಯಾಂಗರಿಗೆ ಕ್ರೀಡಾ ಸಮುಚ್ಛಯ ನಿರ್ಮಿಸುವ ಉದ್ದೇಶವಿದೆ. ಈಗಾಗಲೇ ಕೇಂದ್ರ ಸಚಿವರ ಗಮನಕ್ಕೂ ತಂದಿದ್ದೇನೆ ಎಂದು ಅವರು ಹೇಳಿದರು.

ಕೇಂದ್ರದ ನೋಡೆಲ್ ಅಧಿಕಾರಿ ಗಣೇಶ ಶೇರಗಾರ ಮಾತನಾಡಿ, ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಇಲಾಖೆಯಿಂದ ದಿವ್ಯಾಂಗರ ಚಿಕಿತ್ಸೆ, ಪುನರ್ವಸತಿಗಾಗಿ ಸಂಯುಕ್ತ ಪ್ರಾದೇಶಿಕ ಚಿಕಿತ್ಸಾ ಕೇಂದ್ರ ಸ್ಥಾಪಿಸಲಾಗಿದೆ. 9 ಎಕರೆ ಸರ್ಕಾರಿ ಜಾಗದಲ್ಲಿ 25 ಕೋಟಿ ವೆಚ್ಚದಲ್ಲಿ ಸಿಆರ್‌ಸಿ ಕಟ್ಟಡ ನಿರ್ಮಿಸಲಾಗಿದೆ. ವಡ್ಡಿನಹಳ್ಳಿ ಬಳಿ 9 ಎಕರೆ ಹಾಗೂ ಕೊಗ್ಗನೂರು ಬಳಿ 7.23 ಎಕರೆ ಸೇರಿ ಒಟ್ಟು 16.23 ಎಕರೆ ಜಮೀನು ನೀಡಲಾಗಿದೆ. ಕರ್ನಾಟಕ-ಗೋವಾ ರಾಜ್ಯಗಳಿಗೆ ಸೇರಿದ ವಿಶೇಷ ಚೇತನರಿಗೆ ಸೇವೆ ಒದಗಿಸುವ ಕೆಲಸ ಸಿಆರ್‌ಸಿಯದ್ದಾಗಿದೆ ಎಂದರು.

ಮಾಜಿ ಶಾಸಕ ಪ್ರೊ.ಎನ್.ಲಿಂಗಣ್ಣ, ಉಪ ಮೇಯರ್ ಯಶೋಧ ಯೋಗೇಶ, ಅಪರ ಜಿಲ್ಲಾಧಿಕಾರಿ ಸೈಯ್ಯದಾ ಆಫ್ರೀನ್ ಭಾನು ಎಸ್.ಬಳ್ಳಾರಿ, ಬಿಜೆಪಿ ಎಸ್ಟಿ ಮೋರ್ಚಾ ರಾಜ್ಯ ಉಪಾಧ್ಯಕ್ಷ ಶ್ರೀನಿವಾಸ ಟಿ.ದಾಸಕರಿಯಪ್ಪ, ಓಬಿಸಿ ಮೋರ್ಚಾ ಅಧ್ಯಕ್ಷ ರಾಜನಹಳ್ಳಿ ಶಿವಕುಮಾರ, ಅಣಬೇರು ಜೀವನಮೂರ್ತಿ, ಮಾಜಿ ಮೇಯರ್ ಎಸ್.ಟಿ.ವೀರೇಶ, ದೂಡಾ ಮಾಜಿ ಅಧ್ಯಕ್ಷ ಎ.ವೈ.ಪ್ರಕಾಶ, ಪಾಲಿಕೆ ವಿಪಕ್ಷ ನಾಯಕ ಕೆ.ಪ್ರಸನ್ನಕುಮಾರ, ಗ್ರಾಪಂ ಅಧ್ಯಕ್ಷೆ ಪ್ರಭಾವತಿ, ಉಪಾಧ್ಯಕ್ಷ ನಾಗರಾಜ, ಗಂಗಾಧರ, ಕೆ.ಎಂ.ವೀರೇಶ, ವೀಣಾ, ಭಾಗ್ಯ ಪಿಸಾಳೆ, ನೋಡಲ್ ಅಧಿಕಾರಿ ಕನಕ ಸಭಾಪತಿ ಇತರರು ಇದ್ದರು.ಭಾರತ್ ಬ್ರಾಂಡ್ ಅಕ್ಕಿ ಕಳಪೆ ಎನ್ನಲು ಮುನಿಯಪ್ಪ ಯಾರು?: ಸಂಸದ ಕಿಡಿ

ದಾವಣಗೆರೆ: ಕೇಂದ್ರ ಸರ್ಕಾರದ ಭಾರತ್ ಬ್ರಾಂಡ್ ಅಕ್ಕಿ ಕಳಪೆಯೆಂದು ಟೀಕಿಸಲು ಸಚಿವ ಕೆ.ಎಚ್.ಮುನಿಯಪ್ಪ ಯಾರು? ಕೇಂದ್ರವನ್ನು ಹೀಯಾಳಿಸುವುದೇ ವಿಪಕ್ಷದವರ ಕೆಲಸವಾಗಿದೆ ಎಂದು ಸಂಸದ, ಕೇಂದ್ರದ ಮಾಜಿ ಸಚಿವ ಡಾ.ಜಿ.ಎಂ.ಸಿದ್ದೇಶ್ವರ ಹರಿಹಾಯ್ದಿದ್ದಾರೆ.ತಾಲೂಕಿನ ವಡ್ಡಿನಹಳ್ಳಿ ಗ್ರಾಮದಲ್ಲಿ 25 ಕೋಟಿ ವೆಚ್ಚದ ಸಿಆರ್‌ಸಿ ಕೇಂದ್ರ ಉದ್ಘಾಟನೆ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಭಾರತ್ ಬ್ರಾಂಡ್‌ ಅಕ್ಕಿಯನ್ನು ಕಳಪೆ ಅಕ್ಕಿಯಾಗಿ ಹೇಗೆ ಕೊಡಲು ಬರುತ್ತದೆ ಎಂದು ಪ್ರಶ್ನಿಸಿದರು.ಭಾರತ್ ಅಕ್ಕಿ ಬಗ್ಗೆ ಟೀಕಿಸುತ್ತಿರುವ ಸಚಿವ ಕೆ.ಎಚ್‌.ಮುನಿಯಪ್ಪ ಸೇರಿದಂತೆ ವಿಪಕ್ಷದವರಿಗೆ ಕೇಂದ್ರದ ಯೋಜನೆಗಳನ್ನು ಹೀಯಾಳಿಸುವುದೇ ವಿಪಕ್ಷದವರ ಕೆಲಸ. ಕಾಂಗ್ರೆಸಿಗರು ಕೊಡುತ್ತೇವೆ ಅಂದಿದ್ದ 10 ಕೆಜಿ ಉಚಿತ ಅಕ್ಕಿಯನ್ನೇ ಇನ್ನೂ ಜನರಿಗೆ ಕೊಟ್ಟಿಲ್ಲ. ಮೊದಲು ಅದನ್ನು ಕೊಡಲು ಹೇಳಿ. ಆ ನಂತರ ಭಾರತ್ ಅಕ್ಕಿ ಬಗ್ಗೆ ಮಾತನಾಡಲಿ ಎಂದು ಅವರು ಕಿಡಿಕಾರಿದರು.ಎಂಪಿ ಟಿಕೆಟ್ ನಂಗೇ ಸಿಗತ್ತೆ: ಸಿದ್ದೇಶ್ವರ

ನನ್ನ ಮಗ ಯಾಕೆ ಅಭ್ಯರ್ಥಿ ಆಗಬಾರದು? : ರಾಜ್ಯದಲ್ಲಿ ಕೂಡ ತಲೆಮಾರುಗಳಿಂದ ರಾಜಕೀಯ ಮಾಡಿಕೊಂಡು ಬಂದವರು ಸಾಕಷ್ಟು ಜನ ಇದ್ದಾರೆ. ಜನರು ಆಶೀರ್ವಾದ ಮಾಡಿದರೆ ಗೆಲ್ಲುತ್ತೇವೆ ಎಂದರಲ್ಲದೆ, ನನ್ನ ಮಗನಿಗೆ ಟಿಕೆಟ್ ಸಿಗುವುದು ಭಗವಂತನ ಇಚ್ಛೆ. ನನ್ನ ಮಗನಿಗೆ ಮಾತ್ರವಲ್ಲದೇ, ಯಾರಿಗೆ ಟಿಕೆಟ್ ಕೊಟ್ಟರೂ ಒಪ್ಪಿಗೆ ಇದೆ ಎಂದು ಅವರು ಹೇಳಿದರು.