ಮುಗಿಯದ ರಸ್ತೆ ಕಾಮಗಾರಿ: ನಗರ ಸಂಚಾರ ಸಂಚಕಾರ

ಮಂಗಳೂರು: ಮಳೆ ಆರಂಭಕ್ಕೆ ಮೊದಲೇ ಕಾಮಗಾರಿಗಳನ್ನು ಪೂರ್ಣಗೊಳಿಸಬೇಕಾಗಿದ್ದರೂ, ಮಂಗಳೂರು ನಗರದ ಹಲವೆಡೆ ಕಾಮಗಾರಿ ಈಗಲೂ ನಡೆಯುತ್ತಿದ್ದು, ಇದೀಗ ಮಳೆ ಆರಂಭಗೊಂಡಿದ್ದು, ಪರಿಣಾಮ ಈ ಮಳೆಗಾಲದಲ್ಲೂ ನಗರದ ವಿವಿಧೆಡೆ ಕೃತಕ ನೆರೆ ಸಹಿತ ಸಮಸ್ಯೆಗಳು ಉಂಟಾಗುವ ಆತಂಕ ವ್ಯಕ್ತವಾಗಿದೆ.

ರಸ್ತೆ ಜಲಾವೃವಗುವ ಆತಂಕ !: ನಗರದಲ್ಲಿ ಪ್ರತೀ ವರ್ಷ ರಸ್ತೆ ಜಲಾವೃತಗೊಳ್ಳುವ ಕಡೆಗಳಲ್ಲಿ ತಕ್ಕಮಟ್ಟಿನ ಪರಿಹಾರ ಕಾಮಗಾರಿ ನಡೆಸಿದರೂ, ಸಮರ್ಪಕ ಕಾಮಗಾರಿ ಇನ್ನೂ ನಡೆಯದೇ ಪೂರ್ಣಗೊಂಡಿಲ್ಲ. ನಗರದ ಹಲವೆಡೆ ರಸ್ತೆಗಳಿಗೆ ನೀರು ನುಗ್ಗುವ ಭೀತಿ ಈ ವರ್ಷವೂ ಮುಂದುವರಿದಿದೆ. ಅಸಮರ್ಪಕ ಚರಂಡಿ ವ್ಯವಸ್ಥೆ, ರಾಜಕಾಲುವೆ ದುಸ್ಥಿತಿ, ಅರ್ಧಂಬರ್ಧ ಕಾಮಗಾರಿ, ರಸ್ತೆ ಅಗೆತ ಮೊದಲಾದ ಕಾರಣಗಳಿಂದ ಈ ವರ್ಷವೂ ನಗರದಲ್ಲಿ ಮಳೆಗಾಲ ಸಮಸ್ಯೆ ಉಂಟಾಗಿದೆ. ಮಳೆ ನೀರು ಹರಿದು ಹೋಗಲು ನಗರದ ಹಲವೆಡೆ ಸಮರ್ಪಕವಾದ ವ್ಯವಸ್ಥೆ ಇಲ್ಲದಿರುವುದೇ ನಗರದಲ್ಲಿ ಮಳೆಗಾಲದಲ್ಲಿ ಸಮಸ್ಯೆ ಉಂಟಾಗಲು ಕಾರಣವಾಗುತ್ತಿದೆ ಎಂದು ಜನರು ಆರೋಪಿಸಿದ್ದಾರೆ.ಈಗಾಗಲೇ ಕೆಲವು ದಿನಗಳಿಂದ ಸುರಿಯುತ್ತಿರುವ ಮಳೆಗೆ ನಗರದ ಹಲವೆಡೆ ಸಮಸ್ಯೆಗಳು ಕಂಡುಬಂದಿದ್ದು, ಮುಂದಿನ ದಿನದ ಬಾರೀ ಮಳೆಗೆ ಇನ್ನಷ್ಟು ಸಮಸ್ಯೆಗಳ ಭೀತಿ ಶುರುವಾಗಿದೆ. ಚರಂಡಿ ನೀರು ರಸ್ತೆ ನುಗ್ಗುವುದು, ರಸ್ತೆ ಜಲಾವೃತ, ರಸ್ತೆ ಕಾಮಗಾರಿ ಪ್ರದೇಶಗಳಲ್ಲಿ ಸಮಸ್ಯೆಗಳು ಜೀವಂತವಾಗಿಯೇ ಉಳಿದಿದೆ.**ನಗರದ ಪಂಪ್‌ವೆಲ್‌ನಲ್ಲಿ ಚರಂಡಿ ವಿಸ್ತರಣೆ ಕಾಮಗಾರಿ ನಡೆದಿದೆ. ರಸ್ತೆ ಎತ್ತರಿಸುವ ಕಾಮಗಾರಿ ನಡೆಯುತ್ತಿದೆ. ನಂತೂರು ಸರ್ವೀಸ್‌ ರಸ್ತೆಯ ಸೇತುವೆ ಎತ್ತರಿಸುವ ಕಾಮಗಾರಿಗೆ ಟೆಂಡರ್‌ ಆಗಿದೆ. ಈ ಕಾಮಗಾರಿ ಆದಲ್ಲಿ ಸಮಸ್ಯೆಗಳು ಬಹುತೇಕ ಪರಿಹಾರ ಆಗಲಿದೆ.