ಅರಣ್ಯದಂಚಿನಲ್ಲಿ ಹೆಚ್ಚಿದ ಕಾಡುಪ್ರಾಣಿಗಳ ಹಾವಳಿ

ಕನ್ನಡಪ್ರಭ ವಾರ್ತೆ ಹನೂರು ಅರಣ್ಯದಂಚಿನ ಗ್ರಾಮಗಳಲ್ಲಿ ಹೆಚ್ಚಿದ ಕಾಡುಪ್ರಾಣಿಗಳ ಉಪಟಳದಿಂದ ಮಾನವ ಪ್ರಾಣಿ ಸಂಘರ್ಷಕ್ಕೆ ಕಾರಣವಾಗಿದೆ.ಹನೂರು ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯ ಕಾಡಂಚಿನ ಗ್ರಾಮಗಳಲ್ಲಿ ಒಂದಡೆ ಕರಡಿ ದಾಳಿಯಿಂದ ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದರೆ, ಮತ್ತೊಂದೆಡೆ ಚಿರತೆ ಉಪಟಳದಿಂದ ರೈತರು ಭಯದ ವಾತಾವರಣದಲ್ಲಿ ಕಾಲ ಕಳೆಯುವಂತಾಗಿದ್ದು, ಇದರಿಂದಾಗಿ ಮಾನವ-ಪ್ರಾಣಿ ಸಂಘರ್ಷಕ್ಕೆ ಎಡೆ ಮಾಡಕ್ಕೊಟ್ಟಂತಾಗಿದೆ. ಕಾಡು ಪ್ರಾಣಿಗಳ ಹಾವಳಿಯಿಂದ ಬೇಸತ್ತ ರೈತರು ಕಂಗಾಲಾಗಿ ಹೋಗಿದ್ದಾರೆ.

ಕೌದಳ್ಳಿ ಸಮೀಪದ ಚೆನ್ನೂರು ಗ್ರಾಮದಲ್ಲಿ ಬುಧವಾರ ಮುಂಜಾನೆ 5.30ರಲ್ಲಿ ಬಹಿರ್ದೆಸೆಗೆ ತೆರಳಿದ್ದ ವ್ಯಕ್ತಿಯ ಮೇಲೆ ಕರಡಿ ದಾಳಿ ನಡೆಸಿದ್ದು ಕಾಲಿಗೆ ತೀವ್ರವಾಗಿ ಗಾಯಗೊಂಡ ಗೋವಿಂದ ಬೋವಿ ಭಯ ಭೀತರಾಗಿದ್ದಾರೆ.

ಕರಡಿ ದಾಳಿಯಿಂದ ಗಾಯಗೊಂಡು ಚೀರಾಡುತ್ತಿದ್ದ ವ್ಯಕ್ತಿಯನ್ನು ಗ್ರಾಮಸ್ಥರು ತುರ್ತು ವಾಹನದ ಮೂಲಕ ಕೊಳ್ಳೇಗಾಲ ಸರ್ಕಾರಿ ಆಸ್ಪತ್ರೆಗೆ ದಾಖಲು ಮಾಡಲಾದ್ದಾರೆ. ಈ ಸಂಬಂಧ ಕಾವೇರಿ ವನ್ಯಧಾಮ ವಲಯ ಅರಣ್ಯ ಇಲಾಖೆ ಅಧಿಕಾರಿಗಳು ಘಟನಾ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದು ಗಾಯಗೊಂಡಿರುವ ವ್ಯಕ್ತಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಲು ನೆರವಿಗೆ ಮುಂದಾಗಿದ್ದಾರೆ.

ಅಂಬಿಕಾಪುರ ಗ್ರಾಮದ ಸುತ್ತಮುತ್ತ ಕಳೆದ ಒಂದು ವಾರದಿಂದ ಜೋಡಿ ಮರಿಗಳ ಜೊತೆ ಚಿರತೆ ಬೀಡು ಬಿಟ್ಟಿದ್ದು ರಾತ್ರಿ ವೇಳೆ ಮಾತ್ರ ರೈತರ ಜಮೀನಿನ ಮನೆಗಳ ಹತ್ತಿರ ಚಿರತೆಗಳು ಬರುತ್ತಿವೆ. ಮಂಗಳವಾರ ರಾತ್ರಿ ಅಂಬಿಕಾಪುರದ ಕಲೀಲ್ ಸಾಬ್ ಎಂಬ ರೈತ ತನ್ನ ತೋಟದ ಮನೆಯ ಮುಂಭಾಗದಲ್ಲಿ ಇದ್ದಾಗ ದಿಢೀರನೆ ಚಿರತೆ ತನ್ನ ಎರಡು ಮರಿಗಳ ಜೊತೆ ಮನೆ ಕಡೆ ಬರುತ್ತಿದ್ದನ್ನು ಕಂಡು ಪಕ್ಕದಲ್ಲಿ ಪಾತ್ರೆಯನ್ನು ಹಿಡಿದು ಸದ್ದು ಮಾಡಿದಾಗ ಅಕ್ಕ ಪಕ್ಕದ ನಿವಾಸಿಗಳು ಬಂದಾಗ ಚಿರತೆಗಳು ಅಲ್ಲಿಂದ ಓಡಿಹೋಗಿವೆ.ಬೋನಿಗೆ ಬೀಳದ ಚಿರತೆಗಳು:

ಸುತ್ತಲಿನ ಗ್ರಾಮಗಳಲ್ಲಿ ಐವತ್ತಕ್ಕೂ ಹೆಚ್ಚು ಸಾಕು ನಾಯಿಗಳನ್ನು ಹಾಗೂ ಸಾಕು ಪ್ರಾಣಿಗಳಾದ ಕುರಿ, ಕೋಳಿ, ಮೇಕೆಗಳನ್ನು ತಿಂದಿರುವ ಚಿರತೆಗಳು ಅರಣ್ಯದತ್ತ ಹೋಗದೆ ರೈತರ ಜಮೀನುಗಳ ಬಳಿಯ ಸುತ್ತಾಡುತ್ತಿರುವುದರಿಂದ ಭಾರಿ ಆತಂಕದಲ್ಲಿ ರೈತರು ವಾಸಿಸುವಂತಾಗಿದೆ.

ಚಿರತೆಗಳನ್ನು ಸೆರೆ ಹಿಡಿಯಲು ಅರಣ್ಯಾಧಿಕಾರಿಗಳು ಗಂಗನ ದೊಡ್ಡಿ, ಗ್ರಾಮದ ಭೈರಪ್ಪ ಜಮೀನಿನ ಬಳಿ ತುಮಕೂರು ಗೇಜ್ ದೊಡ್ಡ ಗೇಟ್ ಅಳವಡಿಸಲಾಗಿದೆ.