ಇತಿಹಾಸ ತಿಳಿಸುವ ಮಾವಳ್ಳಿ, ಚಿಕ್ಕಮಾವಳ್ಳಿಯ ಕುರುಹುಗಳು

ಪ್ರಾಚೀನ ಕಾಲದಲ್ಲಿ ಯಶಪುರ, ಯಶಸ್ವೀಪುರ, ಈಗ ಯಲ್ಲಾಪುರಶಂಕರ ಭಟ್ಟ ತಾರೀಮಕ್ಕಿ

ತಾಲೂಕಿನ ಮಾವಳ್ಳಿ, ಚಿಕ್ಕಮಾವಳ್ಳಿ ಪ್ರದೇಶದಲ್ಲಿರುವ ಇತಿಹಾಸದ ದಾಖಲೆಯನ್ನು ಮತ್ತು ಅದಕ್ಕೆ ಸಂಬಂಧಪಟ್ಟ ಹಿನ್ನೆಲೆಯ ಕುರಿತು ಸಂಶೋಧನೆಗೆ ಹಲವರು ಮುಂದಾಗಿದ್ದಾರೆ. ಇದರಿಂದ ಕದಂಬರ ಕಾಲಕ್ಕಿಂತಲೂ ಹಿಂದಿನ ಹಲವಾರು ಐತಿಹ್ಯಗಳ ಕುರುಹುಗಳು ಜಿಲ್ಲೆಯ ಮಾಹಿತಿಯನ್ನು ಆಧರಿಸಿ ಸಂಶೋಧನೆ ನಡೆಸಿದಾಗ ಅನೇಕ ವಿಷಯಗಳು ಬೆಳಕಿಗೆ ಬಂದಿವೆ. ಆ ದೃಷ್ಟಿಯಿಂದ ಪ್ರಾಚೀನ ಕಾಲದಲ್ಲಿ ಯಶಪುರ, ಯಶಸ್ವೀಪುರ, ಈಗ ಯಲ್ಲಾಪುರ ಎಂಬುದನ್ನು ನಾವು ಗಮನಿಸಬಹುದು. ಇದು ಆ ಕಾಲದಲ್ಲಿ ರಾಜಧಾನಿಯಾಗಿತ್ತು. ಜೈನ, ವೀರಶೈವ, ಮರಾಠ ಪರಂಪರೆಗಳ ನೇತೃತ್ವದಲ್ಲಿ ಇತ್ತೆಂಬುದು ಕೂಡ ಕೆಲವು ತಾಳೆಪತ್ರದ ದಾಖಲೆಗಳಿಂದ ತಿಳಿಯಬಹುದಾಗಿದೆ. ನಂತರ ಮುಸ್ಲಿಮರ ಆಳ್ವಿಕೆಯ ಕಾಲದಲ್ಲಿ ಈ ಪ್ರದೇಶದ ಅನೇಕ ದೇವಾಲಯಗಳು ನಾಶಗೊಂಡಿವೆ ಎಂಬ ಜಿಜ್ಞಾಸೆ ಇದೆ.

ಕಾಲಕ್ರಮೇಣ ಅಗಸ್ತ್ಯರು ತಮ್ಮ ಶಿಷ್ಯರಿಗೆ ದೇವಿಯ ಆರಾಧನೆಯ ಕಾರ್ಯ ನಿರ್ವಹಿಸಲು ಸೂಚಿಸಿ, ಯಲ್ಲಾಪುರದ ಮಾವಳ್ಳಿಗೆ ಬಂದು ತಪಸ್ಸು ಮಾಡಿ ಅಲ್ಲೊಂದು ಶ್ರೀದೇವಿಯ ಗುಡಿಯನ್ನು ಸ್ಥಾಪಿಸಿದರು ಎನ್ನುವುದು ಕೂಡ ಮಾವಳ್ಳಿಯ ಕಾಡಿನಲ್ಲಿ ದೊರೆತ ಕರ್ಣಮುಚ್ಚಳ, ಪುಷ್ಕರಣಿ ಸೇರಿದಂತೆ ಹಲವು ಸನ್ನಿವೇಶಗಳು ನಮಗೆ ದೃಢೀಕರಿಸುತ್ತವೆ. ಇದು ಕೂಡ ವಾಲಿಖಿಲ್ಯರ ಕಾಲ ೬ ನೇ ಶತಮಾನದಲ್ಲಿ ಇರಬಹುದೆಂದು ಸಂಶೋಧಕರ ಅಭಿಪ್ರಾಯ. ಆಗ ಜೈನ ಮತ್ತು ಬೌದ್ಧ ಧರ್ಮಗಳ ಉಚ್ಛ್ರಾಯ ಕಾಲ. ಆ ಸಂದರ್ಭದಲ್ಲಿ ಈ ಮುನಿಗಳು ರಾಜರನ್ನು ಭೇಟಿಯಾಗಿ ಹಿಂದೂ ಧರ್ಮದ ಬಗ್ಗೆ ಜಗೃತಿ ಮೂಡಿಸುವ ಪ್ರಯತ್ನಕ್ಕೆ ಮುಂದಾಗುತ್ತಾರೆ. ಇದರಿಂದ ಈ ಪ್ರದೇಶ ಅಗಸ್ತ್ಯ, ಕೌಟಿಲ್ಯ, ವಾಲಿಖಿಲ್ಯ ಈ ಮೂರು ಮುನಿಗಳ ತಪೋಭೂಮಿ ಎನ್ನುವುದು ವೇದ್ಯವಾಗುತ್ತಿದೆ.

ಈ ಎಲ್ಲ ಮಾಹಿತಿಗಳು ಕ್ರಿಪೂ ೫೦೦-೧೦೦೦ರವರೆಗೆ ಅಲ್ಲದೇ ೩ನೇ ಶತಮಾನದ ಸಂದರ್ಭದಲ್ಲಿ ಶಾತವಾಹನರ ಕಾಲದಲ್ಲಿ ಇದ್ದವೆಂಬುದಕ್ಕೆ ಗೋಕರ್ಣ ಪುರಾಣದಿಂದ ಮಾಹಿತಿ ಲಭಿಸಿದೆ. ಅಗಸ್ತ್ಯರು ಜೋಯಿಡಾ ತಾಲೂಕಿನಲ್ಲಿರುವ ಕವಳೇಶ್ವರ ಗುಹೆಯ (ಶಿವರಾತ್ರಿಯಂದು ವಿಶೇಷ ಜಾತ್ರೆಯ ತಾಣವಾಗಿದೆ) ಇಲ್ಲಿ ಈಶ್ವರ ಮತ್ತು ಮಹಾಕಾಳಿಯ ಆರಾಧನಾ ಕ್ಷೇತ್ರವನ್ನಾಗಿಸಿಕೊಂಡಿದ್ದರು ಎಂಬುದು ಉಲ್ಲೇಖನೀಯ. ನಂತರ ೫ನೇ ವಿಕ್ರಮಾದಿತ್ಯ ಈ ಪ್ರದೇಶವನ್ನಾಳಿದ್ದ ಎಂಬುದು ಇಲ್ಲಿರುವ ಶಿಲಾಶಾಸನದಿಂದ ತಿಳಿಯಬಹುದಾಗಿದೆ.